Za 2 - N’KANGULU WUMOONË

Likweelë ku Nkanë

¹ Bilumbu byooli bivyookë, mëkweelë mëlëvangënë ku bwaalë bu Kana ku libweeti li Ngalilee. Mamë Yeesu wabë faanë,

² i bëtelë yivaandi Yeesu i bilaanzi byaandi ku mëkweelë beenë.

³ Abu viinyi ye mani, mamë Yeesu wukaambë Yeesu : « Baawu bësyeeli yi viinyi ko. »

⁴ Kasi Yeesu wun'vutulilë : « A n'cyeetu njeeyi wufwenikini kun'kaambë mani yifwenikini kuvaangë? Zoolaami yibuunë kufwaanë. »

⁵ Mamë Yeesu wusë kaambooso bisasi : « Vangaanu makë mooso kulukaambë. »

⁶ Foofo fabë bidoyi bi samunu bivangunu mu limanyi linë Sizwiifë bëlësalilaangë ntaangu ntamë mu bulyomisi bwaawu. Kadë cidoyi cyabë cizongulu ci nkamë silitëlë.

⁷ Yeesu wukaambë bisasi : « Waasyaanu masi mu bidoyi obyo. » Baawu bisë biwaasi tembe-tëtee.

⁸ Tee Yeesu wubëkaambë : « Tekaanu buyifanwabu mwa masi be moomo i nataanu maawu ke fumu-n'saangu. » Baawu bisë vangilë boobo.

⁹ Fumu-n'saangu wutootë masi mëbalukë viinyi. Naandi wusye zaabë ko kunë kufuminë viinyi be yooyo, kasi bisasi bitekë masi bëlizaabë. Naandi wutelooso wo wun'kweelë,

¹⁰ i naandi wun'kaambë : « Bake booso bën'tonaangë kukabë viinyi yi lutwiingu, kumanoofo, mooti bo bëtelu bayitokë kunwa, vandi yakukabulë mëkaambu lutwiingu. Kasi njeeyi, wasweekë viinyi yi lutwiingu tee yi fanwaabu! »

¹¹ Talaanu buni Yeesu kuvangilë ciliimbu cin'tetë mu bimaaku byaandi, ku Kana li Ngalilee. Naandi wuleesi boobo bumpumu bwaandi i bilaanzi byaandi bisë ta maanë mu naandi.

¹² Kwamani ofo, naandi wusë kweendë ku Kapelënawuumë yimunë mamaandi, baanë yaandi bë nguli i bilaanzi byaandi. Baawu bisë kalë tokë mwa bilumbu.

Yeesu mu n'zo-Nzaambi

¹³ N'saangu Sizwiifë wu Paakë wabë wabelëmë, Yeesu wuyendë ku livulë li Yelusaleemë.

¹⁴ Naandi wuye zakënë ku n'zo-Nzaambi, baatu bëlësumbisyaangë singoombi, mëmemë i mëbeembi, yimunë bo bëlëvingësënaangë simboongo bëkalë fë meesë maawu.

¹⁵ Abu kwavaanji lukoti lu misiingë i naandi wubëkulë bakë booso ku n'zo-Nzaambi, yimunë mëmemë maawu i singoombi syaawu. Naandi wutyamunë fë n'toto simboongo syaawu, wukundubulë meesë maawu,

¹⁶ i naandi wukaambë bo bëlësumbisyaangë mëbeembi : « Botulaanu byakë byooso obyo, kucitulaanu ve n'zo Tataami n'zo lungooso. »

¹⁷ Bilaanzi byaandi bisë tebukë moonyi mu mëbuungu më Libuuku : « Luzolo luke yaami mu n'zwaaku, a Nzaambi, lukun'viikë buke mbaasu. »

¹⁸ Kasi bëkuluutu be Sizwiifë bisë n'yufulë : « Cimaaku mbici cyo njeeyi podi kuvaangë mu kutuleesi ti njeeyi ke n'swa mu kusiilë abwe? »

¹⁹ Yeesu wubëvutulilë : « Vongëmënaanu n'zo-Nzaambi, miinu yin'tungooso yaawu fë bilumbu bi tatu. »

²⁰ Bwaawu Sizwiifë bëtubilë: « Mu kutuungë n'zo be yiiyi tuvaangë mëkumë-na mivu samunu. Njeeyi mu bilumbu bi tatu wuyitelikë? »

²¹ Kasi n'zo-Nzaambi yo Yeesu wulëtubilaangë, yabë nyitwaandi.

²² Ntaangu yavyooci, bunë Yeesu wuvulumukë bilaanzi byaandi bisë tebukë moonyi mu manë naandi kutubë, i baawu bëta maanë mu Libuuku li Nzaambi i libuungu lyo Yeesu kutubë.

Yeesu wuzabisi buboti n'timë muutu

²³ Ntaangu yo Yeesu wabë ku Yelusaleemë mu ntonunu n'saangu Paakë, mpaapë baatu bëta maanë mu naandi fanë bëmweenë bimaaku kulëvaangaangë.

²⁴ Kasi Yeesu sye ba yi lufyaatu mu baawu kuve, cibilë naandi wulëzaabaangë bakë booso buboti.

²⁵ Naandi sye zolë kuve bën'lubulë mu mëvaangë maawu cibilë naandi wuzaabë manë mabë mu n'timë muutu.