Mëvaangë 27 - N’KANGULU WUMOONË

Poolë ban'filë ku Loomë

¹ Bunë baboonji lukanyu lu kwendilë mu likuumbi ku si Itali, bisë vaanë Poolë i mwa mpooko baatu babë mu buloko ke kumandë Zuluusë, n'kuluutu-mësodaadi wu Loomë, bën'teelë ti « Nkoongë yi n'tinu. »

² Beeso tusë kotë mu likuumbi lifuminë ku livulë li Adëlamiitë, lilë kwendaangë më mëloondo mëmesë më libweeti li Aziiya. Beeso tusë kweendë yimunë Alisëtaakë, musë livulë li Tesaloniikë libweeti li Masedwaanë.

³ Mu cilumbu cilandëkënë, beeso tusë ke tuukë ku livulë li Sidoonë. Zuluusë wunë wuvaangë Poolë maambu mëboti, wusë n'vaanë n'swa mu kweendë kuke sindiku syaandi bwiinji kubakë biimë binë kwabë n'ciinzë.

⁴ Abu twabotukë kwaawu, beeso tusë tabilë belë-belë ku lisimu li Sipëlë kunë kulëfuminë mpeemo yilëpukaangë ku lweeku lwiitu.

⁵ Beeso tusë sabukë m'bu fë ntwaalë mëbweeti më Siliisi i Pamfili i beeso tusë tuukë ku livulë li Mila ku libweeti li Lisi.

⁶ Faawu, n'kuluutu-mësodaadi wusë monë likuumbi li Alekëzandëlë lilëkwendë ku Itali i naandi wusë kutukosi mwaawu.

⁷ Likuumbi lisë vaangë mpaapë bilumbu mu ke lyataangë bulweelu-bulweelu i beeso tusë monë mpaapë simpasi mu kutuukë ku livulë li Kiniidë. Bunë mpeemo yitukakini mu kweendë cinaanu ku lweeku be loolo, beeso tusë tabilë mu ndaambu citumbu ci Salëmoonë i tusë tuukë ku lisimu li citumbu ci Keleetë.

⁸ Likuumbi lilëkwendilaangë mu simpekaadu mu kulaandë lisimu i beeso tusë ke tuukë mbiinji bën'telaangë : « mëloondo mëboti », belë-belë yi livulë li Lasee.

⁹ Beeso tuvyoosi mpaapë ntaangu i mweendu mu likuumbi wusë ba nkakëni, cibilë cilumbu ci kukaangë n'sweelë mu cisifu ci yivyokilë. Mu lyaawu, Poolë wusë kukumini binatë likuumbi :

¹⁰ « A bayaami, yilë mu kumonë ti mweendu awu wum'ba simpekaadu. Likuumbi i bifundë byooso bin'twakënë nkoli. I besuveekë yivaandi kupodi kufwa. »

¹¹ Kasi n'kuluutu-mësodaadi wumaangë kuwu mo Poolë kun'kaambë. Naandi wulukuwulwaangë tokë cinatë likuumbi i wo wun'tumi lyaawu.

¹² Liloondo lisye be fwanëkënë ko mu kuvyosilë cisifu. Lyabeelë obo, mpaapë baatu mu bo babë mu likuumbi, bisë boongë lukanyu lu kubotukë faawu : « baawu bëzolë kuvaangë buumë mu kutuukë ku Feniikësë, liloondo li Keleetë, lyabë ku waandë mësindulu më ntaangu i ku moongo mësindulu më ntaangu, mu kuvyosilë cisifu. »

Mpeemu-ngudi mu m'bu

¹³ Bunë mwa luveefu lu mpeemu lufuminë ku waandë i bisë balë ti baawu kupodi kwaawu kusalilë manë bëkanë. Baawu bisë tapulë mbwa-putu i ke kwesënaangë lweeku li livulë li Keleetë.

¹⁴ Kasi, mpeemo-ngudi bën'teelë : « Mpeemo yi moongo wu mëselukulu më ntaangu », yifuminë ku moongo citumbu bën'teelë « Elakiloonë ».

¹⁵ Likuumbi lisë vekemukë mu mpeemo yi ngolo: mëkanë ve mu kutundëkënë mpeemo i beeso tusë biikë mpeemo mu kutuvekumunë.

¹⁶ Beeso tusë vyookë ku waandë li mwa citumbu bën'teelë Koodë. Mu likuumbi, simpekaadu simpaapë, beeso tubakë mëkanë më kuboongë likuumbi licyeeci.

¹⁷ Binatë likuumbi bisë linangunë i kukaangë misiingë mu kulisitikë. Abu bëlëtiinë boomë mu ke vakëmë mu cisengini ku lweeku lu Libi, baawu bisë bikilë ndeengë yi bisë biikë mpeemo ke bëvekumunaangë.

¹⁸ Bunë mpeemo yilëbweelaangë mu ke tuvekumunaangë mu mëngolo, cilumbu cilandëkënë, baawu bisë bumë bifundë byaawu bin'ka mu m'bu

¹⁹ i cilumbu cilandëkënë, baawu bëye bumaangë bisalulu bi likuumbi mu m'bu.

²⁰ Beeso tusë vaangë mpaapë bilumbu kumonë ve muunyi i simbotë, mpeemo yabë beenë ngolo. Beeso tusye zaabangooso ko ti tun'vuukë.

²¹ Bo babë mu likuumbi bësye lya ko fë mpaapë bilumbu. Mu lyaawu, Poolë wusë telëmë fë ntwaalaawu i kutubë : « A bayaami, nkanë ti beeno lube kuwu ndoonjyaamë, mu kuleembu kubotukë fë cisosu ci Keleetë, likuumbi i biimë byakë byooso nkanë bisye twakënë-nkoli ko.

²² Kasi sintaangu asi, miinu beeno yin'loombë mu kuciinzi bitu, cibilë ti wun'viipë ve fë meeyiinu wun'fwa, kanuku likuumbi lin'siindë.

²³ Mu bwiilu be buubu, Nzaambi wunë yin'salilaangë, wun'filisi yaanzyaandi i wusë belëmë yaami

²⁴ i wusë tubë : “A Poolë keelë kuba yi boomë. Njeeyi be fwaanë kufundusu fë ntwaalë n'tinu Sezaalë i Nzaambi mu buboti bwaandi mu njeeyi wun'vaangë ti, bakë booso bëke yaaku mu mweendo bëvuukë.”

²⁵ Ciimbaanu moonyi a bayaami, Licyelikë, yike lyaanë mu Nzaambi : lyaawu lin'vangënë bunë wakun'kaambilë.

²⁶ Kasi likuumbi liitu lin'siindë lweeku lu citumbu. »

²⁷ Fë kuumi bwiilu bu na, mpeemo yisë ke tuvekumunaangë mu m'bu Meditelaanë. Fë katyaasi ku bwiilu, bisasi bi likuumbi bisë balë ti beeso twabelëmë kutuukë fë n'toto.

²⁸ Baawu bisë kwelikë ndilu masi mu cizongulu i bëmonë ti liwiingë li masi lyabë lidoongë fë mëkumë-tatu saambwali li mitakë. Fë mwa ntwaalë fwaati, baawu bisë kuzoongooso masi i kubakë mëkumwaali naanë li mitakë më liwiingë.

²⁹ Baawu babë yi boomë ti likuumbi lyaawu libuundë mëmanyi. Mu lyaawu, baawu bisë bumë simbwa-mputu na ku waandë li likuumbi i bëlëviingaangë bwiisi bucya.

³⁰ Oboobo, binatë likuumbi bëlëtoombë kwakënë yi likuumbi i bisë kululë likuumbi licyeeci mu masi. I bisë toombë kutubë ti baawu bën'sitikë simbwa-mputu ku ntwaalë likuumbi.

³¹ Poolë wusë kaambë n'kuluutu Loomë i mësodaadi : « Ningë ti baatu aba bu bëmaangë kukalë mu likuumbi, beeno lu kusë n'vuukë ko. »

³² Mu lyaawu, mësodaadi bisë cyelë misiingë yilësiimbaangë likuumbi licyeeci i likuumbi lisë sundilë kweendë.

³³ Ntetë bwiisi kucya, Poolë wusë telë bakë booso mu kulya, wusë tubë : « Tala bubwayi aci yeekë kuumi bilumbu bi na, binë beeno lwazingilë mu lusweenu i beeno lwakalilë yi cyosuku kulya ve.

³⁴ Miinu yalutelë bwiinji lulya, cibilë beeno luke mu n'ciinzë kuvuukë. Mu beeno, muutu ve wum'podi kuzimbisi n'leenji mweekë wu n'twaandi. »

³⁵ Ntaangu kumaninë kutubë, naandi wuboongë limpa i wusë toondë Nzaambi fë ntwaalë bakë booso. Fë mbusë, naandi kulimukënë i kutoonë kulya.

³⁶ Bakë booso bisë bakë n'viingu i kwambulooso.

³⁷ Beeso twabë mu likuumbi nkamë-wali saambwali li mëkuumi li baatu bë samunu.

³⁸ Bunë bakë booso bisë kukutu, baawu bëbumë faliinë mu m'bu, bwiinji likuumbi lisyalulu.

Likuumbi lyasiindë

³⁹ Bunë bwiisi bwacya, binatë likuumbi bësye bëzaabaangë n'toto ko. Kasi baawu talilë lisimu fabë n'toto i bisë boongë lukanyu luke sesilë kwaawu ningë kupodi.

⁴⁰ Baawu kukutulë simbwa-mputu i bisë biikë syaawu kubwa mu m'bu. Baawu kutulë misiingë yilësiimbaangë cibindukulu ci likuumbi. Fë mbusë, baawu bisë zibulë n'leli fë ntwaalë li likuumbi, bwiinji mpeemo yivekumukë mu ndaambu luvwa.

⁴¹ Kasi baawu bëye vakëmë mu cisengini ci m'bu i likuumbi kukakëmë. Soonji likuumbi yisë vakëmë mu cisengini i lisë be podi ko kunikukë, kasi mbaandu likuumbi yibulikë, cibilë mëyo mabë ngolo.

⁴² Mësodaadi bëlëtoombë kuvoondë bakë booso banë babë mu buloko, mu kumaangë wun'viipë mu nkoongaawu kutiinë mu kusukë.

⁴³ Kasi n'kuluutu Loomë wulëtiisi kuvuuci Poolë i wusë bëfuungë mu kusiilë katiboobo. Naandi wuvaanë n'swa ke banë bëzaabë kusukë mu kuyilakë mu masi i kusuundë tee fanë fëke n'toto.

⁴⁴ Bëmesë nkanë bëfitë makë fë yilu mëbayë mu kubëlaandë kaambofo mu bivesu bi likuumbi, mu boobo bakë booso biyitukilë fë n'toto n'cyeembo n'cinyi.