Ngalaatë 5 - N’KANGULU WUMOONË

Zingilaanu mu lusyalulu lwiinu

¹ Kliistu watuvuuci yi cyelikë cyooso bwiinji tusyalulu. Ciinzyaanu bitu, oboobo, leembwaanu kube vutukë mu bundongo.

² Yuwaano! Miinu Poolë, yilë mu kulukaambë : ningë ti beeno lube bukë bubakëlë, oboobo mu beeno Kliistu wusyeeli n'ciinzë ko.

³ Miinu yilë mu kulukaambooso lyaawu, mu vyaasi ayi wosuku muutu wum'buku bubakëlë : naandi wufwenikini kucinzikë n'kaakë wakë wooso.

⁴ Beeno lun'toombaangë kuba bësulëmë mu n'kaakë fë nduunzi Nzaambi, lukabukë yi Kliistu i muulë wu Nzaambi wukeeli yiinu ko.

⁵ Mu beeso, tun'tuulë civuufu ciitu mu Nzaambi, wunë wutuvangisi kusulëmë, lyalyooli lyaawu tulë mu kuciingë yi lufyaatu looso mu Ciluunzi ci Saantu, lunë twatuulë ciminu ciitu.

⁶ Cibilë, wunë wubundënë yi Kliistu Yeesu, keti kulë bukë bubakëlë kaambofo moniko, lyaawu likeeli n'ciinzë ko: linë like n'ciinzë, mati ciminu ciitu cyo cim'monikë mu luzolo.

⁷ Beeno lutatikë buboti! Nani walukakini, mu kumaangë kucikunë cyelikë?

⁸ Linë bëlukaambë mu kulukondulë, lisye fuminë ke Nzaambi ko wo wulë mu kulutelë.

⁹ « Mwa fwaati fë m'bweeli fën'funisyaangë muungë wakë wooso ».

¹⁰ Fumu wukum'paanë lyaanë mu cibilë ciinu: miinu yim'balë ti benuviinu, lulë mu kumonë bo bumweekë yi miinu. Kasi wunë wulë mu kuluvangilë n'vuusu, bosuku bubeeli, wun'tambulë lutabu lu Nzaambi.

¹¹ Mu miinu, baanë bë nguli, ningë ti yim'podyooso kuloongë bunë bëfwenikini kubukë bubakëlë, cibilë mbicyooso lulë mu kun'kwamisye? Mu lya lyoolyo kutendulë lubaandulu lu Kliistu lusë be ba lyaambu libi ko mu muutu.

¹² Banë bëlë mu kuluvangilë n'vuusu bëyendyooso cinaanu mu mpangulu syaawu: bëbotulë mëkuundi më bubakëlë!

¹³ Kasi beeno, baanë bë nguli, beeno lutelu ku lusyalulu. Vaanji limweekë luvangisyaanu ko mu lusyalulu be loolo mëfukë-nyeembo më kuzingilë bo bën'kwendilë bideenzë bi n'sunyiinu. Tiilyoko, zingilaanu mu luzolo lu kusalilë benuveekë yi benuveekë.

¹⁴ N'kaakë wakë wooso wuzitiminë mo mu lutumu be loolo lumweekë : « Njeeyi wufwenikini kuzolë mbasyaaku dedë mweekë njeveekë. »

¹⁵ Kasi ningë luke yitebisënaangë i ke yivuketësënaangë benuveekë yi benuveekë, oboobo keelaanu: beeno lulë maninë mu kuyivondësënë benuveekë yi benuveekë.

Kuzingilë mu Ciluunzi yaaku ti mu bideenzë binsunyi

¹⁶ Tala linë miinu yilë mu kulukaambë: lwe lyatilaanu mu Ciluunzi i beeno lusë be laandooso ko bideenzë binsunyi.

¹⁷ Cibilë cimuutu ciitu cike yi bideenzë bivyakënë yi bi Ciluunzi i Ciluunzi wuke yi bideenzë bivyakënë yi binsunyi: byaawu bivyakënë byaveekë yi byaveekë bwiinji bëleembu kuvaangë linë beeno luzolisi.

¹⁸ Kasi ningë Ciluunzi cilë mu kulunatë, bwa boobo lusyelooso kuve mu lutumu lu n'kaakë.

¹⁹ Tuzabisi buboti buni lyaliili lin'vangininaangë mu n'sunyiitu: mu busafu, busuusi i sinsalulu simbi,

²⁰ kusambilë bintumbë i mëyoombo. Baatu bëlë mu kulendësënë baveekë yi baveekë, kwambilë i ke kwafësënaangë, baawu bëke yifiti i cimpalë. Baawu bëlë mu ke kabukaangë.

²¹ Baawu bëke yi n'soci, bën'kolë mëlafu i bulyaafu i sinsalulë syaawu simbi. Miinu beeno yilë mu kubikini buyifanwabu, bo yilivangilë: banë bën'silaangë katyoobo, kusë bëm'kotë ko ku lwaangu lu Nzaambi.

²² Kasi Ciluunzi ci Saantu wun'vanaangë luzolo, liyaanji, n'sikë, mpungë-moonyi, bwalëkisi, n'timë m'boti, lusulumunu,

²³ mëleembë i lukebu lu nyitu. N'kaakë wusë n'leendë ko mpilë sinsalulu be syoosi!

²⁴ Banë bëke mu Kliistu Yeesu, bëbaandë fë kuluusu bideenzë binsunyi i miciinzaandi.

²⁵ Ningë tun'zingilaanu mu Ciluunzi, tulyatilaanu yivaandi mu Ciluunzi.

²⁶ Keelaanu lulë ba yi lunaangu, leembwaanu kuba bisakë byaamu, kaambofo kuba yi n'soci benuveekë yi benuveekë.