Za 3 - N’KANGULU WUMOONË

Yeesu i Nikodeemë

¹ Faawu fabë muutu bëlëteelaangë Nikodeemë, wabë mu cinguuku ci Sifalisyaanu. Naandi wabë fumu Sizwiifë.

² Naandi wuyisë yi bwiilu wukuzakënë Yeesu i kun'kaambë : « A Fumu, beeso tuzabisi ti Nzaambi wakufilë mu kutuloongë, cibilë wun'velë ve wum'podi kuvaangë bimaaku dedë mweekë njeeyi wulë mu kusilaangë mooti Nzaambi wukeeli yaandi kuve. »

³ Yeesu wusë n'vutulilë : « Cibeeni, miinu yikukaambë licyelikë: muutu ve wum'podi kumonë Lwaangu lu Nzaambi, mooti naandi sye be butu mbutukulu yimoonë kuve. »

⁴ Nikodeemë wusë n'yufulë : « Lya kubeelë buni ti muutu wakweelë mu kube butu mbutukulu yimoonë? Mu cibilë ocyo, naandi kupodi ve kube vutukë mu civumu ci nguli mu kube butu vyaasi yimwaali? »

⁵ Yeesu wusë vutulë : « Cibeeni, yikukaambë licyelikë: muutu ve wum'podi kukotë ku Lwaangu lu Nzaambi mooti naandi sye butu kuve mu masi i mu Ciluunzi.

⁶ Cinë cibutukë mu baatu lu moonyi, muutu kukeeli, i cinë cibutukë mu Ciluunzi ci Nzaambi, cyaawu ciluunzi.

⁷ Keelë wulëtulumukë cibilë miinu yakukaambë ti : “Beeno booso lufweeni kubutukë mbutukulu yimoonë.”

⁸ Mpeemu yim'pukaangë fosuku yizolisi, njeeyi wulë mu kuwu ncyeembi, kasi wusye zaabë kuve kuni yaawu yin'fuminë i kuni yin'kwendë. Bwa boobo bwa bun'vangininaangë mu wosuku muutu wum'butwaangë mu Ciluunzi ci Nzaambi. »

⁹ Bwaawu, Nikodeemë wusë vutulë : « Lyaawu buni lim'podi kuvangininë? »

¹⁰ Yeesu wun'vutulë : « Njeeyi mati n'loonji ku Islayeelë, njeeyi sye zaabë maawu kwe?

¹¹ Licyelikë, licyelikë, miinu yikukaambë : tun'tubaangë mo tuzabisi i tun'vanaangë cimbaanji mu mo twamonë, kasi beeno lusë n'zolaangë kuve kucikunë cimbaanji ciitu.

¹² Ningë lusye kun'teelë maanë kuve fanë yilukambilë maambu më buloongo be buubu, buni lukun'nyuwulu ningë yibe lukaambë maambu mëyilu?

¹³ Muutu ve wumakë ku yilu, kanuku Mwaanë Muutu wufuminë ku yilu!

¹⁴ Dedë mweekë Moyiizë wutelikë nyookë mu ntaandu ciyumi, bwa boobo, lufwenikini kutelikë Mwaanë Muutu,

¹⁵ bwiinji wosuku wun'ta maanë mu naandi wum'bakë luziingu lu sakë yi sakë.

¹⁶ Cibilë Nzaambi wuzolë buloongo n'viipë, wuvaanë mwanaandi mweekë vwiili mu kuba wunë wun'ta lyaanë mu naandi wuleembu kunyambëkënë kasi wubakë luziingu lu sakë yi sakë.

¹⁷ Nzaambi sye filë mwanaandi mu buloongo ko mu kubufundisi, kasi mu kubuvuuci mu naandi.

¹⁸ Wunë wun'ta maanë mu Mwaanë bisë kun'fundisi kuve, kasi wunë wun'kaambu kuta maanë bëkufundisi, cibilë wusye teelë maanë ko mu Mwaanë viingu wu Nzaambi.

¹⁹ Talaanu lufundusu buni lun'kwisilaangë: cyeseesë ciyisë mu buloongo, kasi baatu bëzolisi citoombi kuvyookë cyeseesë, cibilë mëvaangë maawu mëbi.

²⁰ Wosuku wun'vaangaangë libi, wun'kwakënaangë yi cyeseesë, cibilë wum'maangaangë mëvaangë maandi mëbi kumonikë fë ciyalëlë.

²¹ Vandi kasi wunë wun'salilaangë cyelikë, wun'kwisaangë kuke cyeseesë, bwiinji bëmonë mëvaangë maandi mëboti mëdedëkënë yimunë Nzaambi. »

Yeesu i Za

²² Kumanë ofo, Yeesu i bilaanzi byaandi bëyendë ku libweeti li Zudee. Naandi wukalë mwa ntaangu yi baawu i naandi wulëbatizyalaangë.

²³ Za yivaandi wulëbatizyalaangë ku libweeti li Enoonë libelëmë yi Saliimë, cibilë kwaawu kwabë masi më mpaapë. Baatu bëlëkwisaangë ke naandi i wulëbëbatizyalaangë.

²⁴ Licyelikë mu ntaangu beenë, Za wabë yibuunu kutuulu mu buloko.

²⁵ Bwaawu, mwa bilaanzi bëmesë bi Za bëtatikë kufindënë simpakë yimunë Zwiifë mweekë mu cibilë ci simpaangu si bëlyomisi.

²⁶ Baawu bisë kweendë ke takënë Za i bisë n'kaambë : « A N'loonji, njeeyi wulë mu kutebukë moonyi mu muutu wabë yaaku ku lisimu limesi li mwiilë wu Yulëdaanu, wunë njeeyi wuteelë cimbaanji? Naandi mati wakum'batizyaalaangë i baatu booso yakwendaangë ke naandi! »

²⁷ Za wusë bëvutulilë : « Muutu ve wum'podi kubakë cin'viipë mooti Nzaambi sye n'vaanë kuve.

²⁸ Benuveekë kupodi kuta cimbaanji : “Miinu yikeeli Kliistu kuve, kasi bëkun'tumë fë ntwaalaandi.”

²⁹ Muutu wubakisi n'kasi, naandi na n'nuni, kasi ndiku n'nuni wutelëmë fëke naandi i mu kun'kuwu i naandi ke liyaanji mu kuwu mbeembu yi n'nuni. Nyeenzi be yooyo yaami miinu i yaawu yifwanëkënë.

³⁰ Naandi fwenikini kumakë, bwiinji miinu yikulukë. »

Wunë wufuminë ku yilu

³¹ Wunë wufuminë ku yilu, naandi wuvyokilë bakë booso, kasi wunë wubutukë mu n'toto, naandi wufuminë fë n'toto i wun'tubaangë maambu më n'toto. Muutu wunë wufuminë ku yilu, naandi kuvyokilë bakë booso.

³² Naandi mbaanji mu manë kwamonë i mo kwakuwu, kasi muutu ve wun'vitikë cimbaanji cyaandi.

³³ Wunë wun'vitikë cimbaanji cyaandi, naandi wun'sisiminë ti Nzaambi na cyelikë.

³⁴ Muutu wo Nzaambi wafilë, naandi wutubaangë maambu më Nzaambi, cibilë Nzaambi wukun'vanaangë Ciluunzi lunduu.

³⁵ Taatë be zolë Mwaanë i naandi wuvaanë byakë byooso mu lutumu lwaandi.

³⁶ Muutu wunë wun'teelë lyaanë mu Mwaanë wum'bakë luziingu lu sakë yi sakë. Wunë wun'kaambu kuteelë lyaanë mu Mwaanë, naandi wusë mbakë luziingu ko, kasi mwaangu Nzaambi wun'kalilë yaandi.