Mëvaangë 4 - N’KANGULU WUMOONË

Pyeelë i Za fë ntwaalë cinzonzi cinenë

¹ Pyeelë i Za bëlëkaambaangë nkoongë baatu, fisë kwiisë ke baawu singangë-Nzaambi i fumu yi miluungë n'zo-Nzaambi i Sisadusyaanu bisë kubelëmë fanë fabë baawu.

² Baawu bëba yi likaanzi, cibilë Pyeelë i Za bëlëloongaangë baatu i kubëkaambaangë ti Yeesu wuvulumukë. Lyaawu lin'toombë kutubë ti, baatu bëfwa bën'vulumukë.

³ Baawu bë bëkaangë i bëbëtuulë mu buloko tee cilumbu cilandëkënë, cibilë bwiisi bu yi yililë.

⁴ Kasi, mpaapë baatu mu banë bëyuwu liloonji li mimbunzi bisë ta maanë i lutaangu lu bitamaanë lusë dukusi kwaasu ku biveefi bi taanu bi baatu.

⁵ Cilumbu cilandëkënë, sifumu si Sizwiifë, bëkuluutu i miloonji n'kaakë bisë dukënë ku Yelusaleemë.

⁶ Banë babë kuunë bëba : Aanë n'kuluutu ngangë-Nzaambi, Kayiifë, Za, Alekëzandëlë i baatu bakë booso bë likaandë li n'kuluutu ngangë-Nzaambi.

⁷ Bënatë Pyeelë i Za fë ntwaalaawu i kubëkufulë : « Mu lutumu lu nani kaambofo mu lizinë li nani, beeno lwabelusi muutu awu? »

⁸ Mu lyaawu, Pyeelë wunë wuwaalë Ciluunzi ci Saantu, wusë bëvutulilë : « Beeno sifumu si mëkaandë i mëkakëtë!

⁹ Bubwaayi aci, beeno lwakë kutuyufulë mu cibilë ci maambu mëboti manë beeso twavaangë mu muutu wabë cikatë i beeno lutoombë kuzaabë buni naandi wabelukilë.

¹⁰ Beeno booso i baatu bakë booso bë Islayeelë lufwenikini kuzaabë lyaawu buboti: muutu owo watelëmë fë ntwaaliinu, weekë mu buvini mu lutumu lu Yeesu Kliistu li Nazaleetë, wunë beeno lubaandë fë kuluusu i wunë Nzaambi kwavulumunë mu nkoongë bëfwa.

¹¹ Yeesu wukeeli muutu wunë Libuuku li Nzaambi lin'tubë ti : “Limanyi lyo bituunji bëbumë, i lyaawu lyacitukë limanyi linkumë n'zo.”

¹² Kanuku wo naandi vwiili wum'podi kutuvuuci, cibilë mu buloongo n'viipë, Nzaambi wusye vaanë lizinë lin'ka ko ke baatu, bwiinji beeso tuvuukë. »

¹³ Bëkuluutu bë cinzonzi bisë kutulumukë mu civuufu ci Pyeelë i ci Za. Baawu bëzaabë kwaawu ti, baawu bëba baatu kwaandi vwiili bëkaambu kuzaabë n'kaandë. Ba bëzaabë yivaandi ti, baawu bëlëlyataangë yimunë Yeesu.

¹⁴ Kasi, baawu bunë bamoni muutu wo wubelukë wabë fë ntwalaawu, baawu bësye be bakë ko cikumë cikutubë.

¹⁵ Mu lyalyooli, bëbëbaasi i baawu kutoonë kufusënë baveekë yi baveekë.

¹⁶ Baawu bëlëtubaangë ti : « Buni tufwenikini kusiilë mu baatu aba? Licyelikë, baatu bakë booso bë livulë li Yelusaleemë bëzaabë buboti ti baawu bëvaangë cimaaku cinenë, i beeso kupodi ve kumaangë cyaawu.

¹⁷ Vandi kasi keelë saangu yi lyaambu be liili yileembu kunyaambë ke baatu bakë booso, beeso tufwenikini kubëfuungë yi nkasu yooso bëleembu kube tubilooso mu lizinë li Yeesu ke wosuku muutu. »

¹⁸ Mu lyaawu, baawu kube bëtelooso i kubëfuungë yi nkasu mu kutubilooso kaambofo kuloongilooso mu lizinë li Yeesu.

¹⁹ Kasi Pyeelë i Za bisë kubëvutulilë : « Maambu mbici mëfwenikini fë meeso më Nzaambi : kulenvukilë Nzaambi voo beeno? Bilaanu benuveekë linë li kuvutulë.

²⁰ Mu beeso, tusë m'podi kuve kubiikë kutubë manë twamonë i manë twakuwu. »

²¹ Baawu kube bëvangisyooso boomë i fë siitu bisë bëbiikë. Baawu bësye be zaabë ko buni bu kubëvangilë kastikë, cibilë baatu bakë booso bëlëdumisyaangë Nzaambi mu maambu mëvangënë.

²² Muutu wo wubelukë mu cimaaku, wubë kuvyookë mëkumë-na li mivu.

N'saambu bitamaanë

²³ Ntaangu yo bëbëbikilë, Pyeelë i Za bisë kweendë ko kwabë bayaawu i bisë bëkaambë maambu makë mooso manë bëkuluutu bë singangë-Nzaambi i bëkuluutu bë Sizwiifë bëtubë.

²⁴ Fë mbusë kuwu maambu beenë, baawu bisë kusambilë Nzaambi mu n'timë wumweekë i kutubë : « A Fumu, ma njeeyi wuvaangë liyilu, n'toto, m'bu i biimë byakë byooso binë bike mwaawu.

²⁵ Ma njeeyi wutuulë mu ciseelu cyaaku, Daviidë nkaakiitu, Ciluunzi ci Saantu ntaangu yo naandi kutubë : “Mu cibilë-mbici basë sisi syakë syooso bavulë, mu kuvaangë sifuundu sibuunë?

²⁶ Mitinu yi n'toto bëbeliminë mu n'ziingu, i sifumu beendë mu kunwanisi Fumu i kunwanisi n'tinu kwabyaasi.”

²⁷ Licyelikë, Eloodë i Poonsë Pilaatë bëbundënë mu kati ku livulë be liili, yimunë basë Islayeelë i bë sisi sin'ka, bwiinji bëmaangë Yeesu, ciseelu cyaaku ci saantu cyo njeeyi wubyaasi.

²⁸ Baawu bësalilë makë mooso omo buni njeveekë wufwikilë maawu ntetë mu mëkanë maaku i mu luzolo lwaaku.

²⁹ A Fumu! Ntaangu be yiiyi, taloobo buni baawu batoonë mu kutuvangisi simpasi i kuvaanë mëngolo ke biseelu byaaku bwiinji ti baawu bëtyamunë saangwaaku yi civuufu cyooso.

³⁰ Leesyoobo mëngolë maaku bwiinji bibeedo bibelukë. Biliimbu i bimaaku bivangënë mu lizinë li Yeesu, ciseelu cyaaku ci saantu. »

³¹ Ku siitu n'saambwaawu, fo bëdukëninë fisë tutumukë. Nzaambi wusë bëwaasi mu Ciluunzi ci Saantu i baawu bëlëloongaangë Libuungu li Nzaambi yimunë civuufu cyooso.

Bitamaanë bëkabësënë baveekë yi baveekë binë bëbakë

³² Nkoongë yooso yi bitamaanë babë deku-dekoo, n'timë mweekë i mbalulu si mweekë. Mu baawu, wun'viipë ve wulëpodi kutubaangë: byo yibakë byaami miveekë. Kasi mu baawu, byakë byooso bëbakë, byabë bi n'twaali.

³³ Mu mëngolo mënene, mimbunzi bëlëvaangaangë bum'baanji mu luvulumuku lu Fumu Yeesu i Nzaambi wulëvaanaangë bakë booso myuulë yi mpaapë.

³⁴ Muutu ve mu nkoongaawu wusye kaambwaangë cin'velë ko. Mu lyaawu, bakë booso bëba yi sisolë, kaambofo sinzo, bën'sumbisi i bëlëtwaalaangë simboongo ke mimbunzi.

³⁵ Ku mbusë, mimbunzi kukabilë simboongo ke kadë muutu mu yaandi miciinzë.

³⁶ Mu lyaawu Zozeefë, waba musë cifuumbë ci Levi wubutulu ku citumbu ci Sipëlë wunë mimbunzi bëlukë lizinë Balënabaasë – Dedë mweekë: « Muutu wuke buvavambë » –

³⁷ Naandi wusumbisi solaandi, wunatë simboongo i wusë kuvaanë ke mimbunzi.