Za 10 - N’KANGULU WUMOONË

Sasafë n'luungë mëmemë

¹ Licyelikë, licyelikë yilukaambë : « Wunë wun'kaambu kukotilë fë livitu li civakë ci mëmemë, kasi wunë wun'yaangë cibakë mu kukukotë ku n'zo, naandyoowo mwiifi, cituutë.

² Kasi wunë wun'kotilë fë livitu li n'zo, naandyoowo n'luungë mëmemë.

³ Mu lyaawu olyo, waaci wukun'zibulilë livitu i mëmemë bën'kuwu mbeembwaandi. N'luungë mëmemë wun'telë kadë limemë mu lizinë lyaandi i kumënatë ku ngaandë.

⁴ Bunë kumëbasi makë mooso ku ngaandë, naandi wun'lyaatë fë ntwaalë i mëmemë mooso më kun'laandë cibilë maawu mëzabisi mbeembwaandi.

⁵ Kasi maawu kupodi ve kulaandë wo bëkaambusu kuzaabë, tiilyoko, maawu mën'tiinë cinaanu yi naandi cibilë maawu mësye zaabë mbeembwaandi ko. »

⁶ Yeesu wusë bëkaambë sasafë be yooyi, kasi baawu bësye bakulë kuve suundu mu manë kulëtubaangë.

Yeesu : n'luungë wumboti

⁷ Yeesu wutubooso : « Licyelikë, licyelikë yilukaambë : Miinu livitu li n'zo civaku ci mëmemë.

⁸ Bakë booso banë bëyisë ntetë yi miinu miifi, bituutë. Kasi mëmemë mësye bëkuwulu ko.

⁹ Miinu livitu li n'zo. Wunë wun'kotë wun'vyokilë fëke miinu, naandi wun'vuukë. Naandi wun'kotë i wum'basikë, i wum'bakë ndiiwaandi.

¹⁰ Mwiifi wun'kwisilë tokë mu kwiibë, kuvoondë i kutyamunë. Kasi miinu yiyisilë bwiinji baatu bëbakë luziingu luke lunduu.

¹¹ Miinu n'luungë wumboti. N'luungë wumboti wubelëminë mu kuvaanë luziingu lwaandi mu cibilë ci mëmemë maandi.

¹² Wunë wun'salilaangë tokë mu cibilë ci mboongo, naandyoowo wukeeli ko n'luungë wumboti, mëmemë mëkeeli maandi ko. Fanë cikuumbu cin'kwisilë, naandi wun'lekulë mëmemë i wun'tiinë. Cikuumbu cim'bwiilë mëmemë i cin'tyamunë n'kaangu wooso.

¹³ Tala manë mën'kwisë cibilë muutu be woowo wun'salilaangë tokë mu mboongo i naandi lusweenu voo mu mëmemë.

¹⁴ Miinu n'luungë wumboti. Miinu yizabisi mëmemë maami i maawu mën'zabisi,

¹⁵ bo bumweekë Taatë wukun'zabisi i miinu yizabisi Taatë. Miinu yin'vaanë luziingu lwaami mu cibilë ci mëmemë maami.

¹⁶ Miinu yikeelyooso yi mëmemë mën'ka mëkaambusu mu civakë be ciici. Miinu yifwenikini kumënatë yivaandi, maawu mën'kuwu mbeembwaami i maawu mëm'ba n'kaangu mweekë yimunë n'luungë.

¹⁷ Taatë wukun'zolisi cibilë yivaanë luziingu lwaami, bwiinji yilubakooso.

¹⁸ Muutu ve wum'podi kum'pokënë luziingu, kasi miinu yi luvaanë mu n'vwiilwaamë. Miinu yike lutumu mu kuvaanë luziingu i mu kube luboongooso. Lya lyoolyo libe fwanëkënë mu n'swa wo Taatë kum'paanë. »

¹⁹ Sizwiifë bisë kabukooso mu cibilë ci mëbuungu mëtubë Yeesu.

²⁰ Mpaapë mu baawu bëlëtubaangë : « Naandi wavwaatu ke ciluunzi cibi! Naandi walawukë! Mu mbici luke n'yuwulwaangë? »

²¹ Bën'ka bëlëtubaangë : « Muutu wuvwaatu ke ciluunzi cibi kupodi ve kutubilë obo. Ciluunzi cibi kupodi kuzibulë meeso më mpofo? »

Yeesu bën'nyeengulë

²² Yabë mu ntaangu cyoosi cingolo i bëlëvaangë n'saangu ludumbulu lu n'zo-Nzaambi ku Yelusaleemë.

²³ Yeesu wulëkwendë wulëkwisë mu n'zo-Nzaambi, ku si beedi yi Salomoonë.

²⁴ Sizwiifë bisë n'zuukë i kun'kaambë : « Tee ntaangu mbici njeeyi wutubiikë kukaalë mu libobo? Ningë njeeyi Kliistu tukaambi bwiinji tuzaabë cyelikë. »

²⁵ Yeesu wusë bëvutulilë : « Miinu yilukaambë lyaawu kasi beeno lusye kun'teelë maanë ko. Mëvaangë mo yilë mu kusalilë mu lizinë li Tataami mëlë mu kun'teelë cimbaanji.

²⁶ Kasi beeno lusë kun'teelë maanë ko cibilë lukeeli mu nkaangë mëmemë maami ko.

²⁷ Mëmemë maami mu n'kuwaangë mbeembwaami, miinu yimëzabisi i maawu mëlë mu ke kun'laandaangë.

²⁸ Miinu yibëvaanë luziingu lu sakë yi sakë, maawu kupodi ve kuzimbilë i muutu ve wumëvokënë mu myookwaamë.

²⁹ Linë Tataami wukum'paanë mwiinji bunenë yi byakë byooso i muutu ve wum'podi kubotulë cin'velë mu kooko ku Tataami.

³⁰ Taatë i miinu, muutu mweekë tukeeli. »

³¹ Sizwiifë bisë bënoongooso mëmanyi mu kun'laakë.

³² Yeesu wusë bëkaambë : « Miinu yaluleesi mpaapë mëvaangë mëboti mëfuminë ke Taatë. Mu lyaambu mbici beeno lun'toombë kum'pondilë mu mëmanyi? »

³³ Sizwiifë bisë n'vutulilë : « Yaaku mu livaangë liboti lyo wavaangë lyaawu tun'toombë kukuvoondilë mu mëmanyi, kasi cibilë njeeyi wulë mu ke safulaangë Nzaambi : njeeyi muutu wukeeli i wun'toombë kuba Nzaambi! »

³⁴ Yeesu wusë vutulë : « Bësonikë mu n'kaakiinu ti Nzaambi wutubë : “Beeno sinzaambi lukeeli.”

³⁵ Beeso tuzabisi ti beeso kupodi ve kubotulë manë mën'sisiminë Libuungu. Tiilyoko, Nzaambi wuteelë sinzaambi banë naandi kukaambë libuungu.

³⁶ Miinu, Taatë wukun'soolë i wukun'filë mu buloongo. Kwisilë buni beeno kutubë ti miinu yafiingë Nzaambi cibilë bo yatubë ti “Miinu Mwaanë Nzaambi”?

³⁷ Ningë miinu yisye vaangë ko mëvaangë më Tataami, keelaanu lukun'teelë maanë.

³⁸ Kasi ningë miinu yilë mu kumëvaangë, keti lulëkaambu kun'teelë maanë, telaanu maanë keti mu mëvaangë be moomo, bwiinji luzaabë mu vyaasi mweekë ti Taatë wun'zingilë mu miinu i miinu mu naandi. »

³⁹ Baawu bëtoombooso mu kukaangë, kasi naandi wubëkumbë.

⁴⁰ Yeesu wuyendooso ku lisimu limesi li mwiilë, li Yulëdaanë, kunë Za wabë wubatizyaalë ntetë baatu, i naandi wusë kukalë kwaawu.

⁴¹ Mpaapë baatu bëyisë ke naandi. Baawu bëlëtubaangë : « Za wusye vaangë ko cyosuku ciliimbu ci kwaatë-yekë, kasi makë mooso kutubë mu muutu awu mabë mëcyelikë. »

⁴² Faawu mpaapë baatu bëta maanë mu Yeesu.