Mëvaangë 5 - N’KANGULU WUMOONË

Ananyaasë i Safiilë

¹ Wabë libakëlë limweekë bëlëteelaangë Ananyaasë i n'kasyaandi Safiilë bëkotë fuundu mu kusumbisi lupaangu lwaawu.

² Bunë bayuwusënë n'kasi i nuni, baawu bisë sweekë ndaambu mboongo mu naveekë i wusë natë ndaambu yimesë fë ntwaalë maalu më mimbunzi.

³ Kasi Pyeelë wusë n'yufulë : « Ananyaasë, mu cibilë-mbici njeeyi wazibulilë n'timë ke Satënë? Njeeyi wapuutë Ciluunzi ci Saantu i njeeyi wasweekë ndaambu mboongo yin'ka yo wabakilë mu lupaangu lunë njeeyi wasumbisi.

⁴ Cin'tetë, njeeyi mu kusumbisi lupaangu be luunë, lwaawu lwabë lwaaku njeveekë. I ku mbusë kulusumbisi, njeeyi wusye ba yi n'swa ko mu kusalilë simboongo be siinë? Kwisilë buni njeeyi mu kube bakilë mbalulu yi mpilë oyo? Nje wusye puutë ko baatu, kasi Nzaambi. »

⁵ Ntaangu Ananyaasë kwayuwu katyoobo, naandi kubwa i wusë fwa. Bake booso bëyuwu maambu be moomë bisë ba yi boomë.

⁶ Bilesi bakëlë kwiisë i kuziingë vuumbi mu lilasoolë. Bisë n'natë mu kun'ziikë.

⁷ Fë kwaasu ku zoolë tatu silandëkënë, n'kasi Ananyaasë wusë kukotë, naandi wusye zaabë kuve manë mëvangënë.

⁸ Pyeelë wusë n'yufulë : « N'kaambyoobo, mu luvunu be luulu mwa lusumbisili lupaangu lwiinwe? » N'cyeetu wusë n'vutulilë : « ngete, mweeni, mo mu luvunu be loolo. »

⁹ Mu lyaawu, Pyeelë wusë n'kaambë : « Kwisilë buni, beeno mu kuwusënë njeeyi i n'nunyaaku mu kusokë Ciluunzi ci Fumwee? Lekoobo, baatu bo bafuminë mu kuziikë n'nunyaaku beekë fë livitu i baawu sya bëkunatë yivaaku. »

¹⁰ Mo mu ntaangu be yiina, naandi kubwa fë ntwaalë Pyeelë i wusë fwa. Ntaangu yo bilesi beenë bëkotilë, baawu ke n'zakënë wafwa, baawooso ke n'nataangë i bisë n'ziikë fë nteku n'nunyaandi.

¹¹ Cingangë cyooso i baatu bakë booso bayuwu maambu manë mëvangënë, baawu bisë ba yi boomë bu mpaapë.

Mpaapë bimaaku

¹² Mimbunzi bëlëvaangaangë biliimbu i bimaaku bi kwaatë-yekë munë katyaasi ku baatu. Bitamaanë byooso bëlëdukënaangë ku Mwaanzë wu Salomoonë.

¹³ Wosuku muutu ve wulëkwelikë kukotë mu nkoongaawu. Kasi baatu bakë booso bëlën'cinzikaangë.

¹⁴ Mpaapë baatu, bëbakëlë i bëcyeetu, bëta maanë mu Fumu i bëlë ke funisyaangë nkoongaawu.

¹⁵ Baatu bëlëtwaalaangë bibeedo mu sinzilë i bëlëbëtuulaangë mu biikë kaambofo mu sinkwaalë, bwiinji ciduundu ci Pyeelë cifukë keti wumweekë kaambofo wun'viipë mu baawu, ntaangu yo naandi kun'vyokilë.

¹⁶ Nkoongë baatu yilëfuminaangë mu maalë mëbelëmë yi ku livulë li Yelusaleemë, bwiinji beendë ku Yelusaleemë. Baawu bëlënataangë bibeedo i baatu banë bëyabë bëvwaatu ke biluunzi bibi i bakë booso bëlëbelukaangë.

Lukwamusu lu Mimbunzi

¹⁷ Mu lyaawu, n'kuluutu ngangë-Nzaambi i bakë booso banë babë mu cinguuku ci Sisadusyaanu bëwaalë yi n'soci, mu mimbunzi. Baawu bisë kuboongë lukanyu mu kuvaangë lin'viipë.

¹⁸ Baawu bëkaangë mimbunzi i bëbëtuulë mu buloko yi baatu bakë booso.

¹⁹ Kasi yi bwiilu, yaanzi mweekë yi Fumu wuzibulë livitu li buloko. Naandi wusë baasi mimbunzi i wusë bëkaambë :

²⁰ « Yendaanu ku n'zo-Nzaambi i kaambaanu baatu makë mooso mën'talë luziingu lumoonë. »

²¹ Mimbunzi bisë vitikë. Mu menë-ngwaali, baawu bisë kotë ku n'zo-Nzaambi i bisë toonë kuloongë libuungu li Nzaambi. N'kuluutu singangë-Nzaambi i banë bën'kalaangë yaandi bisë telë baatu bë cinzonzi ci Sizwiifë i bëkuluutu booso bë basë si yi Islayeelë. Fë mbusë, baawu bëtumë mësodaadi mu ke laandë mimbunzi mu buloko.

²² Bunë sifumu si miluunji batuuci kuunë, baawu bësye ke zakënë kuve mimbunzi ku buloko. Baawu bëvutukë i bisë kubëkambilë abu:

²³ « Beeso twake monë buloko bukangëmë buboti i miluungë bëkalë fë ntwaalë mëvitu. Vandi kasi, bunë twazibuli mëvitu, tusye monë kuve wosuku muutu ku kati. »

²⁴ Bunë bayuwu katiboobo, fumu miluungë yi n'zo-Nzaambi i bëkuluutu bë singangë-Nzaambi bisë tulumukë i bisë ke yufësënaangë baveekë yi baveekë mbi biyisilë mimbunzi.

²⁵ Fë mbusë, muutu mweekë kwiisë kubëzabisi: « Lwakuwee! Baatu banë beeno lutuulë mu buloko bëke mu n'zo-Nzaambi i baawu bëlë mu kuloongë baatu. »

²⁶ Mu lyaawu, fumu miluungë wusë ke yendaangë kuunë yimunë mësodaadi maandi bwiinji bëbwiilë mimbunzi. Kasi mësodaadi ke nataangë mimbunzi bulweelu-bulweelu, cibilë baawu babë yi boomë ti baatu kubëyukë mëmanyi.

²⁷ Abu babëvutuli, baawu bisë ke bëtelikë fë ntwaalë cinzonzi i yi n'kuluutu ngangë-Nzaambi wusë bëfundisi.

²⁸ Naandi wusë bëkaambë : « Beeso tuluyiminë mu kulongilë mu lizinë li muutu be woowo. Lwe monyaanu bunë lwatyamuninë ndongulwiinu bwendi livulë li Yelusaleemë i beeno lun'toombë kutuulë lufwa lwaandi fë n'twiitu. »

²⁹ Kasi Pyeelë i mimbunzi yin'ka bisë kuvutulë : « Beeso tube fwaanë kutumu ke Nzaambi, yaaku ti ke baatu.

³⁰ Nzaambi yi sinkaakë siitu wuvulumunë Yeesu wunë luvoondë i lubaandë fë kuluusu.

³¹ Nzaambi wun'zanjikë ku mëbakëlë maandi i wum'byaasi Fumu i N'vuuci mu kuvaanë luvoto ke mboongu Islayeelë mu kubalulë ndyatulwaawu i kutambulë lobukulu lu mësumu maawu.

³² Beeso simbaanji tukeeli mu maambu be moomo, beeso i Ciluunzi ci Saantu cinë Nzaambi wavaanë ke bo bëkun'lenvukilaangë. »

³³ Ntaangu yo cinguuku ci bëkuluutu bë Sizwiifë bëyuwu katyoobo, baawu kudasukë i nkanë bëtoombë kuvoondë mimbunzi.

³⁴ Kasi mu nkoongaawu baawu, mwabë Falisyaanu yimweekë bëlëteelaangë Ngamëlyeelë, wabë n'loonji n'kaakë i baatu bakë booso bëlën'cinzikaangë. Naandi wutelëmë i wuloombë ti bëbaasyoobo mimbunzi mu mwa ntaangu.

³⁵ Naandi wusë tubë : « A basë Islayeelë, kebaanu mu maambu mo beeno lun'toombë kuvaangë mu baatu aba.

³⁶ Tebukaanu moonyi, bukeeli kwaandi cinaanu kuve bunë buyibasikë muutu bën'teelë Tewudaasë, wuyituunvi n'nenë. Ka kwaasu ku nkamë-na li bëbakëlë bëyibuundënë yaandi. Kasi naandi bën'voondë i bakë booso bëyen'laandaangë bisë tyamukë i cinguuku cyaandi cifwa.

³⁷ Fë mbusaandi, ntaangu yo bëlëvangilë lusanzumu lu baatu, yabë muutu mweekë lizinë Zuda musë libweeti li Ngalilee. Baatu bëmpaapë bëyen'laandaangë. Kasi navaandi wufwa i bakë booso bëyen'laandaangë bëtyamukë.

³⁸ Mu ntaangu be yiiyi, miinu yilë mu kulukaambilë abu: keelaanu beeno kulaandë maambu më baatu obo i bëbiikaanu. Mooti simbalulu kaambofo bisalu byaawu bifuminë ke baatu, byaawu bin'tyamukë.

³⁹ Ningë ti lyaawu lyafuminë ke Nzaambi, beeno kupodi ve kulityamunë. Kebaanu kunwanisyaanu Nzaambi! » Baatu bëke mu cinzonzi ci Sizwiifë bisë vitikë manë mëtubë Ngamëlyeelë.

⁴⁰ Baawu bëtelë mimbunzi i bëbëtumisi bëbëbulë sikoti. Fë mbusë, baatu kubëfuungë mu kube tubilooso mu lizinë li Yeesu i baawu bisë bëbiikë.

⁴¹ Mimbunzi bisë botukë fë cinzonzi ci bëkuluutu bë Sizwiifë yi liyaanji lyooso, Nzaambi wusë siinji mu baawu simpasi sinë bëmonë mu cibilë ci lizinë li Yeesu.

⁴² Bilumbu byakë byooso, baawu bëlëkalilaangë mu n'zo-Nzaambi i mu sinzo syaawu mu ke loongaangë i ke tyamunaangë Mpolu Mboti yi Yeesu, wuke Kliistu.