Za 16 - N’KANGULU WUMOONË

¹ « Miinu yalukambilë boobo, mu kumaangë beeno kulekulë ciminu.

² Mba bëlukulë mu bizutununu. Ntaangu yin'kwisë, banë bëluvoondë bëm'balë ti boobo bwa bufwenikini kusalilë Nzaambi.

³ Baawu bun'siilë obo cibilë bësye zaabë keti Taatë i miinu.

⁴ Kasi yalukambilë boobo, bwiinji ntaangu fanë yin'kwisilë, beeno lun'tebukë moonyi ti miinu yilukaambë lyaawu. » Miinu yisye lukaambë maawu fë ntonunu ko, cibilë yabë yiinu.

Cisalu ci Ciluunzi ci Saantu

⁵ Buyifanwabu miinu yakun'kwendë ke wo wukun'filë, muutu ve mu beeno wukun'yufulë : « Njeeyi kuni wakun'kwendë? »

⁶ Kasi cyuundë cyawaalë mu mitimiinu cibilë miinu yalukambilë obo.

⁷ Mu kumonë, cyelikë yilukaambë : bufwenikini mu beeno miinu yeendë. Licyelikë, ningë yisye kweendë ko, wunë wun'kwisë mu kulunwaninë cikaangë, naandi wusë n'kwisë ke beeno ko. Kasi ningë yibe n'kwendë, miinu yikun'filë.

⁸ Bunë naandi wun'kwisë, wun'leesi ke baatu bë buloongo be buubu mëvaangë maawu mëbi mu cibilë ci lisumu, mu n'sulumunu i mu lufundusu lu Nzaambi.

⁹ Mu linë lin'talë lisumu, lyaawu lin'tubilë abu: baawu bësye kun'teelë maanë kuve,

¹⁰ mu linë lin'talë n'sulumunu, miinu yakun'kwendë ke Taatë i beeno lusë be kum'monë ko.

¹¹ Mu linë lin'talë lufundusu lyaawu lin'tubilë abu : Civadë-mbi ci buloongo be buubu wu mwe fundusu.

¹² « Miinu yikeelyooso mpaapë maambu mu kulukaambë, kasi buyifanwabu, beeno lusë m'podi ko kuba yi mpungë-moonyi.

¹³ Bunë bun'kwiisë Ciluunzi ci cyelikë, naandi wulunatë mu cyelikë cyooso. Naandi wusë n'tubilë mu lizinë lyaandi naveekë ko, kasi wun'tubilë mu makë mooso kuyuwu i wulutendulilë linë lifwenikini kwiisë.

¹⁴ Naandi wun'leesi bumpumu bwaami, cibilë wun'tambulë linë like yaami i naandi wulutendulilë lyaawu.

¹⁵ Byakë byooso bibakisi Taatë byaawu yivaandi byaami miinu. Bwaawu miinu yitubilë ti Ciluunzi cin'tambulë linë like yaami i naandi wulutendulilë. »

Cyuundë cim'balukë liyaanji

¹⁶ « Mu mwa ntaangu beeno lusë bëkum'monooso ko, kasi mu mwa ntaangu, beeno lukum'monë. »

¹⁷ Bilaanzi bimesi bisë tubënë baveekë yi baveekë: « Lya lyoolyo mbi lin'tube? Naandi ke mu kutubë : “Mu mwa ntaangu beeno lusë bëkum'monooso ko, kasi mu mwa ntaangu beeno lukum'monë” i yivaandi : “Mati cibilë yake n'kwendë kuke Taatë”.

¹⁸ Buni bun'tubilë “mwa ntaangu be yooyo” yinë naandi wulë mu kutubë? Beeso tusë n'zikulë ko manë kulë mu kutubë. »

¹⁹ Yeesu wusë bakulë ti baawu bëlëtoombaangë kun'kufulë. Naandi wusë bëkaambë : « Miinu yilukaambë : “Mu mwa ntaangu beeno lusë kum'monë ko, mu mwa ntaangu yivaandi beeno lukum'monë.” Abu, mu lyaambu be lyooli lyaawu lwa kun'kufësënaangë benuveekë i benuveekë?

²⁰ Cibeeni, miinu yilukaambë licyelikë : beeno lun'lilë i lun'kwaambë, faawu ofo baatu buke mu buloongo bëm'ba mu nyeenzi. Beeno lum'ba mu simpasi, kasi simpasi siinu sim'balukë liyaanji.

²¹ Fanë n'cyeetu wum'butilaangë mwaanë, naandi wum'bangaangë mu simpasi cibilë ntaangu simpasi mu naandi yafwaanë. Kasi, mooti mwaanë wabutukë, naandi wun'zimbëkënaangë simpasi syaandi bo wuke mu liyaanji cibilë muutu lu moonyi wabutukë.

²² Bo bumweekë, beeno luke mu simpasi, beeno yiviinu, buyifanwabu, kasi miinu mba yibe lumonë, faawu mitimiinu yim'ba mu nyeenzi i liyaanji liinu, muutu ve wum'podi kulubotulë lyaawu. »

²³ « Bunë cilumbu beenë cin'kwisë, beeno lusë be kun'nyufulë mu cin'velë ko. Licyelikë, licyelikë yilukaambë : Taatë wuluvaanë byakë byooso lukun'loombë mu lizinë lyaami.

²⁴ Tee yi buyifanwabu, beeno lulombisi lin'viipë ko mu lizinë lyaami. Loombaanu, i beeno lun'tambulë, i faawu, liyaanji liinu lim'ba deku-dekoo. »

Yeesu waluungë buloongo

²⁵ « Miinu yilukambilë makë mooso omo mu sisasafë. Ntaangu sin'kwiisë miinu yisë lukambilooso boobo ko, kasi yilutendulilë fë ciyalëlë linë lin'talë Taatë.

²⁶ Cilumbu be cyoocyo, lun'loombë ke Taatë mu lizinë lyaami i miinu yisë lukaambë ko ti yililombilë mu beeno.

²⁷ Licyelikë naveekë Taatë wuluzolisi. Naandi wuzolisi cibilë beeno lube kun'zolë i lun'ta maanë ti miinu yifumë ke Nzaambi.

²⁸ Miinu yifuminë ke Taatë i yiyisë mu buloongo. Buyifanwabu, yakum'botukë mu buloongo i yake n'vutukënë ke Taatë. »

²⁹ Mu bwaawu, bilaanzi byaandi bisë n'kaambë : « Buyifanwabu njeeyi wusë be tubilooso ko mu sisasafë.

³⁰ Buyifanwabu beeso tuzabisi ti njeeyi wun'zaabaangë makë mooso i njeeyi wukeeli ko n'ciinzë mo bëkuyufulë. Mati bwaawu beeso twata maanë ti njeeyi wufuminë ke Nzaambi. »

³¹ Foofë, Yeesu wusë bëvutulilë : « Beeno lwata maanë buyifanwabwe?

³² Ee mweeni, ntaangu yakun'kwisë, i yaawu yatuukë, faawu beeno booso lun'tyamukë, kadë muutu wun'vutukënë ku bwaalë bwaandi i beeno lukum'biikë miveekë. Moniko, miinu yikeeli miveekë ko, cibilë Taatë wuke yaami.

³³ Miinu yalukambilë obo bwiinji beeno lukalilë mu n'sikë mu kukangëmë mu miinu. Beeno lum'monë simpasi mu buloongo. Kasi ciindaanu bitu! Miinu yaluungë buloongo! »