Ngalaatë 1 - N’KANGULU WUMOONË

Sibweekë

¹ Poolë m'bunzi, yaaku ti mu mëkanë më baatu kaambofo mu cibilë ci muutu, kasi mu n'swa Yeesu Kliistu i Nzaambi Taatë wunë wun'vulumunë mu nkoongë bëfwa.

² Baanë bë nguli bakë booso bëkeeli afa baawu bëbundënë yaami mu kufilë n'kaandë awu mu Bingangë bi Ngalati i kubëkaambë:

³ Muulë i n'sikë we luveewu ke Nzaambiitu Taatë i Fumu Yeesu Kliistu.

⁴ Kliistu wuyivakulë naveekë mu kutuvuuci mu mësumu bwiinji wutuyobulë mu lutumu lubi lu buloongo be buubu, bunë Nzaambi, Tatiitu kutiisi.

⁵ Ndumu ke Nzaambi mu bilumbu byakë byooso! Ameenë.

Mpolu mweekë yi mboti

⁶ Miinu lusweenu mu n'timë, bunë beeno lwalengë lekulë Nzaambi, wunë wulutelë mu muulaandi mu Kliistu : i lwabalulë ntalu mu Mpolu Mboti yin'ka.

⁷ Cyelikë, yikeeli Mpolu Mboti yin'ka ko, baatu kwaandi vwiili bën'vaangë n'vuusu i bën'toombë kuviinji Mpolu Mboti yi Kliistu.

⁸ Oboobo, ningë muutu – kaambofo keti lilë ba beeso kaambofo yaanzi yifuminë ku yilu – wube luloongë Mpolu Mboti yivyakënë, yinë tukaambusu kululoongë, naandi kwe sifu!

⁹ Miinu yabë yilukaambë maawu i yilusisiminë buyifanwabu : ningë wun'viipë wulutendulilë Mpolu Mboti yivyakënë yinë beeno lutambulë, kwe sifu!

¹⁰ Bwaawu, fa foofë miinu yin'toombilë kubakë ludumu lu baatwe? Moniko, kanuku lo lu Nzaambi lwaawu yin'toombë. Buni yin'toombë kudedulë baatwe? Ningë miinu yin'toombooso mu kubëdedulë, mu boobo miinu kupodi ve kuba ciseelu ci Kliistu.

Buni Poolë kubeelë m'bunzi

¹¹ A baanë yaami bë nguli, miinu beeno yin'kaambë: Mpolu Mboti yo miinu yilë mu kulutendulilë, yaawu yisye fuminë ke muutu ko.

¹² Yaaku ti muutu na wum'paanë yaawu kaambofo wun'sinë yaawu, kasi Yeesu Kliistu na wun'nyalulilë yaawu.

¹³ Beeno luyuwu buni yilëzingilaangë bunë yabë yikangëminë mu cinguuku ci Sizwiifë. Beeno luzabisi bunë miinu mu butuutë bwaami, yilëkwamisyaangë Cingangë ci Nzaambi i yilëvaangaangë mëngolo mu kucivongumunë.

¹⁴ Miinu yivyokililë baanë bë nguli bo babë yaami mpuungë mu simpangulu si cinguuku ci Sizwiifë. Miinu yabë beenë bumbakë-mbakë kuvyokilë baawu mu cikulu ci sinkaakë siitu.

^15-16 Kasi Nzaambi, mu muulaandi, wukun'soolë ntetë yi miinu kubutu i naandi wakun'telë bwiinji yin'salilë. Bunë kwaboongë lukanyu lu kun'nyalulilë Mwanaandi, bwiinji yitendulë Mpolu Mboti ke banë bëkeeli ko Sizwiifë, miinu yisye kweendë ko mu kuloombë ndoonji yi muutu.

¹⁷ Miinu sye be tabilë ko ku Yelusaleemë kunë kwabë banë babë ntetë mimbunzi yi miinu. Kasi yisë lengë kweendë ku si Alabi i yisë vutukë ku Damaasë.

¹⁸ Mivu tatu yivyookë, vandi miinu yiyendë ku Yelusaleemë mu kuzabësënë yi Pyeelë i yisë kalë tumiingu twaali yimunë naandi.

¹⁹ Miinu yisye monooso ko m'bunzi wun'ka, kasi wo Zaakë, nkoombë Fumu.

²⁰ Manë yalusonikinë mëcyelikë, fë nduunzi yi Nzaambi miinu yin'sisiminë ti, yisë n'tatë-ngaangu ko.

²¹ Kumanoofo, miinu yisë kweendë ku mëbweeti më Sili i më Siliisi.

²² Bingangë bi Nzaambi bike ku Zudee bisye kun'zaabaangë ko.

²³ Baawu bëyuwu : « Wunë wabë wutukwamisyaangë mu sintaangu be siinë, weekë mu kutendulë buyifanu Mpolu Mboti yi ciminu cyo naandi wulëvaangë mëngolo mu kuvaafë. »

²⁴ Baawu bisë dumisi Nzaambi mu cibilë cyaami.