Za 5 - N’KANGULU WUMOONË

Yeesu watelikë cikatë

¹ Mwa bilumbu bye vyooci, Sizwiifë bisë vaangë n'saangu i bwaawu Yeesu wuyendë ku livulë li Yelusaleemë.

² Mu livulë be lyoolyo, belë-belë yi livitu li Mëmemë, mwabë cizibë cyabë yimunë myaanzë taanu yi mëkuunzi bën'telaangë Betësayiida ku mbeembu Siyebelee.

³ Kusi myaanzë be woowo, mpaapë bibeedo byabë binonukë : bifwa meeso, baatu bëtolëkënë maalu, bikatë. Baawu bëlëciingaangë masi mënikukë,

⁴ cibilë yaanzi yi Fumu yilëkulumukaangë mu ntaangu simesi mu cizibë i wulënikunaangë masi. Cibeedo cin'tetë cinë cilëkotaangë mu masi mënikukë, wulëbelukaangë mu ncyeenzwaandi, bosuku bubeeli.

⁵ Faawu fabë muutu wabë yi ncyeenzu fë mëkumë-tatu naanë li n'vu.

⁶ Bunë Yeesu kwe m'moni wulambëlëlë fë n'toto i kwe zaabi ti naandi wabë yikubeelë mpooko bilumbu, naandi wun'yufulë: « Njeeyi wun'toombë kubelukë? »

⁷ Cibeedo beenë cisë n'vutulilë : « A Fumu miinu yikeeli ko yi muutu wunë wum'podi kum'budikë mu cizibë mooti masi manikukë, ntaangu yin'toombë kwendilë, wun'ka wavaangë mëdwaangu mu kukotë ntetë yi miinu. »

⁸ Yeesu wusë n'kaambë, « Telëmë, boongë citefë cyaaku, i lyaatë. »

⁹ Mo mu ntaangu beenë muutu wusë belukë, naandi wuboongë citefë cyaandi i ke lyataangë. Kosuku lyaawu livangënë cilumbu ci saba,

¹⁰ i bëkuluutu bë Sizwiifë bisë kaambë muutu wubelukë : « Cyaawu cilumbu ci saba, njeeyi sye fwaanë ko mu kunatë citefë cyaaku. »

¹¹ Naandi wusë bëvutulilë : Muutu wo wakum'belusi wakun'kaambë : « Boongë citefë cyaaku i we lyaatë. »

¹² Baawu bisë n'yufulë : « Muutu mbici be woowo wakukaambë : “Boongë citefë cyaaku i wulyaatee?” »

¹³ Kasi muutu wo wubelukë sye n'zaabaangë ko, cibilë Yeesu wuzimbilë fë meeyi nkoongë baatu babë faawu.

¹⁴ Bilumbu abu bye vyooci, Yeesu wusë n'dyengënë ku n'zo-Nzaambi, wusë n'kaambë : « Abu njeeyi wabelukë buyifanu. Keelë wulë be sumukë, mu kumaangë lyaambu libi kube kuyisilë. »

¹⁵ Muutu wusë ke kaambë bëkuluutu bë Sizwiifë ti Yeesu na wakum'belusi.

¹⁶ Baawu bisë kubalukilë Yeesu, cibilë naandi wuvangilë mamoomo cilumbu ci saba.

¹⁷ Kasi Yeesu wubëvutulilë : « Tataami wulë mu kusalaangë tee cibubwayi i miinu yivaamë yilë mu kusalë. »

¹⁸ Mu cibilë ci libuungu be lyoolyo, bëkuluutu bë Sizwiifë bëlëtoombaangë sintoondo mu kuvoondë Yeesu, yaaku ti mu cibilë cyo naandi wubaayi n'kaakë wu cilumbu ci saba, kasi naandi wulëtubaangooso ti Nzaambi wabë Tataandi yi cyelikë i naandi wulëyituunvyaangë dedë mweekë Nzaambi.

Lutumu lu Mwaanë Nzaambi

¹⁹ Yeesu wusë bëbulë mbeembu i kubëkaambë : « Licyelikë, licyelikë yilukaambë, mati: Mwaanë kupodi ve kuvaangë lin'viipë mu naveekë, naandi wun'vaangaangë tokë manë kum'monaangë ke Tataandi: cibilë manë mëvaangaangë Taatë, Mwaanë yivaandi wuvangilaangë bo bumweekë.

²⁰ Cibilë Taatë be zolë Mwaanë i naandi wukun'leesi byakë byooso binë naveekë wun'vaangaangë. Naandi wukun'leesyooso bisalu bivyokilë bunenë, bwiinji lubwa libobo.

²¹ Cibilë bo bumweekë ti Taatë wun'vulumunaangë bëfwa i wubëvaanaangë luziingu, bo bumweekë Mwaanë wun'vanaangë luziingu ke wunë kuzolisi.

²² Taatë wusë n'fundisi muutu ko, kasi naandi wuvandikë Mwaanë n'swa mu kufundisi,

²³ bwiinji bakë booso bëtuunvi Mwaanë, bo bumweekë bën'tunvilaangë Taatë. Wunë wun'kaambu kutuunvi Mwaanë, naandi kupodi ve kutuunvi Taatë wunë wun'filë. »

²⁴ « Licyelikë, licyelikë, miinu yilukaambë : wunë wun'kuwu mëbuungu maami, i wun'ta lyaanë mu wo wukun'filë, wum'bakë luziingu lu saki yi sakë. Naandi wusë kube n'vaanë lusifu ko, kasi wum'botukë mu lufwa mu kuvyookë ku luziingu.

²⁵ Licyelikë, licyelikë miinu yilukaambë, mati : ntaangu yakun'fwaanë i yawooso yafwaanë yo bëfwa bën'kuwu mbeembu Mwaanë Nzaambi i banë bën'kuwu yaawu bën'ziingë.

²⁶ Cibilë bo bumweekë ti Taatë wuke cizibë ci luziingu, bo bumweekë naandi wutiisi Mwaanë mu kuba cizibë ci luziingu.

²⁷ Naandi wavaanë Mwaanë lutumu mu kufundisi, cibilë naandi Mwaanë Muutu kukeeli.

²⁸ Kebaanu lulë bwa libobo, cibilë taangu yilë mu kwiisë yinë bakë booso bëke mu mëbuumbë bën'kuwu mbeembwaandi,

²⁹ i bëm'basikë mu mëbuumbë maawu. Banë bëvaangë mëboti bën'vulumukë mu kutambulë luziingu, kasi banë bëvaangë mëbi, bën'vulumukë mu kubakë lusifu.

³⁰ Miinu kupodi ve kuvaangë lin'viipë mu n'swaami miveekë. Miinu yin'fundisi bo Nzaambi wukun'kambilë i lufundusu lwaami lusulëmë cibilë miinu yisë n'toombë ko n'vwiilwaami, kasi n'vwiilu wu wo wukun'filë. »

Cimbaanji mu Yeesu

³¹ Ningë miinu yin'vaanë cimbaanji mu miveekë, cimbaanji cyaami cisë m'ba ci cyelikë ko.

³² Kasi mati wun'ka wufwenikini kutubë cimbaanji cyaami, i cimbaanji be cyooci mu miinu cicyelikë.

³³ Beeno lufilë bipayi ke Za i naandi wutubë cimbaanji ci cyelikë.

³⁴ Miinu yikeeli ko, n'ciinzë mu cimbaanji ci muutu, kasi yin'tubilë obo bwiinji beeno luvuukë.

³⁵ Za wabë dedë mweekë mwiindë bën'tatikaangë mu kuvaanë cyeseesë i beeno luvitikë kuba mu liyaanji mu mwa ntaangu mu cyeseesë cyaandi.

³⁶ Kasi miinu yike yi cimbaanji ci njiinji civyokili cinë ci Za. Bisalu binë miinu yilë mu kuvaangë byo bimweekë binë Taatë wukum'paanë mu kusalë, wun'tubilë mu cibilë cyaami i wun'leesi ti Taatë wukun'filë.

³⁷ Taatë wo wukun'filë mu kun'tubilë yivaandi cimbaanji. Beeno lubuunë vyaasi kuwu mbeembwaandi i kumonë ciinyi cyaandi.

³⁸ Beeno lusë n'sweekaangë ko mëbuungu maandi, cibilë lusë n'tulaangë lyaanë ko mu wunë wukun'filë.

³⁹ Beeno lun'sinwaangë yi bunketë manë Mësonëmë cibilë lun'tiisi kubakilë mwaawu luziingu lu sakë yi sakë : cyelikë maawu ma mëkun'tubilaangë cimbaanji!

⁴⁰ Mu kumonë beeno lusë n'zolë ko kwiisë ke miinu mu kubakë luziingu lu cyelikë.

⁴¹ « Miinu yisë n'toombë luzanjiku lun'fuminë ke baatu ko.

⁴² Kasi miinu yiluzabisi : yibe zaabë ti beeno lukeeli ko yi luzolo mu Nzaambi.

⁴³ Miinu yiyisilë mu lizinë li Tataami, i beeno lulë mu kumaangë kun'tambulë. Kasi ningë muutu wun'ka wun'kwisilë mu lutumu lwaandi naveekë beeno lukun'tambulë!

⁴⁴ Beeno lun'zolaangë luzanjiku, benuveekë yi benuveekë i lusë n'toombaangë ko luzanjiku lun'fuminaangë ke Nzaambi naveekë. Beeno buni lum'podi kun'teelë lyaanë?

⁴⁵ Kebaanu lulë baalë ti miinu yilufuundë fë ntwaalë Tataami. Mati Moyiizë naandi wulëfuundë, mu naandi mwaawu lutuulë civuufu ciinu.

⁴⁶ Ningë cyelikë lube ta lyaanë mu Moyiizë, beeno lukun'teelë yivaandi lyaanë, cibilë bësonikinë mu miinu.

⁴⁷ Kasi beeno lusë kun'teelë maanë ko mu manë kusonikë, buni beeno lum'podi kuteelë maanë mu mëbuungë maami? »