Tiitë 3 - N’KANGULU WUMOONË

Nzingulu bitamaanë

¹ Tebulë moonyi ke bitamaanë mu kulenvukilë bëkuluutu i mikwa-lwaangu, baawu bëfwenikini kubëyuwulu i kubëbelëmë mu kuvaangë lyosuku lyaambu liboti.

² Keelë baawu kutubilë libi mu muutu, bëfwenikini kuba baatu bë n'sikë i bën'leesi mëboti, kukalilë ntaangu syakë syooso mu mëleembë ke baatu bakë booso.

³ Cibilë besuviitu mu ntaangu ntamë twabë bivulikini, bivadë-mbi i twabë tuvitu. Beeso twabë bëndongo mu yosuku mpilë bideenzë i binvweenvu. Beeso tulëzingilaangë mu bubaalu i mu bideenzë, baatu bisë tubaayi i beeso tusë lendësënë yivaandi besuveekë yi besuveekë.

⁴ Kasi fanë Nzaambi N'vuuciitu wuleesi buboti bwaandi i luzolo lwaandi mu baatu lu moonyi,

⁵ naandi, wutuvuuci, yaaku ti mu mëvaangë mësulëmë tuvangisi, vandi kasi wutufwiili cyaali. Naandi watuvuuci i watuvaanë lubutu lumoonë i luziingu lumoonë mu mëkanë më Ciluunzi ci Saantu.

⁶ Cibilë Nzaambi wudukulë yinë lunduu mu beeso Ciluunzi ci Saantu mu N'vuuciitu Yeesu Kliistu.

⁷ Mu lyaawu, mu muulaandi, naandi watuvangisi baatu bësulëmë fë ntwaalaandi i watuvangisi kwaakë luziingu lu sakë yi sakë lunë beeso twatuulë civuufu.

⁸ Maambu ama mëcyelikë. Miinu yin'toombë ti wusisiminë maawu, bwiinji banë bata maanë mu Nzaambi bëfyaatë mu mëvaangë mëboti. Mamoomë maambu mëboti i më njiinji mu baatu.

⁹ Kasi yakënë mu twambulu tu bulalawu i mu ntubulu yi yekësë-yekësë mu mitaandë yikulë yi mëzinë më sinkaakë, twambulu i kufindënë mpakë mu manë mën'talë n'kaakë. Maawu mëkeeli maambu kwaandi vwiili i mëkaambu nteendu.

¹⁰ Vaanë lubikunyu lun'tetë i lumwaali, ke wunë wun'tuulë butaandu, kumanoofo, kun'yakini.

¹¹ Njeeyi wuzabisi ti, mpilë muutu owo wakwakënë mu nzilë yisulëmë i bunë kun'tatëminë mu lisumu, naveekë wuyivakulë.

Mëloonji më siitu

¹² Fanë yi kufililë cilesi cibakëlë Aletëmaasë, kaambofo Tisiikë, vaangë mëngolo mu kwiisë mu kukun'zakënë ku Nikopoliisë, cibilë kwaawu yin'tiisi kuvyosilë cisifu.

¹³ Vaangë buumë mu kuzudi Zenaasë nzoonzi i Apoloosë, mu kulandilë mweendwaawu. Vaangë buumë mu kumaangë baawu kukaambu cyosuku.

¹⁴ Mu boobo, bufwenikini, baatu biitu bësinu mu kuyivaanë mu mëvaangë mëboti, bwiinji bëzudi banë bëke beenë mu n'ciinzë i kunatë luziingu lukaambu nyungulë.

¹⁵ Bakë booso bëke yaami bakufilë sibweekë. Bilë bayiitu mu ciminu. Muulë Nzaambi we ba yiinu benubooso.