Tiitë 1 - N’KANGULU WUMOONË

Sibweekë

¹ Poolë, ciseelu ci Nzaambi i M'bunzi, wu Yeesu Kliistu. Miinu yifilu, mu kunatë mu nzilë yi ciminu bo Nzaambi kusoolë i mu kubëzabikini cyelikë cifwenikini mu ciminu ci bitamaanë,

² bwiinji baawu bëbakë civuufu mu luziingu lu sakë yi sakë. Nzaambi wun'kaambu kupuutaangë, wutukanyi luziingu be loolo ntetë buloongo kuvangënë.

³ Mu ntaangu yifwanëkënë, naandi wusë kuyizabikini mu libuungu lyaandi, mu mpolu yo bëkum'paanë i miinu yilë mu kutendulë mu n'swa Nzaambi N'vuuciitu.

⁴ Miinu yakufilë n'kaandë be wuuwu njeeyi Tiitë, mwanaami wu cibeeni mu ciminu ci cintwaali. Biikë Taatë Nzaambi i Kliistu Yeesu N'vuuciitu, bëkuvaanë muulë i n'sikë.

Cisalu ci Tiitë ku livulë li Keleetë

⁵ Miinu yi kubiikë ku livulë li Keleetë, bwiinji wumanisi kululikë linë lifwenikinyooso i mu kubyaasi bëkuluutu bë libuundu mu kadë livulë. Tebukë moonyi mu mëloonji mo yikuvaanë.

⁶ N'kuluutu bëfwaanë kukalilë mu luziingu lusulëmë, n'nunyi wu n'kasi mweekë, bufwenikini baanë baandi kuba bitamaanë i baatu kubëfuundë ve mu ndyatulu yimbi, kaambofo yi bumaangu.

⁷ Bwaawu, n'kuluutu libuundu wo wun'salë bisalu bi Nzaambi, wusye fwanëkënë ko kuseembu. Naandi sye fwanëkënë ko kuba yi lunaangu, yi mëdasu, cinwa-mëlafu, bubaalu i wun'kaambu kutoombaangë simboongo mu mëyoombo.

⁸ Naandi wufwenikini kuba yi bwalëkisi, kuzolë maambu mëboti. Naandi wufwenikini kuba yi mbali, wusulëmë, wulyoomë i wun'cinzikë nyitwaandi.

⁹ Naandi fwenikini beenë kutatëminë mu mpolu ciminu, dedë mweekë mëloonji bëtambulë. Boobo, naandi wum'bakë n'fiku mu kuciinzi bëmesë mu ndongolo yi cyelikë i wufwenikini kuleesi ke banë bëmaangë ndongolwaandi ti, liloonji lyaawu libi.

¹⁰ Bwaawu, mpaapë baatu, yiveko mu banë bëke Sizwiifë, bëm'maangë kuvitikë libuungu i bëke mpuutaangë bayaawu mu ke tubaangë mo mëkaambusu kufwaanë.

¹¹ Bufwenikini kubëzibikë munu, cibilë baawu bëlë mu kutyamunë mëkaandë makë mooso mu ke bëloongaangë liloonji libi i mu kubakë simboongo mu mëyoombo.

¹² Wumweekë mu baawu, m'bici, wusë tubë : « Basë Keleetë bibutu-maambu, bibulu bi bubaalu, myoolo i milyaafu. »

¹³ Mo kun'tubë ofo maawu mëcyelikë. Bwaawu, bëseembi yi nkasu yooso, bwiinji bëba yi ciminu cisulëmë

¹⁴ i baawu bëleembu kube kangëmë mu mizisi yi Sizwiifë i mu mikaakë yi baatu bo bëmaangë cyelikë.

¹⁵ Byakë byooso bilyoomë mu bo bëlyoomë, kasi cin'velë ve cilyoomë mu bo bëkaambu kulyoomë i kuta maanë, cibilë mëlyeelë maawu i simbalulu syaawu sikaambu kulyoomë.

¹⁶ Baawu bën'sisiminë ti bëzabisi Nzaambi, kasi mëvaangë maawu mën'leesi ti baawu bësye zaabë Nzaambi ko. Baawu bëleendu, bivadë-mbi i bisë m'podi ko kuvaangë mëboti.