Ngalaatë 6 - N’KANGULU WUMOONË

Zudësënaanu benuveekë yi benuveekë

¹ Baanë yaami bë nguli, ningë wun'viipë wabwitëmë mu libi, beeno luke Ciluunzi ci Nzaambi, lufwenikini kun'sulikilë, kasi lesyaanu mëleembë fëke naandi. Lwe zungululaanu, mu kumaangë benuviinu kubwa mu lisokë.

² Lwe vangësënaanu mëboti benuveekë yi benuveekë mu ke zudësënaangë : obo, lun'cinzikaanu n'kaakë Kliistu.

³ Ningë muutu wulë mu kuyituunvi, tiilyoko naandi muutu kwaandi vwiili, naveekë wulë mu kuyipuutu.

⁴ Wosuku muutu we biilë naveekë ndyatulwaandi. Ningë naandi wum'podi kwangelëlë mu lyaawu, wum'ba mu nyeenzi mu naveekë i yaaku ti mu kufwanëkënë yi muutu wun'ka.

⁵ Cibilë wosuku muutu wufwenikini kunatë n'funaandi.

⁶ Wunë wuke yi mëlubu mu ciminu, wufwenikini kwe kabi byo biboti bike yaandi yimunë wo wulë mu kun'loongë.

⁷ Luyipuutyaanu ko: bë kusë n'dyeengaangë Nzaambi ko. Muutu wun'velë binë naandi kukunë.

⁸ Ningë naandi wakunë binë kun'tiisi mu n'sunyi, binë naandi kun'velë bim'ba bi n'sunyi. Kasi mooti naandi wakunë binë bin'tiisi Ciluunzi, byo kun'velë bim'ba luziingu lu sakë yi sakë.

⁹ Tuvolyaanu bitu ko mu kuvaangë liboti, kasi ningë tusye volë biitu ko, beeso tum'bakë n'sendwiitu mu ntaangu yo yibe fwaanë.

¹⁰ Mu lyaawu, ningë ti beeso tuke luvoto, twe vaanjyaanu mëboti ke bakë booso i kulu-kulu yiveko ke baanë biitu bë nguli mu ciminu.

Tukumini tu siitu i sibweekë

¹¹ Miinu yilë mu kulusonikë buyifanwabu mu kookwaami, bo lulë mu kumweenë kutolë ku bisonë.

¹² Banë bëlukacikë kubukë bubakëlë, baawu bën'toombë kuyileesi, bwiinji bëkumbë simpekaadu mu cibilë ci kuluusu yi Kliistu.

¹³ Cibilë baatu bëm'bukaangë bubakëlë kusë bën'cinzikaangë kuve baveekë n'kaakë. Baawu bën'toombë ti beeno bëbukë bubakëlë bwiinji bëyituunvi mu ciliimbu cinë beeno lwacikunë kutambulë mu n'sunyiinu.

¹⁴ Mu miinu, yilë mu kuyituunvi tokë mu cibilë ci kuluusu yi Fumwiitu Yeesu Kliistu. Mu lyaawu, mu cibilë ci kuluusu buloongo bu syeelyooso ko n'ciinzë mu miinu i yeekë buke muutu wufwa mu buloongo.

¹⁵ Mu bwaawu, mooti bubë kum'bukë bubakëlë kaambofo moniko, foofo lyaawu n'ciinzë voo, lyo like n'ciinzë mati lubutukulu lumoonë.

¹⁶ Mu bakë booso bën'zingilë mu n'kaakë awu, miinu yin'tubë: n'sikë i buboti bu Nzaambi lube veewu, yimunë ke bakë booso bëke mu likaandë li Nzaambi.

¹⁷ Mu sintaangu sin'kwiisë, muutu ve wufwenikini kum'pangisi simpasi, cibilë sindulu sike mu nyitwaami sin'leesi ti miinu mu Yeesu yikeeli.

¹⁸ Muulë wu Fumwiitu Yeesu Kliistu wuba yiinu beeno booso, baanë bë nguli. Ameenë.