Za 4 - N’KANGULU WUMOONË

Yeesu i n'cyeetu wu libweeti li Samali

¹ Sifalisyaanu, bëyuwu ti Yeesu wulëbatizyalaangë mpaapë bilaanzi kuvyokilë Za.

² — Licyelikë, Yeesu naveekë sye batizyaalaangë baatu ko, kasi bilaanzi byaandi baawu bëlëbatizyaalaangë. —

³ Abu Yeesu kwe yuwu mo bëlëtubaangë, naandi wubotukë ku libweeti li Zudee i wusë vutukënë ku Ngalilee.

⁴ Mu kweendë kwaawu, naandi nkanë wufitë tabilë ku Samali.

⁵ Naandi wusë ke tuukë ku bwaalë bubelëmë yi Samali, bën'telaangë Sikaalë, bubelëmë yi solë yo Zakoobë kuvaanë ke mwanaandi Zozeefë.

⁶ Faawu, fabë libulu li masi li Zakoobë, Yeesu biitu bin'volë mu mweendo, wusë kukalë mu ndaambu libulu li masi. Zoolë yabë fë ntaangu-mbatë.

⁷ N'cyeetu wu Samali wuyisë mu kutekë masi i Yeesu wusë n'kaambë : « Mpaani masi bwiinji yinwa. »

⁸ – Bilaanzi byaandi bëyendë ku livulë mu kusuumbë ndiiwu. –

⁹ N'cyeetu wu Samali wusë n'vutulilë : « Njeeyi mati Zwiifë! Cibilë-mbici wakun'doombë masi, miinu ti musë Samali? » – Licyelikë, Sizwiifë yimunë basë Samali bëkeeli yi lyukunë ko. –

¹⁰ Yeesu wukun'vutulilë : « Njeeyi ti zabisi likabu linë Nzaambi kun'vanaangë i nani wakuloombë masi më kunwa, nkanë njeeyi vwiili n'ciinzë kun'loombë maawu i naandi na fwenikini kukuvaanë masi më luziingu. »

¹¹ N'cyeetu wuvutulë : « A Fumu, njeeyi ti citeku cikeeli ko mu kutekilë, libulu yivaandi ti lidoongë. Buni wufwenikini kubakilë masi më luziingwe?

¹² Tatiitu Zakoobë wutuvaanë libulu be liili. Naandi wunwa naveekë masi be maama, baanë baandi, yimunë bibulu byaandi yivaandi bënwa maawu. Njeeyi mwiinji bëkuluutu yimunë Zakoobë? »

¹³ Yeesu wusë n'vutulilë : « Wosuku wun'nwa masi be maama, naandi mpwiilë yisë m'maanë ko.

¹⁴ Akasi wunë wun'nwa masi manë yikun'vaanë, mpwilë yim'maanë: masi manë yikun'vaanë mu m'balukë cizibë ci masi mu luziingu lu sakë yi sakë. »

¹⁵ N'cyeetu wusë n'kaambë : « A Fumu, mpaani masi be moomo, bwiinji mpwilë yimaanë mu kuleembu miinu kube kutekaangë masi fa faafë. »

¹⁶ Yeesu wukun'kaambë: « Yendë, ye teelë n'nunyaaku i wuvutukë akuuku. »

¹⁷ N'cyeetu wuvutulë : « Miinu yikeeli yi n'nuni ko. » Yeesu wun'kaambë : « Njeeyi watubë licyelikë ti wukeeli yi n'nuni ko.

¹⁸ Cibilë njeeyi wabakaangë bëbakëlë bëtaanu, libakëlë like yaaku bubwayi likeeli lyaaku kuve. Njeeyi watubë licyelikë. »

¹⁹ N'cyeetu wusë tubë : « A Fumu, miinu yamonë ti njeeyi m'bici wukeeli.

²⁰ Sinkaakë siitu bëlësambililaangë Nzaambi fë moongo be wuuwu, kasi beeno Sizwiifë lwakun'tubaangë ti mu kusambililë Nzaambi, bufwenikini kwendaangë ku Yelusaleemë. »

²¹ Yeesu wun'vutulilë : « A n'cyeetu nyuwulu, ntaangu yin'fwaanë yo beeno lun'kaambu kusambilë Taatë fë moongo be wuuwu, kaambofo ku Yelusaleemë.

²² Beeno basë Samali lun'sambilaangë wo lube kaambu kuzaabë, akasi beeso Sizwiifë tun'sambilaangë wo tube zaabë, cibilë luvukulu lun'fuminaangë ke Sizwiifë.

²³ Kasi zoolë yilë mu kwiisë i yaawu yivaandi yafwaanë, yo banë bën'kuundaangë Taatë mu ciluunzi i mu cyelikë, cibilë baawu obo, ba Taatë kun'toombaangë.

²⁴ Nzaambi Ciluunzi i banë bëkun'kuundë bëfwenikini kun'kundë mu ciluunzi i mu cyelikë. »

²⁵ N'cyeetu wusë n'kaambë : « Miinu yizabisi ti Mësiya — bën'telaangë Kliistu — wulë mu kwiisë. Ntaangu kun'kwisilë, naandi wutukaambë makë mooso. »

²⁶ Yeesu wuvutulë : « Mi wuuwu, miinu yilë mu kutubë yaaku. »

²⁷ Ntaangu be syoosi, bilaanzi byaandi bisë vutukënë i baawu bisë tulumukë mu kum'monë kutubënë yi n'cyeetu. Kasi wun'velë ve mu baawu wun'yufulë : « Njeeyi mbici wun'toombë mu naandi » kaambofo : « Cibilë-mbici wulë mu kutubënë yaandi? »

²⁸ Bwaawu n'cyeetu kubikë cidoyi cyaandi i wuvutukënë ku livulë, mu kukaambë baatu :

²⁹ « Yisaanu lumonë, muutu wakun'kaambë makë mooso mo yivaangë. Naandi wukeeli Kliistu kwe? »

³⁰ Baawu bëbasikë ku livulë i bëyisë ke Yeesu.

³¹ Ntaangu be syoosyo bilaanzi bëlëbondilë Yeesu mu kulya : « A Fumu, lya ko! »

³² Kasi naandi wusë bëkaambë : « Ndiiwaami beeno lusye yizaabë ko. »

³³ Bilaanzi biyufësënooso baveekë yi baveekë : « Wun'viipë wan'twalilë bilya? »

³⁴ Yeesu wutubë : « Ndiiwaami mati mu kuvaangë n'vwiilu yi wo wukun'filë i mu kumanisi cisalu cinë wukum'paanë.

³⁵ Beeno lun'tubaangë : “Yin'kaambu ngoondi na mu kutuukë mu ntaangu kudokunë.” Kasi miinu yilukaambë : talaanu buboti sisolë, bikunu byakweelë i byafwaanë mu kudokunë!

³⁶ Wunë wun'dokunaangë na wum'bakaangë ndobu i naandi wun'kucikaangë mëkuundi mu luziingu lukalilë, bwiinji, wo wun'kunaangë i wo wun'dokunaangë bëtoondë cintwaali.

³⁷ Mu cibilë licyelikë ke cinganë cin'tubë ti : “Wun'viipë wun'kunaangë i wumesë na wun'dokunaangë.”

³⁸ Miinu yilufilë mu kudokunë mu solë lukaambu kusalë baatu bën'ka bësalë i beeno lwakun'vatëminë bisalu byaawu. »

³⁹ Mpaapë basë Samali bë livulë be liili bëta maanë mu Yeesu mu cibilë ci maambu mëtubë n'cyeetu : « Naandi wakun'kaambë mamooso manë yavaangë. »

⁴⁰ Mati bwaawu, basë Samali bëyisë kun'zakënë, bën'loombë mu kukalë yaawu i Yeesu wukalë faawu bilumbu byooli.

⁴¹ Baawu bisë kube funooso mu kuta maanë mu cibilë ci manë kulë tubaangë naveekë.

⁴² Baawu bisë kaambë n'cyeetu : « Buyifanwabu yaaku ti mu mo watukaambë ma twacikuninë kuve, kasi beeso twakuwu yi besuveekë, twacikunë cibeeni ti naandi N'vuuci buloongo. »

Yeesu wabelusi mwaanë n'kwa-lwaangu

⁴³ Abu kwavyoosi bilumbu byooli faawu, Yeesu wubiikë bwaalë be boobo wuyendë ku libweeti li Ngalilee.

⁴⁴ Naandi wuyitubilë naveekë ti : « M'bici bisë kun'tuunvyaangë mu syaandi kuve.»

⁴⁵ Bunë kwe tuuci ku Ngalilee, baatu bën'tambulë buboti, cibilë baveekë bëmonë manë kuvaangë ku livulë li Yelusaleemë mu ntaangu n'saangu wu Paakë.

⁴⁶ Naandi wusë vutukë ku Kana ku Ngalilee, kwaawu kubalulilë masi mu viinyi. Ku livulë li Kapelënawuumë, kwabë n'kwa-lwaangu wu n'tinu wabë yi mwaanë wulëbeelaangë.

⁴⁷ Bunë kwayuwu ti Yeesu wuyisë ku libweeti li Zudee ku Ngalilee, naandi wuyendë ke Yeesu, i wun'loombë mu kuvuuci mwanaandi wabë mu mpasi lufwa.

⁴⁸ Yeesu wusë n'kaambë : « Beeno kaambu kumonë biliimbu i bimaaku, beeno kuta ve maanë. »

⁴⁹ N'kwa-lwaangu wusë n'vutulilë : « A Fumu, yisë ke miinu mu kumaangë mwaanë kufwa. »

⁵⁰ Yeesu wun'kaambë : « Vutukënë, ku bwaalë bwaaku, mwanaanku ke moonyi. » Muutu beenë wuta lyaanë mu manë Yeesu wulën'kaambaangë i wusë ke yendaangë.

⁵¹ Faanë kulë vutukënë, biseelu byaandi bisë n'dyengënë, bën'twalilë saangu: « Mwanaaku ke moonyi! »

⁵² Naandi wubëyufulë zoolë mbici kube mweenë cin'kati, i baawu kun'vutulilë : « Yabë zoolë yin'tetë yi mbukulu bwiisi, libaawu lisë manë. »

⁵³ Tataandi wusë tebukë moonyi ti mu zoolë be yooyo yaawu Yeesu kun'kambilë : « Mwanaaku ke moonyi ». Mu bwaawu naandi i n'zwaandi yakë yooso bëteelë maanë mu Yeesu.

⁵⁴ Cyaawu aci ciliimbu ci cimaaku cimwaali cyo Yeesu wuvaangë bunë kufuminë ku libweeti li Zudee ku Ngalilee.