Ngalaatë 3 - N’KANGULU WUMOONË

N'kaakë kaambofo ciminu

¹ Oo basë Ngalaatë, beeno lyeelë voo! Nani waluloke? Mati Yeesu Kliistu wufwa fë kuluusu bëluleesi fë meeso miinu.

² Miinu yin'tiisi ti lum'putulilë mbeembu mu cyuufu aci: beeno lutambulë Ciluunzi ci Nzaambi cibilë lwacinzikë makë mooso më n'kaakë, kaambofo cibilë lwakuwu i lwata maanë mu Mpolu Mboti?

³ Buni beeno lun'kaambu kubeelë yivaandi lyeele? Mo beeno lwatoninë mu Ciluunzi ci Nzaambi, lun'toombë kulimaninë mu cimuutu ciinu?

⁴ Beeno lwavaangë maambu be moomo më buunë kwaandye? Lyaawu kupodi ve kuvangënë mu buunë.

⁵ Bunë Nzaambi kuluvaanë Ciluunzi cyaandi i wuvaangë bimaaku fë meeyiinu, naandi wuvaangë byaawu cibilë beeno lun'cinzikë n'kaakë, kaambofo cibilë lun'kuwu i lun'ta maanë mu Mpolu Mboti?

⁶ Mu bwaawu bëtubilë mu cibilë ci Abalaamë : « Naandi wabë civuufu mu Nzaambi i Nzaambi wusë monë ti naandi wabë wusulëmë mu cibilë ci ciminu cyaandi. »

⁷ Beeno lufwenikini kulibakulë: banë bën'zingilë mu ciminu, baawu obo nguliku sindaandu si Abalaamë.

⁸ Busonëmë mu Libuuku ti Nzaambi wun'vangisi banë bëkeeli Sizwiifë ko mu kuba bësulëmë mu cibilë ci ciminu cyaawu. Mu lyaawu, naandi wusë zabikini ntetë Abalaamë mpolu be yiiyi yimboti : « Nzaambi wun'sakumunë mëkaandë makë mooso mu cibilë cyaaku njeeyi. »

⁹ Abalaamë wusë ta maanë i Nzaambi wusë n'sakumunë, bwaawu bakë booso bëta maanë bëm'bakë lusakumu bo bumweekë yi naandi.

¹⁰ Vandi kasi, banë bën'cinzikaangë n'kaakë bën'tambulë lusifu. Mu lyaawu, Libuuku li Nzaambi lin'tubë : « Lusifu ke wosuku muutu wun'kaambu yosuku ntaangu kusalilë makë mooso mësonëmë mu libuuku li n'kaakë. »

¹¹ Lyaawu licyelikë ti muutu ve wum'podi kuba wusulëmë fë nduunzi Nzaambi mu cibilë ci n'kaakë, cibilë bësonikë : « Wunë wusulëmë mu ciminu, wun'ziingë. »

¹² Kosuku, n'kaakë wukeeli yi cyosuku ko yimunë ciminu. Tiilyoko, bësonikë yivaandi : « Wunë wun'salilë tutumu tu n'kaakë wun'zingilë mu twaawu. »

¹³ Kliistu, abu kutuyobulë mu lusifu lu n'kaakë, wucitukë mu beeso lusifu, cibilë busonëmë : « Lusifu mu wosuku muutu wunë wubaandu fë n'ti. »

¹⁴ Mu bwaawu lusakumunu bëkanyi ke Abalaamë lusë veewu yivaandi ke banë bëkeeli Sizwiifë ko mu cibilë ci Kliistu Yeesu i beeso booso tun'tambulaangë mu ciminu Ciluunzi cinë Nzaambi wukanyi.

N'kaakë i lukanyu

¹⁵ Baanë bë nguli, yim'boongë cifwaani mu luziingu lu kadë cilumbu : ningë muutu wasonikë n'kaandë mu kuleesi bunë baatu bëfwenikini kusalilë biimë byaandi fë mbusë lufwa lwaandi, muutu ve wum'podi kumaangë lyaawu, kaambofo kubweelë cyosuku cin'viipë.

¹⁶ Bwaawu, Nzaambi wuvaangë tukanyu twaandi ke Abalaamë i ke ndaandwaandi. Libuuku li Nzaambi lisë n'tubë kwe : « i ke sindaandu syaandi », dedë mweekë bën'tubilë mu baatu bëmpaapë. Kasi lyaawu lin'tubë : « i ke sindaandu syaaku », oboobo, mu kuleesi fa foofë muutu wumweekë, wunë wukeeli Kliistu.

¹⁷ Talaanu linë yin'toombë kutubë : Nzaambi wuvaanë n'kaandë awu wun'leesi manë bëfwenikini kuvaangë fë mbusë lufwa i wuvaanë lukanyu mu kulucinzikë. N'kaakë, wunë wumonikë fë nkamë-na mëkumë-tatu li mivu fë mbusë, kupodi ve kumaangë manë mësonëmë mu n'kaandë beenë i kubotulë lukanyu lu Nzaambi.

¹⁸ Kasi, ningë lifwa linë Nzaambi wutuvaanë lim'bakënaangë mu n'kaakë, oboobo lyaawu lisë n'leesyooso ko mu cibilë ci lukanyu. Kosuku, mo mu lukanyu mwaawu Nzaambi wulesilë muulaandi ke Abalaamë.

¹⁹ Mu lyaawu, n'ciinzë mbici wukeeli mu n'kaakë? Lyaawu libweelu mu kuzabikini mëvaangë mësokënë yin'vwiilu Nzaambi i tee fanë fën'kwisilë ndaandu yi Abalaamë mu wunë bëvangililë lukanyu. N'kaakë awu wusë zabëkënë ke siyaanzi banë babë biseelu bin'tambësënë.

²⁰ Kasi mungë n'tambësënë wuke kwaandi vwiili cibilë wuke naveekë i Nzaambi wuke naveekë vii.

Suundu wu n'kaakë

²¹ Lya lyo lin'tubë ti n'kaakë wusokënë yimunë tukanyu tu Nzaambi? Moniko! Ningë n'kaakë wabë wuvaanu wum'podi kutuvaanë luziingu lucyelikë ke baatu, oboobo muutu kupodi kumonikë wusulëmë fë nduunzi Nzaambi mu kusalilë n'kaakë.

²² Kasi Libuuku li Nzaambi lin'tubë ti buloongo n'viipë buke mu lutumu lu lisumu, bwiinji likabu likanyi Nzaambi liveewu ke bitamaanë, mu cibilë ci ciminu cyaawu mu Yeesu Kliistu.

²³ Ntetë ntaangu ciminu kwiisë, n'kaakë wutuvangisi kuba mu buloko i kuciingë ciminu beenë cimonikë.

²⁴ Oboobo, n'kaakë wabë n'luunjiitu tee yi fanë lwisulu lu Kliistu, bwiinji tuba tusulëmë mu ciminu fë nduunzi Nzaambi.

²⁵ Abu ntaangu ciminu yatuuci, beeso tusyeeli ko fë civikë ci n'luunji be woowo.

²⁶ Cibilë lwekaanu beeno booso baanë bë Nzaambi mu ciminu cyalubuundë yimunë Kliistu Yeesu.

²⁷ Benubooso, licyelikë lwabë lubundënë mu Kliistu mu lubatizyaalu i lwavwaatë makë mooso mo naandi kutuvaanë.

²⁸ Fë keeli kwaandi n'samu ko mu kuba Zwiifë kaambofo kukaambu kuba zwiifë, n'dongo kaambofo wusyalulu. Libakëlë kaambofo n'cyeetu. Licyelikë, benubooso lwekaanu mu lubundunu yimunë Kliistu Yeesu.

²⁹ Ningë beeno luke mu Kliistu, beeno cyelikë sindaandu si Abalaamë i lun'tambulë lifwa linë Nzaambi walukanyi.