Za 12 - N’KANGULU WUMOONË

Maali wadukulë yaafë mu maalu më Yeesu

¹ Bilumbu bi samunu ntetë n'saangu Paakë kuvangënë, Yeesu wuyendë ku bwaalë bu Betani, ko kulëkalilaangë Lazaalë, wo wabë kuvulumunë mu bo bëfwa.

² Faawu, bën'vaanë bilya ke Malëtë. Lazaalë yivaandi wabë fë meesë yimunë Yeesu.

³ Maali wuboongë cibulikë ci yaafë bukaalu bëvangilë mu naalë. Naandi wudukulë mu maalu më Yeesu i wufyoonë mu mileenjyaandi. N'zo yooso yisë waalë yi fiimbu yi yaafë.

⁴ Cilaanzi cimweekë ci Yeesu, Zuda Iskalyootë — awu wukanë kusumbisi Yeesu — wusë tubë :

⁵ « Cibilë-mbici twakaambu kusumbisilë yaafë be yooyo mu luvunu lu nkamë-tatu lu binkongulu bi mboongo, mu kuvaanë ke biyeembye? »

⁶ Naandi wulëtubilaangë obo yaaku ti mu cyaali ci biyeembi, kasi cibilë naandi wabë mwiifi : naandi wulëkwiibaangë mu kasu mboongu yo kulësweekaangë.

⁷ Kasi Yeesu wusë tubë : « M'biici n'sikë! Naandi wasiilë boobo mu cibilë ci cilumbu cyo bëkun'tuulë mu libuumbë.

⁸ Biyeembi bëm'ba yiinu ntaangu syooso, kasi miinu yisë be ba yiinu ntaangu syakë syooso ko. »

Fuundu bavangilë Lazaalë

⁹ Nkoongë baatu yi Sizwiifë bëyuwu ti Yeesu wabë ku bwaalë bu Betani. Baawu bëyeendë yakë tokë mu kumonë Yeesu, kasi yivaandi Lazaalë, wunë Yeesu wuvulumunë mu bëfwa.

¹⁰ Bëkuluutu bë singangë-Nzaambi bëvaangë fuundu mu kuvoondë yivaandi Lazaalë,

¹¹ cibilë mpaapë Sizwiifë bëlëbotukaangë mu nkoongaawu mu cibilë cyaandi i bëlëtelaangë maanë mu Yeesu.

Yeesu wakun'kotë ku Yelusaleemë

¹² Cilumbu cilandëkënë, nkoongë baatu yiyisë ku n'saangu Paakë bëyuwu ti Yeesu wulë kwiisë ku Yelusaleemë.

¹³ Bakë booso bëboongë sinjeenvu si mëba i bëbasikë ku livulë mu kwe n'dyengënë. Baawu bëlëlosukaangë : « Bumpumu ke Nzaambi! Biikë Nzaambi wusakumunë wunë wun'kwisilë mu lizinë li Fumu! Biikë Nzaambi wusakumunë n'tinu wu Islayeelë! »

¹⁴ Yeesu wusë zakënë buulu i wusë kalë fë yilwaandi, bunë mësonëminë :

¹⁵ « Keelë wulë ba yi boomë, livulë li Siyoonë! N'tinwaaku wulë mu n'kwiisë, wukalë fë yilu mwaanë buulu. »

¹⁶ Bilaanzi bësye bakulë ko manë mëlëvyookaangë, kasi, bunë Yeesu kuzanjiku mu bumpumu, baawu bisë tebukë moonyi bunë mësoniminë mu cibilë cyaandi i baawu bëvaangë maawu mu naandi.

¹⁷ Bakë booso babë yi Yeesu faanë kutelilë Lazaalë mu libuumbë mu kun'vulumunë bëlë ke tubilaangë mu manë bëmonë.

¹⁸ Mati bwaawu, nkoongë baatu bëyisilë mu kun'dyengënë. Baatu bëyuwu ti naandi wuvaangë ciliimbu ci kwaatë-yekë.

¹⁹ Sifalisyaanu bisë tubësënë baveekë yi baveekë : « Lulë mu kumonë ti beeno lusë m'podi ko. Bakë booso bëlë mu kun'laandë! »

Mwa singeleekë silë mu kutoombë Yeesu

²⁰ Mwa singeleekë syabë yimunë bo bëyisë mu kukuundë Nzaambi mu n'saangu ku Yelusaleemë.

²¹ Baawu bisë belëmë fo fabë Filiipë, awu wabë mungë Betesayiidë ku Ngalilee, i keti bën'kaambë : « A Fumu, beeso tuvwiili n'ciinzë mu kumonë Yeesu. »

²² Filiipë wabë wukaambë Andëlee, i babë bwaali bëyeendë mu ke kaambë Yeesu.

²³ Yeesu wusë bëvutulilë : « Zoolë yafwaanë yinë Mwaanë Muutu wufwenikini kuzanjiku mu bumpumu.

²⁴ Licyelikë, licyelikë yilukaambë, ningë lungeenzë lu looso lusye bwa fë n'toto ko i kufwa, lwaawu lun'kalilë lumweekë. Kasi ningë lube fwa, lwaawu lun'vaanë mpaapë singeenzë.

²⁵ Wunë wuzolisi luziingu lwaandi, wulënyambikini, kasi wunë wum'maangë kukangëmë mu buloongo be buubu, naandi wululuundë mu luziingu lu sakë yi sakë.

²⁶ Wunë wuzolisi kun'salilë, naandi wufwenikini kun'daandë, boobo cisasi cyaami cim'ba fo miinu yikeeli. Tataami wun'tuunvi wunë wukun'salilë. »

Yeesu watubilë mu lufwa lwaandi

²⁷ « Buyifanwabu, n'timaami wacyenzëkënë. Miinu buni yin'tubilë? Miinu yin'tubë : Ata, m'puuci mu zoolë be yiiyi yi simpasye? Cibilë ti zoolë be yiiyi yaawu miinu yiyisilë.

²⁸ Ata, vaanë bumpumu mu nkuumbwaaku! » Mbeembu yisë tendukë ku yilu : « Miinu yin'dumisi i miinu yikun'dumisyooso. »

²⁹ Nkoongë baatu yabë faawu yiyuwu mbeembu yitubë : « Lyaawu olyo lyabë liteendë li civelë! » Bëmesë bëlëtubaangë : « Yaanzi yan'kaambë! »

³⁰ Kasi Yeesu wusë bëkaambë : « Yaaku ti mu cibilë cyaami miinu mbeembu be yooyo yakuwukënë, kasi mu beeno.

³¹ Mati bwaawu, ntaangu beenë yafwaanë yo bën'fundisi buloongo be buubu, fumu buloongo be buubu bëkun'laakë ku ngaandë.

³² I miinu, fanë bëkun'zanjikë ku yilu, yin'titë baatu bakë booso ke miinu. »

³³ Yeesu wulëtubilë obo, mu kuleesi mpilë mbici n'fwiilu yo kun'fwiilë.

³⁴ Nkoongë baatu yisë n'vutulilë : « Beeso tuyuwu mu libuuku li nkaakë ti Kliistu wun'ziingë sakë yi sakë. Buni njeeyi podi kutukaambë ti Mwaanë Muutu fwenikini kun'zanjikë? Mwaanë Muutu beenë nanye? »

³⁵ Yeesu wusë bëkaambë : « Cyeseesë citinyooso fë meeyiinu, kasi mu mwa ntaangu kwaandi too. Lyataanu fo lucili yi cyeseesë mu kumaangë beeno kuzimbukulë citoombi, cibilë muutu wun'lyataangë ku citoombi, wusye zaabë ko kuni kulë mu kweendë.

³⁶ Teelaanu maanë mu cyeseesë abu cicili yiinu, bwiinji beeno luba baatu bë cyeseesë. » Bunë kwamani kutubilë obo, Yeesu wusë ke yendaangë i wusë ke swaamë cinaanu yi baawu.

Sizwiifë bësye ta maanë ko mu Yeesu

³⁷ Yeesu wuvaangë mpaapë biliimbu bi kwaatë-yekë fë ntwaalaawu, kasi baawu bësye n'teelë manë kuve.

³⁸ Boobo bwaawu bëvangininë manë mëtubë m'bici Ezayi : « A Fumu, nani wata maanë mu libuungu liitwe? Ke nani Fumu kuleesi bunenë bwaandi? »

³⁹ Ezayi wutubë yivaandi cibilë-mbici baatu obo bëkaambu kuta maanë :

⁴⁰ « Nzaambi wubëvoondë meeso, naandi wubëvaangë mitimë ngolo, bwiinji meeso maawu mëleembu kumonë, mitimaawu yileembu kubakulë, i baawu kupodi ve kubalukë ke miinu bwiinji yibëbelusi. »

⁴¹ Ezayi wutubilë obo cibilë naandi wumonë bumpumu bu Yeesu i keti wulëtubilaangë mu naandi.

⁴² Mu kumonë, fë meeyi bëkuluutu bë Sizwiifë baveekë, mpaapë bëta maanë mu Yeesu. Kasi mu cibilë ci Sifalisyaanu, baawu bësye tubilaangë kuve fë ciyalëlë, mu kumaangë kukulu mu cizutununu.

⁴³ Baawu bëlëzolaangë kutuun'vi ke baatu yaaku ti ke Nzaambi.

Lufundusu mu libuungu li Yeesu

⁴⁴ Yeesu wutubë yi nkasu : « Wunë wun'ta maanë mu miinu, cyelikë yakë tokë mu miinu kun'teelë maanë kasi mu wunë wukun'filë.

⁴⁵ Wunë wakum'monë naandi wam'monë wunë wakun'filë.

⁴⁶ Miinu yiyisë mu buloongo dedë mweekë cyeseesë, bwiinji wosuku wukun'teelë maanë wuleembu kukalë ku citoombi.

⁴⁷ Ningë muutu be kuwu mëbuungu maami i naandi kum'maangë kumësalilë, miinu kuve yikun'vaanë lutabu, cibilë miinu yiyisilë mu kuvuuci mboongë baatu, yaaku ti mu kubëvaanë lutabu.

⁴⁸ Wunë wukun'yekulë i wum'maangë kuwu mëbuungu maami, naandyoowo wum'bakë lutabu: mati libuungu lyo miinu yin'vaanë, lyaawu li kun'vaanë lutabu mu cilumbu ci siitu.

⁴⁹ Licyelikë, miinu yisye tubilë mu n'vwiilwaami miveekë ko, kasi Taatë wukun'filë, naandi wukun'kaambë naveekë manë yifwenikini kutubë i kuloongë.

⁵⁰ Miinu yizabisi: manë kun'tubaangë mën'vaanaangë luziingu lu sakë yi sakë. Faawoofo manë yin'tubaangë, yin'tubilaangë maawu dedë mweekë bo Taatë wukun'kambilë. »