Za 11 - N’KANGULU WUMOONË

Lufwa lu Lazaalë

¹ Libakëlë bëlëteelaangë Lazaalë wabë ncyeenzu. Naandi wulëkalaangë ku Betani, ku bwaalë bulë zingilaangë Maali i mwanaandi nguli Malëtë.

² — Maali wabë n'cyeetu wunë wudukulë yaafë mu maalu më Fumu i wufyoonë maawu mu mileenjyaandi, mwanaandi bakëlë Lazaalë wabë ncyeenzu. —

³ Banë baandi bëcyeetu bë bwaali bëfilë muutu mu ke kaambë Yeesu : « A Fumu, ndikwaaku ncyeenzu. »

⁴ Yeesu abu kwayuwu lyalyooli, naandi wusë tubë : « Ncyeenzu yi Lazaalë yisë kun'natë ku lufwa ko. Yaawu yifwenikini kuleesi lutumu lu bumpumu bu Nzaambi i mu kuleesi yivaandi bumpumu bu Mwaanë Nzaambi. »

⁵ Yeesu wulëzolaangë Malëtë, i mwanaandi nguli Maali yimunë Lazaalë.

⁶ Kosuku, buni kwe zaabi ti Lazaalë ncyeenzu, naandi wuvyosyooso bilumbu byooli fo kwabë.

⁷ Naandi wusë kaambë bilaanzi byaandi: « Tuvutukaanu ku Zudee. »

⁸ Bilaanzi bisë n'vutulilë : « A N'loonji, buyifanu abu, kwa kunë kunaani kwa bëlëtoombë kukuvoondë mu mëmaani, i njeeyi wun'toombooso kuvutukë kwaawu? »

⁹ Yeesu wusë bëkaambë : « Mu cilumbu mu keeli kuumi zoolë wali bwaawu kwe? Ningë muutu bëlyaatë yi muunyi, naandi kupodi ve kube kubë tuuntu cibilë wulë mu kumonë cyeseesë ci buloongo be buubu.

¹⁰ Kasi, mooti muutu be lyaatë yi bwiilu, wun'kubë tuuntu cibilë cyeseesë voo mu naandi. »

¹¹ Abu kwamani kutubë mamoomë, Yeesu wusë bëtubooso: « Ndikwiitu, Lazaalë tolo kwanuukë, kasi miinu fwenikini kweendë mu kun'kotulë. »

¹² Bilaanzi byaandi bisë n'vutulilë : « A Fumu, naandi ningë wunuukë, naandi wun'vuukë. »

¹³ Mu lyaawu, Yeesu wutubilë mu lufwa lu Lazaalë, kasi bilaanzi bëlëbalaangë ti naandi wulëtubilaangë mu cibilë ci tolo.

¹⁴ Yeesu wusë bëkaambooso cyelikë ti : « Lazaalë wafwa.

¹⁵ Miinu mu liyaanji yikeeli cibilë beeno lusye ba kwaawu kuve bwiinji beeno lun'ta maanë mu miinu. Kasi ndokwaanu ke naandi. »

¹⁶ Bwaawu, Toma – bën'teelë ti Cibasë – wusë kaambë bilaanzi bimesi : « Ndokwaanu beeso yiviitu, mu kufwa yimunë naandi! »

Yeesu luvulumuku i luziingu

¹⁷ Yeesu abu kwatuuci, naandi wuyuwu ti Lazaalë ke mu libuumbë fë bilumbu bi na.

¹⁸ Livulë li Betani libelëmë yi Yelusaleemë, fë mitakë tatu.

¹⁹ Mpaapë Sizwiifë siyisë ke Malëtë i Maali mu kubëboondë mu cibilë ci lufwa lu mwaanaawu bakëlë.

²⁰ Bunë Malëtë kwe yuwu ti Yeesu wulëkwisë, naandi wusë kweendë mu kun'dyengënë, kasi Maali wabë wusyaalë ku n'zo.

²¹ Malëtë wusë kaambë Yeesu : « A Fumu, ningë ti njeeyi wabë faafë, nkanë mwanaamë bakëlë wusye fwa ko.

²² Kasi miinu yizabisi ti buyifanwabu Nzaambi wukuvaanë byosuku njeeyi wukun'loombë. »

²³ Yeesu wun'kaambë : « Mwanaaku bakëlë wun'vulumukë mu lufwa. »

²⁴ Malëtë wusë n'vutulilë : « Miinu yizabisi ti naandi wun'vulumukë mu lufwa mu cilumbu ci siitu. »

²⁵ Yeesu wusë n'kaambë : « Miinu luvulumuku i luziingu. Wunë wun'teelë maanë mu miinu, naandi wun'ziingë keti ku lufwa,

²⁶ i wunë wun'ziingë i wun'ta maanë mu miinu, naandi kusë n'fwa ko. Njeeyi wun'ta maanë mu maawu? » –

²⁷ « Cibeeni, a Fumu, miinu yata maanë ti njeeyi Kliistu, Mwaanë Nzaambi, wunë wun'kwisë mu buloongo. »

Yeesu walilë

²⁸ Mu mamoomë, Malëtë wusë ke yendaangë mu ke teli mwanaandi nguli Maali i wun'kaambë mu mbeembu selëlë: « N'loonji ke faafë i naandi wun'toombë wiisë. »

²⁹ Bunë Maali kwayuwu boobo, naandi wusë telëmë i wudumë-ntiinu fë ntwaalë Yeesu.

³⁰ Kosuku Yeesu wabë yibuunu kukotë ku bwaalë, kasi naandi wabë fanë Malëtë kun'dyengëninë.

³¹ Bunë Sizwiifë babë yi Maali ku n'zo mu kum'boondë, bëm'moonë kutelëmë i kubasikë mu ntiinu, baawu bisë kun'laandë. Baawu bëlëbalaangë ti naandi wakwendë ku bizyaami mu kwe lili.

³² Maali wusë ke tuukë fo fabë Yeesu, abu kwe m'moni, naandi wusë ke bwa fë maalu maandi, i wutubë : « A Fumu, njeeyi ti wabë faafa nkanë mwanaamë nguli sye fwa ko. »

³³ Yeesu abu kwamoni ti naandi wulëlilaangë, i banë bëyisë yaandi, naandi wusë ba mu cyuundë cinenë i wukaambu n'sikë.

³⁴ Naandi wubëyufulë: « Kuni beeno lwan'tuulë? » Baawu bisë n'vutulilë : « A Fumu, yisë, bwiinji wumonë. »

³⁵ Yeesu wulilë.

³⁶ Sizwiifë bëtubooso : « Monaanu buni naandi wulën'zolilaangë. »

³⁷ Kasi bën'viipë mu baawu bëtubë : « Naandi wo wabelusi meeso më mpofo, buni kun'kaambu kuvangilë lin'viipë bwiinji Lazaalë wuleembu kufwa? »

Lazaalë wavulumukë

³⁸ Yeesu, wabooso mu cyuundë cinenë, wuyendë ku bizyaami. Yaawu yabë mpwiiti bëfukë mu limanyi linenë.

³⁹ Yeesu wusë tubë : « Botulaanu limanyi. » Malëtë, mwaanë n'cyeetu wu wo wafwa, wusë tubë : « A Fumu, naandi wake m'basikë n'nuuku cibilë wufwilaangë yeekë bilumbu bi na. »

⁴⁰ Yeesu wusë n'vutulilë : « Miinu yisye kukaambë kwe? Ningë njeeyi bëta lyaanë wum'monë bumpumu bu Nzaambi. »

⁴¹ Baawu bisë botulë limanyi, Yeesu wusë vum'bulë ntaalu i wusë tubë : « Ata, miinu yakutoondë, cibilë njeeyi wakun'yuwulu.

⁴² Miinu yizabisi ti njeeyi wukun'yuwulwaangë ntaangu syakë syooso, kasi yin'tubilë obo mu cibilë ci baatu bo bakun'zukë, bwiinji baawu bëta maanë ti njeeyi wukun'filë. »

⁴³ Bo kwamani kutubë, naandi wusë kulosukë: « A Lazaalë, basikë oko! »

⁴⁴ Muutu wabë wufwa wusë basikë, maalu i myooko bikangëmë mu biteendë i ciinyi bëfuukë mu lilasoolë. Yeesu wusë tubë : « N'kutulyaanu i m'bicyaanu kweendë. »

Fuundu basiilë mu Yeesu

⁴⁵ Mpaapë Sizwiifë, mu banë bëyisë ke Maali i bëmonë manë Yeesu kuvaangë, bisë ta maanë mu naandi.

⁴⁶ Kasi bëmesë mu baawu bëyetakënë Sifalisyaanu i bisë bëkaambë manë Yeesu kuvaangë.

⁴⁷ Bëkuluutu bë singangë-Nzaambi i Sifalisyaanu bisë kotë fuundu mu kuvaangë lukoongu yimunë mikwa-lwaangu i bisë tubë : « Buni twakun'silaanwe? Cibilë muutu owo wulë mu kuvaangë mpaapë bimaaku!

⁴⁸ Ningë beeso tube m'biikë kuvangilë obo, bakë booso bëkun'teelë maanë, faawoofo, mikwa-lwaangu yi Loomë bën'kwisë mu kutyamunë n'zo-Nzaambi i siyiitu! »

⁴⁹ Wumweekë mu baawu bën'teelë Kayiifë, awu wabë n'kuluutu singangë-Nzaambi mu n'vu be woowo, naandi wubëkaambë : « Beeno lusë m'bakulë lin'viipë kwe!

⁵⁰ Beeno lusye zaabë ko ti n'ciinzë mu beeno mu muutu mweekë kufwa mu cibilë ci baatu bakë booso i mu kuleembu kuvakulë si yakë yooswe? »

⁵¹ Kosuku, yaaku ti mu naveekë kuve naandi wulëtubilaangë, kasi bunë naandi kwabë n'kuluutu singangë-Nzaambi mu n'vu be woowo, naandi wubikulë ti, Yeesu wun'fwiilë mu cibilë ci Sizwiifë,

⁵² i yakë tokë mu si be yiiyi, kasi yivaandi mu kukucikë mu nyitu mweekë baanë bë Nzaambi booso bëtyamukë mu buloongo n'viipë.

⁵³ Kutoonë cilumbu be cyoocyo, mikwa-lwaangu Sizwiifë bisë boongë lukanyu mu kuvoondë Yeesu.

⁵⁴ Mu bwaawu, Yeesu wusë siitë mu kube lyaatë fë ciyalëlë fë meeyi Sizwiifë. Kasi naandi wuyendë ku libweeti lin'ka mu ntaandu ciyumi ku bwaalë bën'telaangë Efalayiimë, kwaawu kuye kalë yimunë bilaanzi byaandi.

⁵⁵ N'saangu Sizwiifë wu Paakë wabë wabelëmë, mpaapë baatu bëyeendë ku Yelusaleemë mu kulyomisi sinyitu syaawu ntetë n'saangu kutoonë.

⁵⁶ Baawu bëlëtoombaangë Yeesu, i baawu babë mu n'zo-Nzaambi baawu bëlëkufusënaangë baveekë yi baveekë: « Beeno buni lum'balilë? Naandi wun'kwisë ku n'saangu voo moniko? »

⁵⁷ Bëkuluutu singangë-Nzaambi i Sifalisyaanu bëvaanë n'swa ti wunë wun'zaabë fanë kukeeli, naandi wufwenikini kubëkaambë bwiinji bën'kaangë.