Za 1 - N’KANGULU WUMOONË

Libuungu li luziingu

¹ Fë ntonunu fabë Libuungu i Libuungu lyabë yimunë Nzaambi i lyaawu lyabë Nzaambi.

² Lyaawu lyabë yimunë Nzaambi fë ntonunu.

³ Nzaambi wuvaangë byakë byooso mu lyaawu. Cin'velë ve cikaambu kuvangëninë mu lyaawu.

⁴ Cinë civangunu cyabë luziingu mu lyaawu. Luziingu be loolo lwabë cyeseesë ci baatu.

⁵ Cyeseesë cilesikë ku citoombi, kasi citoombi cisye n'tambulë ko.

⁶ Nzaambi wufilë cipayi cyaandi, muutu bën'teelë Za.

⁷ Naandi wuyisë dedë mweekë mbaanji yi cyeseesë, mu kuleesi cimbaanji ci cyeseesë, bwiinji bakë booso bëta maanë mu naandi.

⁸ Naandi wusye ba cyeseesë ko, kasi wabë mbaanji yi cyeseesë.

⁹ Libuungu lyabë cyeseesë cicyelikë, ciyisë mu buloongo i cin'cyenisi baatu bakë booso.

¹⁰ Libuungu lyabë mu buloongo. Nzaambi wuvaangë buloongo mu lyaawu, kasi buloongo busye m'bakulë ko.

¹¹ Naandi wuyisë mu si yaandi, kasi mboongwaandi sye n'tambulë ko.

¹² Kasi, bakë booso bëtambulë lyaawu, bëta maanë mu lizinë lyaandi yi wusë bëvaanë n'swa wu kubeelë baanë bë Nzaambi.

¹³ Baawu bëkeeli ko baanë bëbutukë mu meengë, kaambofo yaaku mu n'vwiilu n'sunyi, kasi bëfuminë ke Nzaambi.

¹⁴ Libuungu lyacitukë n'sunyi i lyaawu lizingilë fë meeyiitu, beeso tumonë bumpumu bwaandi, bumpumu bu Mwanaandi viingu ke Taatë, lyaawu liwaalë muulë i bucyelikë.

¹⁵ Za wun'teelë cimbaanji, wulosukë : « Mu naandi mwa yitubilë ti, wo wun'kwisë ku mbusaami, mwiinji n'ciinzë cibilë naandi wabë ntetë yi miinu. »

¹⁶ Besubooso tutambulë cikuuku mu businë bwaandi bunenë, muulë fë yilu muulë.

¹⁷ Nzaambi wutuvaanë n'kaakë ke Moyiizë, kasi muulë i cyelikë byakwisilë mu Yeesu Kliistu.

¹⁸ Muutu ve wumonë Nzaambi. Kasi Mwanaandi viingu, wunë wuke Nzaambi i wun'zingilaangë fë likumë li Taatë, wo naandi vwiili wun'zabikini.

Cimbaanji ci Za-Batiisë

¹⁹ Tala cimbaanji civaanë Za bunë mikwa-lwaangu Sizwiifë si Yelusaleemë bëfilë singangë-Nzaambi i sileviitë mu kun'yufulë : « Njeeyi nani wukeelye? »

²⁰ Naandi wusye maangë ko mu kuvutulë cyuufu, kasi naandi wuviisi fë ciyalëlë fë ntwaalë bakë booso : « Miinu yikeeli Kliistu ko. »

²¹ Baawu bisë kun'yufulë : « Njeeyi nani wukeelye? Njeeyi Eli? » Za wuvutulë : « Miinu ko. » Oboobo, baawu bisë bweelooso kun'kufulë : « Njeeyi M'bicye? » Za wuvutulë : « Miinu ko. »

²² Mu lyaawu, baawu bisë n'kaambë : « Njeeyi nani wukeelye? Cibilë beeso tufwenikini ke vutulë mbeembu ke bo batutumë. Njeeyi mbici wake n'tubë mu njeveekë? »

²³ Za wubëvutulë mbeembu mu maambu mu Ezayi m'bici : « Miinu, mati mbeembu yilë mu kutendukë mu ntaandu ciyumi : “Beeno lufwenikini kusunjikë nzilë yi Fumu!” »

²⁴ Mu bipayi bëfilë ke Za, mwabë Sifalisyaanu,

²⁵ baawu bisë n'yufulooso : « Ningë njeeyi wukeeli Kliistu ko, keti Eli, kaambofo M'bici, cibilë-mbici wulë mu kubatizyaalë? »

²⁶ Za wusë vutulë : « Miinu yilë mu kulëbatizyaalë mu masi, kasi fë meeyiinu fëke wun'viipë wo beeno lukaambusu kuzaabë.

²⁷ Naandi wun'kwisë ku mbusaami, kasi miinu yisye fwanëkënë ko mu kukutulë misiingë sisapaatu syaandi. »

²⁸ Makë mooso omo mëlëvyokilaangë ku Betani lisimu li mwiilë wu Yulëdaanu, kwaawu kwa Za wulëbatizyalaangë.

Yeesu, mwaanë limemë li Nzaambi

²⁹ Cilumbu cilandëkënë, Za wutalilë Yeesu wulëkwisë ke naandi, i wutubë : « Talaanu mwaanë limemë li Nzaambi lim'botulaangë lisumu li baatu booso.

³⁰ Mu naandi, mwaawu yitubilë : “Muutu wun'kwisë ku mbusaami, mwiinji bunaangë yi miinu. Mu cibilë ocyo, naandi wabë ntetë yi miinu kubutu.”

³¹ Miinu sye zaabaangë kuve nani kukeeli, kasi yiyisë mu kubatizyaalë baatu mu masi i mu kun'zabikini ke mboongu baatu yi Islayeelë. »

³² Za wusë tubooso: « Miinu yamonë Ciluunzi ci Nzaambi cyafuminë ku yilu, cyaawu cyakulumukë dedë mweekë libeembi i cyabeetë fë yilwaandi.

³³ Miinu yisye n'zaabaangë ko nani kukeeli, kasi Nzaambi, wukun'filë mu kubatizyaalë baatu mu masi, naandi wukun'kaambë : “Njeeyi wum'monë Ciluunzi cin'kulumukë i cim'beetë mu muutu. Naandyoowo na wum'batizyaalë baatu mu Ciluunzi ci Saantu.”

³⁴ Miinu yamonë lyaliili, bwatubë Za i miinu yilë mu kuviisi ti muutu awu wuli Mwaanë Nzaambi. »

Bilaanzi bin'tetë bi Yeesu

³⁵ Cilumbu cilandëkënë, Za wabë yivaandi faawu yimunë bilaanzi byaandi byooli.

³⁶ Bunë kumonë Yeesu wulëvyookë, naandi wusë tubë : « Talaanu mwaanë limemë li Nzaambi! »

³⁷ Bilaanzi bi byooli bi Za, bëyuwu mëbuungu be moomo i bisë kulaandë Yeesu.

³⁸ Yeesu wusë balukë, kumonë ti baawu bëlë ke n'laandaangë i wusë bëyufulë : « Beeno, mbici luke toombaangë? » Baawu bisë kun'vutulilë : « Njeeyi kuni wun'kalilaangë, A Labi? » — Labi dedë muutu wun'tubë: N'loonji. —

³⁹ Yeesu wubëkaambë: « Yisaanu i monaanu. » Baawu bisë kweendë i kumonë fo naandi wulë kalilaangë. Baawu bëkalë yaandi fë cimweekë cilumbu be cyoocyo, tee fë zoolë na yi bukulu-bwiisi.

⁴⁰ Wumweekë mu bilaanzi bi byooli wunë wuyuwu mëbuungu më Za i wulaandë Yeesu, wabë Andëlee nkoombë Simu li Pyeelë.

⁴¹ Muutu wun'tetë wunë Andëlee kudyengënë wabë mwanaandi nguli Simu, naandi wukun'kaambë: « Beeso twamonë Mësiya. » – Nkuumbu be yooyo yin'tubë ti « Kliistu ». –

⁴² Naandi wunatë Simu ke Yeesu. Yeesu kun'talë i wusë tubë : « Njeeyi Simu mwaanë Za. Mba bëkuteelë Sefaasë. » – Lizinë be lyooli lin'tubë « Pyeelë ». –

Filiipë i Natanayeelë

⁴³ Cilumbu cilandëkënë, Yeesu wuyendë ku Ngalilee. Naandi wudyengënë Filiipë keti wukun'kaambë : « N'daandi! »

⁴⁴ – Filiipë wabë muutu wu Betesayiidë, libweeti li Andëlee i Pyeelë –

⁴⁵ Fë mbusë, Filiipë wudyengënë Natanayeelë i wusë n'kaambë : « Beeso twamonë muutu wo Moyiizë wutubilë mu Mikaakë i mibici yivaandi bëtubilë: Yeesu naandi mwaanë Zozeefë wu libweeti li Nazaleetë. »

⁴⁶ Natanayeelë wusë n'kaambë : « Ku Nazaleetë kupodi kubasikilë lyaambu libotye? » Filiipë wuvutulë : « Yisë i ndjeeyi wum'monë. »

⁴⁷ Yeesu abu kwamoni Natanayeelë wulëkwisë ke naandi, wutubë mu cibilë cyaandi : « Talaanu, muutu wucyelikë ku Islayeelë. Mu naandi lyaambu li lupuutu voo. »

⁴⁸ Natanayeelë wuyufulë Yeesu : « Njeeyi buni be kun'zabilë? » Yeesu kun'vutulilë : « Ntetë Filiipë kukutelë, miinu yikumonë ntaangu wabë fë sinë n'ti n'ngengë. »

⁴⁹ Faawu, Natanayeelë wusë tubë : « A Labi, njeeyi mati Mwaanë Nzaambi! Njeeyi yivaandi Fumu Islayeelë! »

⁵⁰ Yeesu wusë n'vutulilë : « Bwaawu njeeyi wakun'telë maanë cibilë miinu yakukaambë yikumonë wukalë fë sinë n'ti n'ngengë. Njeeyi wum'monë mpaapë maambu kuvyokilë maawu ama. »

⁵¹ Naandi wusë bweelooso: « Licyelikë miinu yilukaambë : beeno lum'monë liyilu lin'zibukë, siyaanzi sim'makë, sin'tuukë fë yilu Mwaanë muutu. »