Mëvaangë 26 - N’KANGULU WUMOONË

Poolë wakuyinwaninë cikaangë fë ntwaalë Agiliipë

¹ N'tinu Agiliipë wusë kaambë Poolë : « Njeeyi wuke yi n'swa mu kuyinwaanë cikaangë. » Mu lyaawu, Poolë wunangunë kooko i wusë tubilë abu mu kuyinwaninë cikaangë :

² « A n'tinu Agiliipë, bubwayi aci miinu yike liyaanji mu kuyinwaninë cikaangë fë ntwaalaaku mu makë mooso manë Sizwiifë bëke kun'fwikilaangë.

³ Licyelikë, njeeyi wuzabisi buboti cikulu ci Sizwiifë i mëbooti maawu bën'findënaangë simpakë. Mweeni, miinu njeeyi yin'loombë mu kun'kuwulu buboti. »

⁴ « Sizwiifë syooso bëzaabë buni bubeelë luziingu lwaami, kutoonë fë bulesi bwaami, cibilë baawu be zaabë bunë miinu, yilë zingilaangë ku Yelusaleemë fë meeyi mboongwaami.

⁵ Yoonoobo baawu bë kun'zaabë i kupodi kuvaanë cimbaanji ningë bëlizolisi ti miinu yabë yizingilë mu cinguuku ci Sifalisyaanu cyabë yi mikaandu yivyokililë ngolo mu libuundu liitu.

⁶ Mu ntaangu be yiiyi, bëlë mu kun'fundisi mu cibilë ci civuufu cyaami mu lukanyu lunë Nzaambi kuvaanë ke sinkaakë siitu.

⁷ Likuumi li bifuumbë bi byooli bi mëkaandë miitu beekë yi civuufu ti Nzaambi wun'dukisi lukanyu be lu lunaani mu ke n'salilaangë bwiilu ku bwiilu muunyi ku muunyi bitu kuvolë ve. N'tinu Agiliipë, mu cibilë ci civuufu be cyooci, cyaawu Sizwiifë bëkun'fuundilë!

⁸ Beeno Sizwiifë, cibilë-mbici lun'kaambu kucikuninë ti, Nzaambi wun'vulumunaangë baatu bëfwa?

⁹ Minuveekë, yabalë mu kunwanisi mu yosuku mpilë bilaanzi bi Yeesu li Nazaleetë.

¹⁰ Maambu be moomë, maawu yivaangë ku Yelusaleemë. Miinu yibakë n'swa kuke sifumu si singangë-Nzaambi i yisë tuulë mpaapë bitamaanë mu buloko. Ntaangu bëlëbëtabulilë lufwa, yilëcikunaangë.

¹¹ Yosuku ntaangu, yilëvyokilaangë mu bizutununu byooso bi Sizwiifë, yilëvangisyaangë beenë simpasi bitamaanë. Yilëbëfun'ngaangë mu bubaalu booso bëleembu kuta maanë mu lizinë li Yeesu. Miinu yilëbangaangë beenë yi likaanzi mu baawu i yilë ke bëlaandaangë tee mu mëvulë më beeni. »

Poolë wakun'tubë luvilukulu lwaandi

¹² « Mu lyalyooli, miinu yisë kweendë ku livulë li Damaasë mu lutumu i mu n'swa wunë sifumu si singangë-Nzaambi bëkum'paanë.

¹³ A n'tinu Agiliipë, mu teepu yi ntaangu mbata, ntaangu yo yabë yibeelë mu nzilë, yisë monë cyeseesë cifuminë ku yilu. Cyaawu mwiinji kusamë kuvyokilë muunyi. Cyaawu cilëlësikaangë i cisë kun'zukë yimunë bayaami bë mweendo.

¹⁴ Beeso booso tusë bwa fë n'toto i miinu yisë kuwu mbeembu yilukun'kaambilë mu ci Alameyeenë : “A Sawuulë, a Sawuulë, cibilë-mbici njeeyi wulë mu kum'pangisi simpasye? Mu buunë kwaandi tokë njeeyi wulë mu kutunzukënë mu n'veengu.”

¹⁵ Miinu yisë kufulë : “A Fumu, njeeyi nani wukeeli?” Fumu wusë vutulë : “Miinu Yeesu wunë njeeyi wulë mu kuvangisi simpasi.

¹⁶ Kasi, kotukë i telëmë. Miinu yakumonikinë, bwiinji wuba ciseelu cyaami i mbaanjyaami mu makë mooso i buni yakukumonikënë i mu maambu mo syayikuleesyooso.

¹⁷ Miinu yikubotulë mu myooko Sizwiifë i banë bëkeeli Sizwiifë ko, fanë yikufilë.

¹⁸ Miinu yilë mu kukufilë, bwiinji wubëzibulë meeso, wubëbotulë ku citoombi i wubënatë ku cyeseesë, wubëyobulë mu lutumu lu Satënë mu kubënatë ku lwaangu lu Nzaambi. Ningë baawu bën'ta maanë mu miinu, baawu bën'tambulë lobukulu lu mësumu maawu i bëm'bakë ciikë fë meeyi baatu banë Nzaambi kusoolë.” »

Poolë wakun'tubilë mu cisalu cyaandi

¹⁹ « Mu lyaawu, n'tinu Agiliipë, yisye maangë ko kucinzikë cyeendë-meeso cyafuminë ku yilu.

²⁰ Kasi yiloongoobo ntetë basë Damaasë i bo bë Yelusaleemë, basë libweeti lyooso li Zudee i baatu bë mëloongo mën'ka. Miinu yisë bëkaambë mu kubalulë mëvaangë maawu, bëbalukë ke Nzaambi i bëleesi mëvaangë më luvilukulu lwaawu.

²¹ Mu lyalyooli, bunë yabë mu n'zo-Nzaambi, Sizwiifë bisë kun'kaangë i bëtoombë kum'poondë.

²² Kasi tee yi zwaalu, Nzaambi wulë mu kun'keelë i yikeelyooso afa mu kuta cimbaanji fë ntwaalë baatu bakë booso: ke bibabanë i kuke bëkuluutu. I yisë n'sisimini maambu mën'ka ko kasi kanuku mo mibici i Moyiizë bëtubë ti maawu mëfwenikini kuvangënë :

²³ Kliistu wum'monë simpasi, naandi na muutu wun'tetë wuvulumukë mu nkoongë bëfwa i wun'tendulë cyeseesë ci luvukulu ke Sizwiifë i banë bëkeeli Sizwiifë ko. »

Poolë wakaambë Agiliipë mu kuta lyaanë

²⁴ Bunë Poolë wulënwaanë cikaangë, Fesëtuusë wusë tubë yi nkasu : « A Poolë, njeeyi walawukë! Njeeyi luzaabu lwiinji i lwaawu lwakuvangisi kubutë bulawu! »

²⁵ Poolë wusë n'vutulë : « Mweeni, yisye lawukë ko. Make mooso yilë mu kutubë, mëke mëcyelikë i mësulëmë.

²⁶ N'tinu Agiliipë wuzabisi maambu be moomo. Bwaawu, yim'podi kutubilë maawu fë ciyalëlë. Bunë yim'balë ti, naandi wusë n'ziimbë ko maambu makë mooso manë yilë mu kutubë, cibilë maawu mësye vangëninë ko ku mëswamunu, ku ntokoongo.

²⁷ A n'tinu Agiliipë, njeeyi wata lyaanë mu maambu mo mibici bëtendulë? Miinu yizabisi ti njeeyi wata lyaanë. »

²⁸ N'tinu Agiliipë wusë kaambë Poolë : « Njeeyi wun'toombë miinu yiba citamaanë buyifanwe? »

²⁹ Poolë wusë vutulë : « Bosuku bëbeeli buyifanwabu kaambofo kutwaalë yikwendë, miinu yilë mu kusambilë Nzaambi yake tokë njeeyi, kasi yivaandi mu cibilë ci bakë booso bëke yiinu banë bëke mu kun'yuwulu bubwayi aci, lwe baanu bo buke miinu, yaaku ti mu simpaangë asi ko! »

³⁰ Fë mbusë kuwu maambu omo, n'tinu Agiliipë i yi n'kuluutu cinzonzi Bëleniisë i bakë booso babë yaandi, bisë telëmë.

³¹ Baawu bisë kweendë ku mpeengë i bisë tubënë baveekë yi baveekë : « Muutu awu wusye vaangë lyosuku lyaambu libi ko, linë lifwenikini kun'tabulilë lufwa, kaambofo, bën'tuulë mu buloko. »

³² Mu lyaawu, Agiliipë wusë kaambë Fesëtuusë : « Muutu awu nkanë twambiikë kwaandi kweendë ningë naandi wusye telë ko n'tinu Loomë. »