Tiitë 2 - N’KANGULU WUMOONË

Liloonji lisulëmë

¹ Kasi njeeyi, loongë manë mëfwenikini mu liloonji lisulëmë.

² Kaambë binunu bëkalilë mu lukelulu, bëyicinzikë, bëba yi mbali, bëciimbë moonyi mu ciminu ci cyelikë, bëba yi luzolo i mpungë-moonyi.

³ Bo bumweekë, kaambë bëcyeetu bëvyokililë mpuungë mu kuzingilë dedë mweekë baatu bën'zingilë luziingu lusulëmë. Baawu bëyakënë mu sin'tubulë simbi i bëleembu kuba binwa-mëlafu. Baawu bëfwenikini kuvaanë sindoonji simboti.

⁴ Baawu bëloongë bilesi bicyeetu, mu kuzolë bënuni i baanë baawu,

⁵ mu kuba mëlubu i bulyoomi, bëkeelë mëziku maawu, mu kusalilë buboti mu sinzo syaawu i bëba buleenvo mu bënuni baawu, bwiinji muutu ve wun'safulë libuungu li Nzaambi.

⁶ Bo bumweekë, ciinzi bilesi bi bakëlë bëba yi mëlubu

⁷ mu makë mooso. We leesi njeveekë cifwaani ci mëvaangë mëboti. Liloonji lyaaku, liba li njiinji i li cinzëmë.

⁸ Mëbuungu maaku mëba mësulëmë, mëbalulë ve, bwiinji simbeenyi syaaku bëfwa sonyi i mu kuleembu kutubë simbi mu beeso.

⁹ Bufwenikini bëndongo kuba buleenvo kuke sifumu syaawu mu makë mooso, baawu bëm'monikë buboti fë ntwalaawu i baawu bëleembu kufindënë yaawu mpakë,

¹⁰ kaambofo, kubëkwiibë cyosuku ciimë. Baawu bëfwenikini kuleesi ntaangu syooso ciminu cyaawu ci cyelikë i mëboti maawu, bwiinji bëzanjikë mu makë mooso liloonji li Nzaambi N'vuuciitu.

¹¹ Cibilë Nzaambi wuleesi muulaandi, sinë luvukulu mu baatu bakë booso.

¹² Lyaawu li tuloongë mu kubiikë sinyendulu simbi i bideenzë bi n'toto. Mu kuzingilë mu buloongo be buubu luziingu lu mbali, lusulëmë i lukangëmë mu Nzaambi.

¹³ Mu bwa boobo, tufwenikini kuciingë sinyeenzi syo twatulilë civuufu, mu cilumbu cin'selukulë bumpumu bu N'kwa-Nzaambi i N'vuuciitu Yeesu Kliistu.

¹⁴ Naandi wuyivakulë naveekë mu besubooso, mu kutuvuuci mu mëbi mooso. Kutuvangisi kuba mboongu yi lyoomë yinë kubakisi i yike buvavambë mu mëvaangë mëboti.

¹⁵ Tala, manë njeeyi wufwenikini kuloongë, yi lutumu lwaaku looso, mu kuciinzi bitu ke banë bëkuyuwulu, kaambofo, mu kubëvaanë mëseembu. Kebë wulëbiikë wosuku muutu mu kukuleenji.