Ngalaatë 4 - N’KANGULU WUMOONË

¹ Mu bikumë bimesi, talaanu linë miinu yin'toombë kutubë : buni bëm'beeli cibyalilë kuba cimwamwanë, luzabukunu lwaandi luke mpilë mweekë yi n'dongo, mooti lilë ba mu ntubulu ti byakë byooso byaandi.

² Mu lyaawu, naandi wun'lenvukilë baatu banë bëke mu kun'salilë i bën'vaanë n'timë mu bisalu byaandi tee ntaangu yo tataandi kuzitikë.

³ Beeso yiviitu twabë buke bibabanë, twabë bëndongo mu mëngolo më cimpeefë ci buloongo.

⁴ Kasi bunë ntaangu bëzitikë yisë fwaanë, Nzaambi wusë filë Mwanaandi: naandi wubutulu mu n'cyeetu i wabë fë lutumu lu n'kaakë Sizwiifë,

⁵ bwiinji wuvuuci banë babë mu lutumu lu n'kaakë Sizwiifë i kutuvaanë likanë mu kuba baanë bë Nzaambi.

⁶ Mu kuleesi cyelikë ti beeno baanë bë Nzaambi lukeeli, Nzaambi wusë filë mu mitimiitu Ciluunzi ci Mwanaandi, Ciluunzi cin'losukaangë: « Abaa, Aa Tataami! »

⁷ Bwaawu, njeeyi wusyeeli ko n'dongo, kasi mwaanë. Cibilë njeeyi mwanaandi wukeeli, Nzaambi wukuvaanë lifwa kulundilë baanë baandi.

Lusweenu lu Poolë mu basë Ngalaatë

⁸ Ntaangu ntamë, beeno lusye zaabaangë Nzaambi ko i beeno lwabë bëndongo bë sinzaambi sikaambu bucyelikë.

⁹ Kasi buyifanwabu beeno lwazaabë Nzaambi – kaambofo, bo Nzaambi waluzaabë – buni lum'podyooso kubëvutukënë mu lutumu lu cimpeefë luke vwiili kwaandi i lukaambusu mëngolo? Lun'toombaanu kube ba bëndongwe?

¹⁰ Beeno lun'cinzikë buboti bilumbu bimesi, singoondi, siteepu i mivu yimesë!

¹¹ Beeno lukum'pangisi lusweenu : simpasi syooso yimweeni mu beeno sibuunë kwaandi?

¹² A baanë bë nguli, beeno yin'loombë, lubaanu bo buke miinu, cibilë yayivangisi bo buke beeno. Beeno lusye kum'paangë libi ko.

¹³ Beeno lulë mu kutebukë moonyi cibilë-mbici miinu yilutendulilë Mpolu Mboti mu vyaasi yin'tetë: cibilë miinu yabë kubeelë.

¹⁴ Mu kumonë nyitwaami yibeelë yiba lusweenu mu beeno i kasi beeno lusye kunyacikë ko kaambofo lusye kum'maangë kuve. Tiilyoko, beeno lukun'tambulë dedë mweekë yaanzi yi Nzaambi, kaambofo dedë mweekë Kliistu Yeesu.

¹⁵ Beeno lwabë mu liyaanji! Mbi byaluyisile? Miinu yim'podi kuluvaanë cimbaanji aci: ningë lyaawu lim'podi, beeno lulë tumunë meeso miinu mu kum'paanë maawu!

¹⁶ Buyifanu, miinu yacitukë mbeeniinu cibilë miinu yilë mu kulukaambë cyelikë?

¹⁷ Bëmesë bën'vwa n'ciinzë mu beeno, kasi simbalulu syaawu simbi. Baawu bën'toombë, lukabukë yi miinu bwiinji luba tesu mu baawu.

¹⁸ Cyelikë, liboti mu kuba yi tesu yinenë, kasi mu manë mëfwenikini i bufwenikini boobo mu sintaangu syooso, yaaku tokë ti bo yikeeli yiinu.

¹⁹ Baanë baami, miinu yilë mu kumonooso simpasi mu beeno, dedë mweekë n'cyeetu wulë mu kubutë, tee ntaangu Kliistu wum'monikë cyelikë fëke beeno.

²⁰ Vyaasi kwa, yizolisi kutuukë ke beeno buyifanu, bwiinji yilukaambë mu nteku yin'ka. Miinu yisye zaabë ko buni yifwenikini kusiilë mu beeno!

Cifwaani ci Agaalë i Saala

²¹ N'kaambyaano, beeno lun'toombë kuba fë lutumu lu n'kaakë : beeno lusye kuwu ko manë n'kaakë awu kun'loombe?

²² Bësonikë ti, obo, Abalaamë wubutë baanë bwaali, wumweekë yi n'dongo, Agaalë i wumesë yi n'cyeetu wusyalulu, Saala.

²³ Mwaanë kubutë yimunë wo wun'tetë wubutë mu n'sunyi, kasi mwaanë kusyalilë kubutë yimunë wumwaali, wubutu bunë bulë kwendilë lukanyu lu Nzaambi.

²⁴ N'zisi be wuuwu wun'sulikë suundu yi njiinji: bëcyeetu bë bwaali bën'leesi mikangulu yi wali. Wumweekë mu mikangulu beenë, wum'monikë mu Agaalë, waawu wu moongo Sinaayi. Naandi wum'butë bëndongo.

²⁵ Agaalë, naandi limoongo li Sinaayi kusi Alabi. Lyaawu fwiifu yi livulë li Yelusaleemë yi bubwayi, naandi n'dongo yimunë mboongwaandi yooso.

²⁶ Kasi Yelusaleemë yi yilu yisyalulu i naandi na mamiitu.

²⁷ Mu lyaawu, Libuungu lin'tubë : « We saanji, n'cyeetu wukaambu baanë! We losukë miloolo yi nyeenzi, nje wukaambu kutaatë misoongo yikubutilë! Cibilë n'cyeetu bëvubikë wum'butë mpaapë baanë yi n'cyeetu bëzolisi ke n'nunyaandi. »

²⁸ Kasi mu beeno, a baanë bë nguli, beeno luke baanë bëbutu bun'sulikilë lukanyu lu Nzaambi, bo bumweekë yi Isaakë.

²⁹ Ntaangu ntamë, mwaanë wubutulu mu n'sunyi wulëkwamisyaangë wunë wubutulu mu Ciluunzi ci Nzaambi, mpilë mweekë yi bubwayi aci mëlë më kuvangënë.

³⁰ Kasi buni busonëminë? Lyaawu ali : « Kulë n'dongo owo i mwanaandi. Cibilë mwaanë wu n'dongo kupodi ve kubakë cikuuku mu lifwa li taatë yimunë mwaanë wu n'cyeetu wo wukeeli ko n'dongo. »

³¹ Bwaawu, baanë bë nguli, beeso tukeeli ko baanë bë n'cyeetu wuke n'dongo, kasi wu n'cyeetu wo wukeeli ko n'dongo.