Ngalaatë 2 - N’KANGULU WUMOONË

Poolë i mimbunzi yin'ka

¹ Kuumi mivu na yavyooci, miinu yivutukënë ku Yelusaleemë yimunë Balënabaasë. Yisë natë yivaandi Tiitë.

² Yisë kweendë kwaawu mu kucinzikë manë Nzaambi wukun'nyalulilë. Mu luzutununu luvangënë ku foolë, yabë yimunë bënaangë, yisë bëkwalulilë Mpolu Mboti yinë yilëloongaangë ke bo bëkeeli ko Sizwiifë. Miinu yisye n'zolë ko, cisalu cyaami yisalë ntamë kaambofo Cibubwayi, citwakënë-nkoli.

³ Kasi, Tiitë ndikwaami yi mweendo, wuke Ngeleesë, bësye bën'kacikë ko mu kubukë bubakëlë.

⁴ Mu cibilë ti, baanë bë nguli bivadë-mbi bëkotë mu nkoongiitu i bëzolë kun'vangisi kubukë bubakëlë. Baatu be boobo bëfyelëmukë mu nkoongiitu bwiinji bëmonë buni beeso tun'zingilaangë lusyalulu lunë twatambulë ke Kliistu Yeesu i mu kutuvutulë mu bundongo bu n'kaakë.

⁵ Beeso tusye bëvaanë yifwaati likanë ko, bwiinji tusimbililë mu beeno cyelikë ci Mpolu Mboti.

⁶ Kasi bëkuluutu bëvyokilili bunaangë – oboobo, bosu bëbeeli bunenë bwaawu, bukeeli n'ciinzë ko, cibilë Nzaambi kusë n'fundisyaangë mu mëviimbu ko, bëkuluutu be boobo bësye kun'kacikë miswa yimoonë ko.

⁷ Tiilyoko, baawu bisë monë ti, Nzaambi wukun'soolë mu kutendulë Mpolu Mboti ke banë bëkeeli Sizwiifë ko, bo bumweekë kusolilë Pyeelë mu kutendulë ke Sizwiifë.

⁸ Mu bwaawu, Nzaambi wusë siilë mu miinu m'bunzi kusoolë mu si sin'ka, bo bumweekë kusiilë mu Pyeelë m'bunzi mu banë bëkeeli Sizwiifë ko.

⁹ Zaakë, Pyeelë i Za bo babë dedë mweekë mëkuunzi më mbumbuli më cingangë, bëbakulë ti Nzaambi wum'paanë muulë wukusalë cisalu be ciici, baawu bisë tusiimbë mu kookë, Balënabaasë i miinu, mu kuleesi bundiku bwiitu. Bwaawu beeso tusë kuwusënë, mu ke sali ke banë bëkeeli Sizwiifë ko i baawu bëke sali kuke Sizwiifë.

¹⁰ Baawu bisë tuloombë tokë mu kutebukilë moonyi mu biyeembi bi Cingangë cyaawu, ku Yelusaleemë, mo miinu yasalilë bunë bufwenikini.

Poolë waseembë Pyeelë ku Antyoosë

¹¹ Kasi bunë Pyeelë wuyisë ku livulë li Antyoosë, miinu yisë kun'seembë fë ciyalëlë, cibilë naandi wuba mu mbesi.

¹² Mu lyaawu, ntetë lutukulu lu mwa mpooko baatu bëfilë Zaakë, naandi wulëlyangaangë yi baanë bë nguli banë bëkeeli Sizwiifë ko. Kasi fë lwisulu lwaawu, naandi wusë kwakënë yaawu i wumaangë kulya yimunë bo bëkeeli Sizwiifë ko. Mu boomë bu banë bën'cinzikaangë cinkulu ci kubukë bubakëlë.

¹³ Baanë bë nguli bëmesë babë Sizwiifë bësiilë bo bumweekë yi Pyeelë i Balënabaasë naveekë wusë yilekulë mu bumpilë-mpiipi bwaawu.

¹⁴ Bunë yamoni ti baawu bisë n'zingilë kuve mu n'sulumunu, bunë bën'lombilë bucyelikë bu Mpolu Mboti, miinu yisë kaambë Pyeelë fë ntwaalë bakë booso ti : « Njeeyi wuli Zwiifë, wuzingilë akuuku mpilë mweekë bo buke baawu ko i yaaku ti bunë bun'kwendilë n'kaakë Sizwiifë. Kwisilë buni mu njeeyi, mu kukacikë banë bëkeeli Sizwiifë ko mu kuzingilë bo buke Sizwiifë? »

Sizwiifë i bo bëkeeli Sizwiifë ko bën'vukilë mu ciminu

¹⁵ Beeso tubutu Sizwiifë, yaaku ti baatu bë sisi sin'ka bën'ziimbë n'kaakë Nzaambi.

¹⁶ Oboobo, beeso tuzabisi ti muutu lumoonyi wuzabukunu wusulëmë fë nduunzi Nzaambi kanuku mu cibilë ci ciminu cyaandi mu Kliistu Yeesu, yaaku ti mu cibilë kun'cinzikë makë mooso më n'kaakë Moyiizë. Mu bwaawu, beeso yiviitu, twata maanë mu Kliistu Yeesu bwiinji tuba tusulëmë mu cibilë ci ciminu ciitu mu Kliistu i yaaku ti mu kucinzikë n'kaakë be wuuwu. Cibilë muutu ve wun'zabukunu wusulëmë ke Nzaambi mu kuba kucinzikë makë mooso më n'kaakë.

¹⁷ Kasi ningë, abu beeso tun'toombë kumonikë baatu bësulëmë mu cibilë Kliistu, bën'leesi ti beeso bisumuci bo buke bo bëke Sizwiifë ko, lyalyooli lin'tubë ti Kliistu wun'salilaangë lisumu? Moniko.

¹⁸ Licyelikë, ningë miinu yibe bëvutukunë mu n'kaakë wunë yivubikë, miinu yiyisifë miveekë.

¹⁹ Kosuku, mu cibilë ci n'kaakë, mwaawu miinu yifwiilë, mu lufwa luvukë naveekë n'kaakë, bwiinji yizingilë mu Nzaambi. Miinu yifwiilë yimunë Kliistu fë kuluusu.

²⁰ Oboobo, yaaku ti miinu yilë mu kuziingë, kasi Kliistu naandi wulë mu kuziingë mu miinu. Cibilë luziingu lwaami lu bubwayi, yin'zingilë lwaawu mu ciminu mu Mwaanë Nzaambi wunë wube kun'zolë i wuvaanë luziingu lwaandi mu miinu.

²¹ Miinu yibe maangë kubumë muulë Nzaambi. Mu bwaawu, ningë ti mu n'kaakë mwaawu tum'podi kusulëminë fë nduunzi Nzaambi, Lyabwiilë obo Kliistu wufwa mu buunë kwaandi.