Mëvaangë 25 - N’KANGULU WUMOONË

Poolë fë ntwaalë n'kuluutu Fesëtuusë

¹ Fë mbusë bilumbu bi tatu mu kutuukë ku Zudee, Fesëtuusë wusë biikë Sezalee i wusë kweendë ku Yelusaleemë.

² Kuunë, bëkuluutu bë singangë-Nzaambi i baatu bëcinzëmë bë Sizwiifë bisë fuundë Poolë ke naandi. Baawu bisë bëloombë

³ bwiinji bësiilë liboti mu kubëvutulilë Poolë ku Yelusaleemë. Licyelikë, baawu bisë loombë lyaawu cibilë ti baawu bëkotë fuundu mu kuvoondë Poolë mu nzilë.

⁴ Kasi Fesëtuusë wusë vutulë : « Poolë wuke mu buloko ku livulë li Sezalee i mu mwa bilumbu, miveekë yin'vutukënë kwaawu.

⁵ Lyabwiilë obo, biikaanu ti sifumu siinu syeendë yaami i baawu bëkun'fuundë ningë naandi wuvaangë lyaambu libi. »

⁶ Fesëtuusë wusë vaangë naana kaambofo kuumi li bilumbu tokë ke baawu i naandi wusë vutukënë ku livulë li Sezalee. Cilumbu cilandëkënë, naandi wusë kweendë ku cinzonzi i wusë tumë bënatë Poolë.

⁷ Ntaangu Poolë wuyitukilë, Sizwiifë banë bëfuminë ku Yelusaleemë bisë kun'zukë i bisë n'fwikilë mpaapë maambu mëngolo manë naandi wukaambu kubakilë likanë mu kuyitubilë.

⁸ Poolë wusë kuyinwaninë cikaangë mu kutubë : « Miinu yisye vaangë lyosuku lyaambu libi ko mu mikaakë yi Sizwiifë, kaambofo mu n'zo-Nzaambi, voo mu n'tinu Sezaalë. »

⁹ Fesëtuusë wo wulëtoombaangë kutoonzi Sizwiifë, wuyufulë Poolë: « Njeeyi zolisi kweendë ku Yelusaleemë bwiinji bëkun'fundisi fë ntwaalaami mu lyaambu be liilye? »

¹⁰ Poolë wusë vutulë : « Miinu yike fë ntwaalë cinzonzi ci n'tinu Sezaalë, faawu bëkun'fundisi. Miinu yisye vaangë ko lyosuku lyaambu libi fëke Sizwiifë bo njeveekë wulë mu kumweenë buboti.

¹¹ Ningë miinu yivangisi lyaambu libi linë li kun'tabulilë lufwa, yisë maangë kuve kufwa. Kasi ningë ti cin'viipë ci cyelikë cikeeli ko mu maambu manë ba kun'fuundilë, muutu ve wum'podi kun'nyacikë mu myookwaawu. Miinu yin'loombë ti n'tinu wu Loomë wukun'fundisi. »

¹² Mu bwaawu Fesëtuusë bunë kwamani kutubënë yi banë bëkun'vaanaangë ndoonji, wusë vutulë : « Njeeyi watelë n'tinu wu Loomë, boobo njeeyi fwenikini kweendë fë ntwaalë Sezaalë. »

Poolë fë ntwaalë Angiliipa i Bëleniisë

¹³ Fë mbusë mwa bilumbu, n'tinu Angiliipë i mwanaandi n'cyeetu Bëleniisë, bëyisë ku livulë li Sezalee mu kubilë Fesëtuusë.

¹⁴ Bunë bavyoosi m'pooku bilumbu kwaawu, Fesëtuusë wusë kaambë n'tinu Angiliipë lyaambu li Poolë i wusë tubë : « Afaafa fëke muutu mweekë wunë Felikësë kubiikë mu buloko.

¹⁵ Ntaangu yilë kwendilë ku Yelusaleemë, bëkuluutu bë singangë-Nzaambi i bëkuluutu bi Sizwiifë bisë n'fuundë i bisë kun'doombë mu kun'fundisi.

¹⁶ Miinu yisë bëkaambë ti basë Loomë bëkeeli ko yi ciipë ci kufundisi muutu fë ntwaalë simbeenyi syaandi, naandi kukaambu kubakë luvoto mu kuyinwaninë.

¹⁷ Mu lyaawu, baawu bisë kwiisë aku yimunë miinu. I kuvyoosi ve ntaangu, mo mu cilumbu cilandëkënë, yisë boongë ciikë ku cinzonzi i yisë vaanë n'swa mo bëkun'twalilë muutu be woowo.

¹⁸ Bo bëlën'fuundë bisë monikë, kasi baawu bësye n'fuundë ko mu lyosuku libi linë yilëbalë miinu.

¹⁹ Baawu bisë bakënë tokë simpakë yimunë naandi mu cibilë ci Yeesu i wunë Poolë wulësisiminaangë ti wuke moonyi.

²⁰ Kaambofo yisë monë ko buni yifwenikini kuteetë lyaambu li mpilë olyo. Mu lyalyooli, miinu yisë kaambë Poolë mu kweendë ku Yelusaleemë, bwiinji bën'fundisi mu lyaambu be lyooli.

²¹ Kasi Poolë wusë dungëmë: naandi wusë kuloombë n'kuluutu mu kuteetë lyaambu lyaandi. Miinu yisë kuvaanë n'swa mu kun'luundë mu buloko tee yi fanë miinu yikun'fililë kuke n'tinu wu Loomë. »

²² Angiliipë wusë kaambë Fesëtuusë: « Minuveekë yin'tiisi kuwu muutu be woowo. » – Fesëtuusë wusë n'vutulilë : « Mbasi-menë njeeyi wukun'kuwu. »

²³ Cilumbu cilandëkënë, Angiliipë i Bëleniisë bisë kwisilë mu ndumu wunenë i bisë kotë ku cinzonzi, yimunë bëkuluutu bë mësodaadi i bënaangë bë livulë. Mu n'swa Fesëtuusë, bisë kutwaalë Poolë.

²⁴ Tee Fesëtuusë wusë tubë : « N'tinu Angiliipë yi beeno booso bëkeeli afa yimunë beeso, lum'monë muutu awu: Sizwiifë syooso bëyikwaambë mu naandi ke miinu, ku livulë li Yelusaleemë tee afa, bwiinji bëkun'fuundë, ke losukaangë ti, naandi wusye fwenikini ko kuziingë.

²⁵ Mu miinu, yisye monë ko lyaambu lyo naandi kwavaangë linë lifwenikini kun'tabulilë lufwa. Kasi, naveekë na wusë loombë ke n'kuluutu Loomë mu kun'fundisi. Mu lyaawu miinu yaboongë lukanyu lu kun'fililë kuunë.

²⁶ Kasi miinu yikeeli ko lyaambu linjiinji li kusonikinë n'kuluutu Loomë mu lyaambu li muutu be woowo. Bwaawu, yan'fundisi fë ntwaaliinu beeno booso. Yiveko, fë ntwaalaaku njeeyi, n'tinu Angiliipë, bwiinji fë mbusë lufundusu, yibakë cikumë ci kusonikë.

²⁷ Obo, bunimbalë buvulu mu kufilë muutu ku buloko bu Loomë, kukaambu kutekë viisi lyaambu libi linë naandi kwavaangë. »