Mëvaangë 6 - N’KANGULU WUMOONË

N'solulu yi saambwali li baatu

¹ Mu ntaangu be yiniina, lutaangu lu bilaanzi lusë ke funaangë, bitamaanë bë singeleekë bëlë ke nyoongaangë mu bitamaanë bë Sizwiifë: baawu bëlëtubaangë ti mifwiili yi nkoongaawu bëbënyacikë kadë cilumbu ntaangu yo bëlëkabulilaangë bilya.

² Mu bwaawu, mimbunzi yi kuumi bë bwaali bisë kucikë bilaanzi byooso i bisë bëkaambë : « Beeso tusye fwaanë kuve kubiikë mu kuloongë libuungu li Nzaambi mu ke lukabilaangë bilya.

³ Mu lyaawu a baanë yaami bë nguli, solaanu fë meeyiinu saambwali li bëbakëlë, banë bëke mëvaangë mëboti i banë bëwaalë cimpukë ci Ciluunzi ci Saantu i bungelë. Beeso tubëvaanë cisalu be cyooci.

⁴ Kasi beeso, tufwenikini kukalilë ntaangu yooso mu saambu i mu cisalu ci kuloongë Libuungu li Nzaambi. »

⁵ Bakë booso bëcikunë maambu beenë, mu bwaawu baawu bisë soolë Tyeenë wunë wabë yi ciminu ci mpaapë mu Nzaambi, i wuwaalë cimpukë ci Ciluunzi ci Saantu. Bësoolë yivaandi Filiipë, Pokoolë, Nikanoolë, Timoonë, Palëmenaasë i Nikolaasë, musë livulë li Antyoosë, wunë wabë wukotë mu libuundu li Sizwiifë.

⁶ Bisë kubëleesi ke mimbunzi banë bësambililë mu baawu i bëtendikë myooko mu baawu.

⁷ Mëbuungu më Nzaambi mëlë ke lutilaangë kutyamukë. Lutaangu lu bilaanzi lusë ke funaangë beenë ku Yelusaleemë i mpaapë singangë-Nzaambi bëlëtuulaangë ciminu cyaawu mu Yeesu.

Lubwiilulu lu Tyeenë

⁸ Tyeenë wabë wuwaalë mu cimpukë ci Ciluunzi ci Saantu i muulë wu Nzaambi. Naandi wulëvaangaangë bimaaku i biliimbu bi kwaatë-yekë fë meeyi baatu.

⁹ Mwa mpooko Sizwiifë bisë findënë mpakë yimunë naandi: babë baatu bë cizutununu ci Sizwiifë lizinë: « N'zo bëndongo bësyalulu », basë Sileenë i Alekëzandëlë, yivaandi Sizwiifë si maalë më Siliisi i libweeti li Aziiya, baawu bëfindënë mpakë yimunë Tyeenë.

¹⁰ Kasi baawu bësye podi ko kuciindë fë ntwaalaandi, cibilë naandi wulëtubilaangë mu bungelë bo Ciluunzi ci Saantu kulën'vaanaangë.

¹¹ Mu boobo, baawu bisë futë baatu simboongo bwiinji baawu bëtubë ti : « Beeso tuyuwu naandi wusafulë Moyiizë i Nzaambi! »

¹² Mu lyaawu, baawu bësindikilë baatu bakë booso, bëkuluutu bë Sizwiifë i miloonji n'kaakë. Fë mbusë, baawu bisë kolumukë Tyeenë i bisë ke n'nataangë fë ntwaalë cinzonzi ci Sizwiifë.

¹³ Baawu bisë natë yivaandi simbaanji si lupuutu banë bëlëtubaangë ti : « Muutu awu kusë m'biikë kuve kutubilë libi mu n'zo-Nzaambi yi Saantu i mikaakë yi Moyiizë.

¹⁴ Beeso tuyuwu naandi kutubë ti na Yeesu li Nazaleetë wun'tululë n'zo-Nzaambi i wum'balulë bifu binë beeso tutambulë ke Moyiizë. »

¹⁵ Bakë booso babë kuunë bësitikë meeso maawu ke Tyeenë i bëmonë ciinyi cyaandi cilë lesikë dedë buke yaanzi.