Mëvaangë 28 - N’KANGULU WUMOONË

Poolë mu citumbu ci Malëtë

¹ Bo twavuuci, bwaawu twakuzabile ti citumbu beenë bë citeelë Malëtë.

² Basë citumbu bisë tukwaakë yimunë luzolo lunenë: bo n'vulë yatooni kunokë i bunë bwabë cyoosi, baawu bisë tatikë mbaasu yinenë, faawu bëtutambulilë beeso booso.

³ Poolë wusë noongë sin'kuni bwiinji wusituulë ku mbaasu. Kasi mu libabëlë li mbaasu, mpili yisë basikë i kun'namë mu kooko.

⁴ Bunë basë citumbu bëmonë mpili yinamë mu kooko ku Poolë, baawu kutubë baveekë yi baveekë: « Muutu awu civoondë baatu. Licyelikë naandi wavuukë mu m'bu, kasi lufundusu lu Nzaambi luke yaandi i Nzaambi wusë kun'vaanë ko n'swa mu kuvuukë. »

⁵ Kasi Poolë, wusë nyakunë mpili ku mbaasu, wusye monë yosuku mpasi ko.

⁶ Baatu bëmesë bëlëciingaangë mu kumonë nkanë wun'tifë, kaambofo wum'bwa i kufwa. Kasi bunë baciingë beenë, baawu bisë monë lyosuku lyaambu libi lisye n'kwisilë ko. Mu lyaawu, baawu bisë balulë simbalulu syaawu i bëtubë ti naandi wabë nzaambi.

⁷ Fë mbiinji beenë, fabë cibwa ci likundaalë fumu citumbu bën'telaangë Pubiluusë. Na wuuwu wutuyakë yi luzolo looso i beeso tuvyoosi bilumbu bi tatu kwaawu.

⁸ Taatë Pubiluusë wabë wunuukë fë ciikë. Libaawu lyabë yaandi i wulëtweekë civumu. Poolë wusë kweendë mu ke m'moni, na wusambilë, wun'tendikë myooko i kum'belusi.

⁹ Kumanoofo, basë citumbu bisë kwiisë fabë Poolë i naandi wusë bëbelusi.

¹⁰ Mu lyaawu, baawu bisë bweelë kube tucinzikë, ntaangu yo tulë kwendilë, baawu bëtuvaanë biimë binë byabë yiitu n'ciinzë mu mweendo.

Poolë watuukë Ku Loomë

¹¹ Fë mbusë ngoondi tatu, beeso tusë kandëmë mu likuumbi li livulë li Alekëzandëlë, bën'teelë « Dyosukuulë » i bisë vyoosi cisifu ku liloondo li citumbu.

¹² Beeso tutuukë ku Silakuusë, kunë beeso tukalë bilumbu bi tatu.

¹³ Beeso tusë botukë kuunë i beeso tuke laandaangë lisimu li m'bu, mu ke kutuukë ku Lezyo. Cilumbu cilandëkënë, mpeemo yi waandë yipukë i beeso tusë kutuukë fë bilumbu byooli ku Puzoolë.

¹⁴ Kwa kunë kunaani, beeso ke zakënë baanë yiitu bë nguli bëlë tuloombaangë mu kukalë yaawu saambwali li bilumbu. Bwa boobo, bwaawu tuvyosilë mweendwiitu i tutukilë ku Loomë.

¹⁵ Baanë bë nguli bë Loomë bëtambulë simpolu mu cibilë ciitu i bëyitudyengënë tee ku lizaandu ku Apiyuusë i ku « Sinzo Tatu si Beeni ». Bunë Poolë wubëmonë, naandi wutoondë Nzaambi i wusë ciindë bitu.

¹⁶ Bunë twatuuci ku Loomë, bëvaanë Poolë n'swa mu kunuukë nkoonzu yin'ka, yimunë lisodaadi lilën'luungaangë.

Poolë wulë mu kuloongë ku Loomë

¹⁷ Fë mbusë bilumbu bi tatu, Poolë wuvekilë ku bwaalë bwaandi sifumu si Sizwiifë si Loomë. Buni badukini, naandi wusë tubë : « A baanë bë nguli, yisye vaangë lyosuku lyaambu libi ko ke mboongwiitu, kaambofo mu nzingulu sinkaakë siitu. Miinu bëkum'bwiilë ku Yelusaleemë i bëkun'vakulë ke basë Loomë.

¹⁸ Buni bamani kun'nyufulë, baawu bisë toombë kum'biikë, cibilë bësye monë ko libooti linë bëkun'tabulilë lufwa.

¹⁹ Kasi Sizwiifë bisë maangë. Mu lyaawu, miinu yibe fwaanë kuloombë ke n'tinu Sezaalë mu kun'fundisi. Kasi miinu yikeeli ko yi simbalulu si kufuundë basë si.

²⁰ Mu lyaawu olyo, miinu yin'loombë mu kukumonë i mu kukukaambë. Licyelikë, miinu yilë mu kunatë simpaangë mu cibilë ci muutu wunë baatu bë Islayeelë bën'tulaangë civuufu. »

²¹ Baawu bisë n'vutulilë : « Beeso tusye tambulë ko wosuku n'kaandë wu livulë li Zudee mu cibilë cyaaku njeeyi i wosuku mwaniitu nguli ve wufuminë kuunë mu kutukaambë maambu mëbi mu cibilë cyaaku.

²² Kasi beeso tun'vwa n'ciinzë kuwu mu munwaaku, maambu mo njeeyi wulë mu kubalë, cibilë tuzabisi ti fosuku faamë baatu bëke mu kumaangë cinguuku cyo njeeyi wukeeli. »

²³ Baawu bisë sitikë mpanginyi yimunë Poolë i cilumbu bëzitikë, baawu biyisilë mu nkoongë yinenë, kun'zakënë fo kulëlembikilaangë. Kutoonë yimenë tee yi mësikë, Poolë wubëloongë i kubëkwalilë maambu makë mooso mën'talë lwaangu lu Nzaambi. Mu kubëkaambë maambu mëkeeli mu n'kaakë Moyiizë i mu Libuuku li mibici. Naandi wulëtoombaangë kubëvangisi kucikunë Yeesu.

²⁴ Bëmesë bisë cikunë maambu manë Poolë kulëtubaangë, kasi bën'ka bisë maangë kuwu.

²⁵ Tee baawu bisë ke yendaangë kwaawu i kuwusënë ve baveekë yi baveekë. Poolë wubëkaambë : « Ciluunzi ci Saantu wuluungë bunë naandi wulëkambilaangë sinkaakë siinu mu munu m'bici Ezayi!

²⁶ Naandi wusë tubë : “Yendë wakaambë mboongu oyo, beeno lun'zikulu kuwu, kasi lusë m'bakulu ko. Beeno lum'monë buboti, kasi lusë m'monë ko.

²⁷ Mitimë yi mboongu ayi yeekë ngolo. Baawu baduci matu i meeso, mu kumaangë baawu kuwu i bëleembu kumonë. Mu lyaawu, baawu bisë be vutukënë ko ke miinu, bwiinji yibëbelusi bën'tubë Nzaambi.”

²⁸ Poolë wusë bëtubë : Beeno lufwenikini kuzaabë ti, Nzaambi wufilë Mpolu Mboti yi luvukulu ke bo bëkeeli ko Sizwiifë. Baawu bëkun'yuwulu. »

²⁹ Fë mbusë mëbuungu më Poolë, Sizwiifë biyeendë i bisë ke yambilaangë yi mëngolo mooso.

³⁰ Poolë wusë bëzingilë kwaawu, mivu wali mu n'zo kulëfutilaangë. Naandi wulëkwakaangë bakë booso bëlëkwisaangë mu kum'monë.

³¹ Naandi wulëloongaangë lwaangu lu Nzaambi i wulëbëleesyaangë maambu manë mën'talë Fumu Yeesu Kliistu yi civuufu cyooso ve ci lun'kakini.