Za 7 - N’KANGULU WUMOONË

Baanë bë nguli bë Yeesu bësye n'teelë maanë ko

¹ Kwamani ofo, Yeesu wusë ke yendaangë bwendi libweeti li Ngalilee, naandi wusye zolë kuve kweendë i kuvutukënë ku Zudee, cibilë sifumu si Sizwiifë bëlëtoombaangë kun'voondë.

² N'saangu Sizwiifë, wu binzwananë wabë wabelëmë

³ i banë yaandi bë nguli bisë tubë : « Botukë afa i yeendë ku Zudee, bwiinji bilaanzi byaaku yivaandi bëmonë bisalu binë wulë mu kuvaangë.

⁴ Muutu ve wun'vaangë lin'viipë liswaamë ningë ti naandi wun'toombë kuzabëkënë. Cibilë njeeyi wumunë kuvaangë bisalu bi mpilë oyo, siilë boobo bwiinji bakë booso bëkuzaabë. »

⁵ Licyelikë, banë yaandi bë nguli yivaandi bësye n'teelë maanë ko.

⁶ Yeesu wusë bëkaambë : « Ntaangwaami yibuunu kufwaanë. Mu beeno, yosuku ntaangu yi mboti.

⁷ Buloongo kupodi ve kululeendë, kasi miinu bëlë mu kun'deendë, cibilë miinu yilë mu kusisiminë ti mëvaangë maawu mëbi. »

⁸ Yendaanu beeno ku n'saangu. Miinu yisë n'kwendë ku n'saangu be woowo ko, cibilë ntaangwaami yibuunu kufwaanë.

⁹ Bunë kwamani kutubë mamoomo, Yeesu wusë syaalë ku Ngalilee.

Yeesu ku n'saangu binzwananë

¹⁰ Bunë banë yaandi bë nguli bëyeendë ku n'saangu, Yeesu yivaandi wuyendë kwaawu ku mëswamunu, kasi naandi wusye yileesi ko.

¹¹ Kwaawu, sifumu si Sizwiifë bëlën'toombaangë ku n'saangu i bisë kufulë : « Naandi kuni kukeelye? »

¹² Munë nkoongë, mpaapë baatu bëlë ke findënaangë mpakë mu cibilë cyaandi. Bëmesë baati : « Naandi muutu wumboti », bën'ka : « Naandyoowo wun'vukumunë baatu. »

¹³ Kasi muutu ve wulëtubilaangë mu lizinë lyaandi fë ciyalëlë, cibilë bakë booso babë yi boomë bë Sizwiifë.

¹⁴ N'saangu wabë fë meeyi, bunë Yeesu kuyendë ku n'zo-Nzaambi i wusë ba mu kuloongë.

¹⁵ Sizwiifë bëtulumukë i bisë tubë : « Kwisilë buni muutu awu, mu kuzaabë makë mooso omo naandi ti sye sinu kuve? »

¹⁶ Yeesu wusë bëvutulilë : « Nsinunwaami yisye fuminë ke miveekë ko, kasi kuke Nzaambi wunë wukun'filë.

¹⁷ Ningë muutu wuzolisi kuvaangë n'vwiilu Nzaambi, naandi wun'zaabë ningë nsinunwaami yifuminë kuke Nzaambi kaambofo ke miinu.

¹⁸ Muutu wunë wun'tubilaangë mu naveekë, wutoombaangë bumpumu bwaandi. Kasi muutu wunë wun'salilaangë mu bumpumu bu wunë wukun'filë, naandyoowo wun'tubaangë cyelikë i libi vo mu naandi.

¹⁹ Moyiizë wusye luvaanë n'kaakë kwe? Akasi wun'viipë ve mu beeno wun'cinzikë waawu. Cibilë-mbici beeno lun'toombë kum'poondee? »

²⁰ Nkoongë baatu yisë n'vutulilë : « Njeeyi wuvwaatu ke ciluunzi cibi! Nani wun'toombë kukuvoondë? »

²¹ Yeesu wusë bëvutulilë : « Miinu yavaangë cisalu cyo cimweekë kwaandi i beeno booso lwabwa libobo!

²² Moyiizë wuluvaanë n'swa mu kubukë bubakëlë – cyelikë, n'swa be woowo sye fuminë ko ke Moyiizë, kasi ke sinkaakë siinu – beeno luvitikë mu kubukë bubakëlë mu cilumbu ci saba.

²³ Ningë beeno lum'podi kubukë bubakëlë mu cilumbu ci saba mu kucinzikë n'kaakë Moyiizë, beeno mbi lwakun'dasukilë, cibilë yavuuci muutu cilumbu ci saba?

²⁴ Leembwaanu kufundisyaangë baatu mu ntekwaawu. Kasi fundisyaangë mu bucyelikë. »

Yeesu, naandi Kliistu?

²⁵ Mwa mpooko baatu bë livulë li Yelusaleemë bëlëtubaangë : « Muutu awu kwe bën'toombë kuvoondë?

²⁶ Talaanu : naandi wulë mu kutubilë fë ciyalëlë i muutu ve wukun'fuungë kutubë. Mu lyalyooli sifumu siitu bacikunë ti, naandi cibeeni Kliistu?

²⁷ Fanë Kliistu kun'kwisilë, muutu ve wun'zaabë kuni naandi kufuminë. Akasi beeso tuzabisi kuni kufuminë muutu owo. »

²⁸ Yeesu wulëloongaangë mu n'zo-Nzaambi, naandi wusë losukë : « Beeno luzabisi cyelikë nani yikeeli i kuni yifuminë? Miinu yisye kwisilë mu mëngolo maami ko, kasi wunë wukun'filë, mu naandi lufwenikini kutuulë civuufu. Beeno lusye n'zaabë kuve.

²⁹ Miinu yin'zabisi, cibilë yifuminë ke naandi i naandi wukun'filë. »

³⁰ Baawu, bëlëtoombaangë kukaangë Yeesu, kasi muutu ve wabë yi mëkanë mu kun'siimbë, cibilë ntaangwaandi yabë yibuunu kufwaanë.

³¹ Mu nkoongë, mpaapë baatu bëta maanë mu naandi. Baawu bëlëtubaangë : « Ntaangu Kliistu wun'kwisilë, naandi wun'vaangë bimaaku bin'vyokilë yi byo muutu awu wumunë kuvaangë? »

Bëtumë mësodaadi mu kukaangë Yeesu

³² Sifalisyaanu, bëyuwu manë bëlëmimëtaangë mu nkoongë mu cibilë ci Yeesu. Bëkuluutu be singangë-Nzaambi i Sifalisyaanu bëfilë mësodaadi mu kun'kaangë.

³³ Yeesu wusë tubë : « Miinu yike yiinu mu mwa ntaangu. Miinu yin'vutukënë ke wo wukun'filë.

³⁴ Beeno lukun'toombë, kasi lusë kum'monë ko, cibilë beeno kupodi ve kweendë ko yim'ba. »

³⁵ Mu lya lyoolyo Sizwiifë bisë kufusënë : « Naandi kuni kum'podi kweendë ko beeso tun'kaambu kum'monë? Naandi wun'kwendë kuke Sizwiifë bëtyamukë bwendi singeleekë i wun'natë liloonji ke basë Ngeleesë?

³⁶ Buni bun'kwendilë mëbuungu mo kwatubë : Beeno lukun'toombë, kasi beeno lusë kum'monë ko, cibilë beeno kupodi ve kweendë ko miinu yim'ba? »

Miilë yi masi më luziingu

³⁷ Cilumbu ci siitu n'saangu, cyaawu cyabë cinjiinji, Yeesu wusë telëmë fë ntwaalë nkoongë, naandi wulosukë : « Ningë wun'viipë ke yi mpwiilë, naandi we yisi ke miinu, bwiinji kunwa.

³⁸ “Wunë wun'ta maanë mu miinu, miilë yin'vaanaangë masi më luziingu yin'kuumbë mu n'timaandi” bunë butubilë Libuungu. »

³⁹ Yeesu wulëtubilaangë mu Ciluunzi ci Nzaambi cilëkulumukë ke banë bëlëta maanë ke naandi. Kasi mu ntaangu beenë, Ciluunzi ci Nzaambi cisye n'veewu ko, cibilë Yeesu wabë yibuunu kuzangëmë mu bumpumu.

Nkoongë baatu yikabukë mu cibilë ci Yeesu

⁴⁰ Abu bayuwu mëbuungu be moomo, bëmesë mu nkoongë, bëlëtubaangë : « Cibeeni, muutwaawu M'bici! »

⁴¹ Bën'ka bëlëtubaangë : « Naandi Kliistu kukeeli! » Bëmesë yivaandi bëlëtubaangë : « Kliistu sye fuminë ku Ngalilee kwe?

⁴² Mësonëmë ti Kliistu wum'ba muutu wum'butu mu likaandë li Daviidë i naandi wun'fuminë ku libweeti li Betëlëyeemë linë Daviidë kuzingilë. »

⁴³ Nkoongë yikabukë mu cibilë ci Yeesu.

⁴⁴ Bën'ka mu nkoongë bëlëzolaangë kun'kaangë, kasi muutu ve wabë mëkanë mu kun'siimbë.

N'timë ngolo wu sifumu si Sizwiifë

⁴⁵ Mësodaadi bëvutukënë kuke singangë-Nzaambi i Sifalisyaanu banë bëbëyufulë: « Cibilë-mbici beeno lwakaambu kutwalilë Yeesu? »

⁴⁶ Mësodaadi misë vutulë : « Tee yi zwaalu muutu ve wutubë dedë mweekë naandi! »

⁴⁷ Sifalisyaanu bisë tubë : « Beeno yiviinu lwata maanë mu naandi?

⁴⁸ Beeno luzabisi fumu mweekë kaambofo Sifalisyaanu sinë syata maanë mu naandi?

⁴⁹ Kasi baatu be boobo bësye zaabë ko nkaakë Moyiizë, baawaaba bësifu! »

⁵⁰ Nikodeemë wabë wumweekë mu cinguuku ci Sifalisyaanu : naandi wuye monë Yeesu mwa ntaangu sivyookë. Naandi wusë bëkaambë :

⁵¹ « N'kaakiitu wun'tubë ti, beeso kupodi ve kuvaanë muutu mëseembu kukaambu ntetë kun'yuwu i kuzaabë linë kwavaangë. »

⁵² Baawu bisë n'vutulilë : « Njeeyi yivaaku musë Ngalilee? Taangë buboti Mëbuuku më Nzaambi, bwiinji wuzaabë ti m'bici ve wun'fuminë ku Ngalilee. » [

Yeesu i n'cyeetu nduumbë

⁵³ Fë mbusë, kadë muutu wuye yendaangë ku n'zwaandi.