Mëvaangë 7 - N’KANGULU WUMOONË

Buzonzi bu Tyeenë

¹ N'kuluutu singangë-Nzaambi wusë kun'yufulë : « Linë bëlë mu kutubë mu njeeyi licyelikee? »

² Tyeenë wusë vutulë : « A banë yaami bë nguli i mëtaatë, n'yuwulwaano. Nzaambi bumpumu, wuyimonikinë nkaakiitu Abalaamë bunë kwaba ku si bën'teelë Mezopotami, lin'tetë naandi ke kalë ku libweeti li Alaanë

³ i wusë n'kaambë : “We botukë mu syaaku i cifuumbë cyaaku i we yendi ku si yo miinu yikusulikilë.”

⁴ Abalaamë kubotukooso ku si yi sikaledeyeenë i wusë ke kalë ku libweeti li Alaanë. Fë mbusë lufwa lu tataandi, Nzaambi wusë n'vyoosi ku libweeti li Alaanë si yo beeno lulë mu kuzingilë buyifanwabu.

⁵ Nzaambi wusye n'vaanë kwaawu lwaasi lu n'toto ko, kaambofo mwa lupaangu luke n'takë wum'podi kufwaanë mu lutaambi lu kuulu. Kasi naandi wuvaanë lukanyu mu kubëvaanë si yo sindaandu syaandi bën'zingilë yivaandi ku mbusaandi. Kasi mu teepu beenë, Abalaamë wusye ba ko yi mwaanë.

⁶ Tala linë Nzaambi kun'kaambë : “Sindaandu syaaku bën'zingilë ku si bweeni, kwaawu bën'citukë bëndongo i kwaawu bën'nyokulu fë nkamë-na li mivu.

⁷ Kasi miinu yin'fundisi buloongo be boobo kunë baawu bën'citukë bëndongo. Fë mbusë, baawu bëm'botukë ku buloongo be boobo i baawu bën'kwisë mu kun'sambililë fë mbiinji be yiiyi.”

⁸ Fë mbusë, Nzaambi wuzitikë n'kangulu yimunë Abalaamë, ciliimbu cin'kangulu beenë lubukulu lu bubakëlë. Mu bwaawu, Abalaamë wubukë bubakëlë bu mwanaandi Isaakë cilumbu ci naanë fë mbusë lubutulu lwaandi. Mpilë mweekë Isaakë wubukë Zakoobë, bo bumweekë yivaandi, Zakoobë wukubukë likuumi bë bwaali li mëkakëtë li bifuumbë bi Islayeelë. »

⁹ « Mëkakëtë bëmonë n'soci mu mwanaawu nguli Zozeefë i bën'sumbisi, mu kuba n'doongo ku si Zipiitë. Kasi Nzaambi wabë yaandi,

¹⁰ i naandi wun'vuuci mu simpasi syaandi syooso. Nzaambi wusë kuvaanë bungelë ke Zozeefë i wun'vangisi kuba muutu wumboti fë ntwaalë Falawoonë n'tinu Zipiitë. » Naandyaawu wusë kubyaasi Zozeefë likakëtë li lwaangu li Zipiitë i tee mu n'zo yakë yooso yi n'tinu.

¹¹ Kumanoofo, cibuyi cinenë cisë tuukë mu maalë makë mooso mu Zipiitë i mu si Kaanë. Abu simpasi sya lutili i sinkaakë siitu bisë be bakaangooso ko cinë ci kulya.

¹² Abu Zakoobë kwayuwu ti, ndiiwu yeekë ku Zipiitë, naandi wusë kufilooso sinkaakë siitu vyaasi yin'tetë kuunë.

¹³ Ntaangu yo naandi kwabëfilë mu vyaasi yimwaali, Zozeefë wabë wuzabëkënë ke banë yaandi bë nguli i Falawoonë wabë wuzaabë likaandë li Zozeefë.

¹⁴ Zozeefë wusë tumë baatu mu kweendë ke boongë tataandi Zakoobë i likaandë lyaandi lyooso, linë lyabë mu lutaangu lu saambwali li mëkuumi baatu bë taanu.

¹⁵ Mu lyaawu, Zakoobë wuyendë ku Zipiitë kwaawu kufwiilë, yivaandi yi sinkaakë siitu simesi.

¹⁶ Bënatë sinvuumbi syaawu ku bwaalë bu Sikeemë i bisë ziikë syaawu mu libuumbë linë Abalaamë kusumbilë mu mboongo ke baanë bë Amoolë ku Sikeemë.

¹⁷ « Bunë ntaangu yabelëmi, yinë Nzaambi kufitë vangililë lukanyu lunë naandi kuzitikë ke Abalaamë, sinkaakë siitu bëbutënë beenë i bëfunë mpaapë ku Zipiitë.

¹⁸ Bilumbu byavyooci, n'tinu wumoonë, wunë wabë wukaambu kuzaabë Zozeefë wusë kubyaalë ku Zipiitë.

¹⁹ N'tinu be woowo wusë puutë mboongiitu, i wuvaangë sinkaakë siitu simpasi. Naandi wubëkacikë bëlekulë baanë baawu bwiinji baawu bëfwa.

²⁰ Mu teepu be siinë sinaani, Moyiizë wusë butu. Naandi wabë mwaanë wunyeefë beenë fë meeso më Nzaambi. Naandi wuyonzukulë fë ngoondi tatu ku n'zo tataandi.

²¹ Ntaangu yo bën'lekulë, mwaanë wu Falawoonë wu n'cyeetu wusë n'noongë i wusë n'konzulë buke mwanaandi naveekë.

²² Mu lyaawu, bëlongilë Moyiizë mu luzaabu looso lu basë Zipiitë i naandi wusë ba muutu wun'nenë mu manë kulutubaangë i manë kulëvaangaangë.

²³ Bunë Moyiizë wudukisi mëkumë-na më n'vu, wusë tiisi mu ke moni banë yaandi bë nguli basë Islayeelë.

²⁴ Naandi wusë monë muutu wu Zipiitë wulënyokulaangë wumweekë mu baawu. Moyiizë wun'nwaninë cikaangë. Mu kuvutulë libi mu muutu beenë, Moyiizë wusë n'voondë.

²⁵ Moyiizë wulëbalaangë ti baanë yaandi bë nguli bëfitë bakulë ti naandi na Nzaambi kukanë kufilë mu kubëvaanë lobukulu. Kasi baawu bësye bakulë ko.

²⁶ Cilumbu cilandëkënë, naandi wusë monë baatu bwaali bë Islayeelë bëlënwaanaangë. Wuzolë kutuulë n'sikë mu babë bwaali i wusë tubë : “Cibilë-mbici beeno lulë mu kunwaanë? Beeno lukeeli baanë bë nguli mweekë.”

²⁷ Kasi wunë wulënyokulaangë wayaandi, wusë nyakunë Moyiizë i wusë tubë : “Nani wakubyaasi fumu i nzoonziitwe?

²⁸ Njeeyi wun'toombë kum'poondë bo bëvondilë yoono musë Zipiitë?”

²⁹ Mu bikumë obyo, Moyiizë wusë tiinë i ke yendaangë mu kuzingilë mu si Madyaanë. Kwaawu, kubutë baanë bwaali bëbakëlë. »

³⁰ « Fë mbusë mëkumë-na më n'vu, yaanzi mweekë kumonikinë Moyiizë mu ntaandu ciyumi, belë-belë yi moongo Sinaayi, fanë fë lubasikaangë milaku-mbaasu mu cisosu.

³¹ Moyiizë bunë kwamoni katyoobo, naandi wusë tulumukë. Kasi ntaangu yo kulëtoombë kubëlëmë mu kumonë buboti, wusë kuwu mbeembu Fumu yinë yilë tubaangë :

³² “Miinu Nzaambi sinkaakë syaaku, Nzaambi yi Abalaamë i yi Isaakë, i yi Zakoobë.” Moyiizë wusë tekë bitu yi boomë i wusë bëm'podi ko kun'talë.

³³ Mu lyaawu, Fumu wusë n'kaambë : “Botulë mëpaapë maaku, cibilë fo wukeeli ofo, fë saantu.

³⁴ Miinu yamonë buni bëlë mu kuvaangë simpasi ke mboongwaami ku si Zipiitë, yakuwu tusweenu twaawu i yatuukë mu kubëvuuci. Lyabwiili obo, miinu yatiisi kukufilë ku Zipiitë.” »

³⁵ « Moyiizë wunë basë Islayeelë bëmaangë kuwulu i bisë n'kufulë: “Nani wakubyaasi fumwiitu i nzoonzi?” Nzaambi wun'filë buke fumu i n'vuuci, mu likanë liyaanji yo yim'monikënë fë meeyi cisosu ci mbaasu. »

³⁶ Na Moyiizë wubaasi mboongu Islayeelë ku si Zipiitë i wuvaangë bimaaku i biliimbu ku si be yooyo, mu M'bu-mbeenji i mu ntaandu ciyumi fë mëkumë-na më n'vu.

³⁷ Wo na Moyiizë beenë, na wukaambë basë Islayeelë: « Nzaambi mba wulufilë m'bici bo buke miinu fë meeyiinu baanë bë nguli wum'ba wun'viipë mu mboongwiinu. »

³⁸ Ntaangu yo basë Islayeelë bëyidukunë mu ntaandu ciyumi, naandi wusë ba fë meeyi sinkaakë siitu. Naandi yivaandi wabë wulëtubënaangë yi yaanzi fë moongo Sinaayi. Naandi wutambulë mëbuungu më Nzaambi mu kutuzabisi maawu.

³⁹ Kasi sinkaakë siitu bësye zolaangë ko kun'yuwulu. Baawu bëm'maangë i bisë tiisi mu kuvutukë ku si Zipiitë.

⁴⁰ Baawu bëkaambë Aloonë : « Tuvangilë sinzaambi sin'lyaatë fë ntwaaliitu, cibilë beeso tusye zaabë ko linë lyakwiisilë Moyiizë, wunë wutubaasi ku si Zipiitë. »

⁴¹ Baawu bisë kufikulë cintumbë ci mwaanë ngoombi i bisë cikwindulë civakuli kuke cintumbë beenë, baawu bisë sangililë mu liyaanji mu cinë bëfikulë.

⁴² Kasi Nzaambi wusë bëbaandilë mbusë i kubëbiikë mu kukuundë simbotë si yilu, bunë bësonikë mu Libuuku li mibici : A mboongu Islayeelë, buni ke miinu kwaawu beeno lwavaninë bibulu i lwakwindulë bivakuli bin'ka mu mëkumë-na më n'vu mu ntaandu ciyumi?

⁴³ Monikoo, kasi beeno lwanatë cinzwananë ci nzaambi Molookë, i cintumbë ci nzaambiinu mbotë, yo bën'teelë Lefaanë, bintumbë bëfikulë mu kubikuundaangë. Mu bwaawu miinu yilunataanu cinaanu mu si Babiloonë.

⁴⁴ « Mu ntaandu ciyumi, sinkaakë siitu babë yi mwa cinzwananë cinë bëlëlundilaangë Bisonë bin'kangulu wu Nzaambi, cyaawu civangëninë bunë Nzaambi wutuminë Moyiizë. Oboobo, naandi wukaambë Moyiizë mu kubëfikulë cifwaani cinë naandi kumonë. »

⁴⁵ Cinzwananë be cyoocyo, bë citambikë kuke sinkaakë siitu mu n'taandë wulandëkënë. Baawu bëye cinataangë mu lutumu lu Zozwee, ku si mboongu baatu banë Nzaambi kukumbisi fë ntwaalaawu. Cyaawu cikalilë kuunë tee mu ntaangu Daviidë.

⁴⁶ Daviidë wubakë muulë wu Nzaambi i wusë n'loombë n'swa wukuvaanë n'zo yi saantu mu sindaandu si Zakoobë.

⁴⁷ Salomoonë naandi wun'tuungilë n'zo.

⁴⁸ Kasi beeso, tuzabisi buboti ti, Nzaambi-Mpuungu kusë kun'kalilaangë ko mu sinzo situungë baatu. Bunë bun'tubilë m'bici :

⁴⁹ « Liyilu mati ntaanzyaami, i n'toto wuke cilyatulu ci maalu maami. Mpilë mbici n'zo yo beeno lum'podi kun'tuungilë miinwe? Kuni miinu yim'podi kuvundilë?

⁵⁰ Miinu kwee yivaangë makë mooso omo mu myookwaami? »

⁵¹ « Beeno, baatu bëke mitimë ngolo, mitimë i matu miinu mëkangëmë mu mbilë yi Nzaambi, beeno lukalilë mu kubaayi Ciluunzi ci Saantu! Beeno luke bo bumweekë sinkaakë siinu!

⁵² Baawu bëvangisi mibici yooso simpasi i baawu bëvoondë banë bëtendulë lwisulu lu Muutu wusulëmë. Buyifanu, mati naandi beeno luvakulë i luvoondë.

⁵³ Beeno lubakë n'kaakë wu Nzaambi mu mëkanë më siyaanzi, kasi beeno lusye vitikë ko n'kaakë beenë! »

Lufwa lu Tyeenë

⁵⁴ Baatu bë cinguuku ci bëkuluutu bë Sizwiifë bëdasukë beenë ntaangu baawu bëyuwu maambu be moomo. Baawu bëkweetë meeno mu likaanzi fëke Tyeenë.

⁵⁵ Kasi Tyeenë wabë wuwaalë mu Ciluunzi ci Saantu wusë vum'bulë ntalu ku yilu, naandi kumonë bumpumu bu Nzaambi i Yeesu wutelëmë ku lweeku lu mëbakëlë më Nzaambi.

⁵⁶ Naandi wusë kutubë : « Yuwaano, miinu yilë mu kumonë liyilu lizibukë i Mwaanë muutu wutelëmë ku lweeku lu mëbakëlë më Nzaambi. »

⁵⁷ Mu lyaawu baawu bisë kulookë yi mëngolo mooso i bisë kuduci matu maawu. Bake booso bisë kubwa fë yilwaandi.

⁵⁸ Bisë kum'baasyooso ku ngaandë livulë i bisë ba mu kun'vikumunë mëmanyi mu kun'voondë. Bimbaanji babë faanë bisë vubikë n'vwaatwaawu mu maalu më n'teendë cilesi bakëlë bën'teelë Sawuulë.

⁵⁹ Bunë baawu babë mu kuvikumunë Tyeenë mëmanyi, naandi wulësambilaangë abu: « A Fumu Yeesu, tambulë ciluunzi cyaami! »

⁶⁰ Naandi wusë fukëmë i wulookë yi mëngolo mooso: « A Fumu bëlen'vukilë mu lisumu ali! » Bunë kwamani kutubë bikumë abi, naandi wusë kufwa.