Mëvaangë 21 - N’KANGULU WUMOONË

Poolë wakwendë ku Yelusaleemë

¹ Bunë twakabesënë yaawu, beeso tukotë mu likuumbi mu kweendë ku lweeku lu Koosë. Mu cilumbu cilandëkënë, tuyetuukë ku citumbu ci Loodë. Ntaangu yo tubotukilë kwaawu, beeso tusë kweendë ku Patala.

² Kwa kuunë kunaani kwaawu, tuyetakënë likuumbi lilëkwendaangë ku Finiisi. Beeso tukotë mwaawu i tusë ke yendaangë.

³ Ntaangu yo tuyetukilë belë-belë fë citumbu ci Sipëlë, beeso tubiikë cyaawu ku lweeku lu mëcyeetu, bwiinji tweendë ku Siili. Beeso tusikëmë ku Tiilë fanë bëfitë basilë bifundë byabë mu likuumbi.

⁴ Beeso tuyezakënë bitamaanë i tusë vyoosi saambwali li bilumbu yimunë baawu. Mu lusalusu lu Ciluunzi ci Saantu, baawu bëlëkaambaangë Poolë kuleembu kweendë ku Yelusaleemë.

⁵ Bunë lisaambwali li bilumbu lye vyooci, beeso tuyendë i bitamaanë byooso cintwaali yimunë bëcyeetu i baanë baawu bëye tuvekisi tee yi kunë ngaandë livulë. Beeso tufukumë mu ndaambu m'bu i tusambilë.

⁶ Fë mbusë, mu kutukaninë sibweekë si siitu, beeso tukandëmë mu likuumbi i baawu bëvutukënë mu sinzo syaawu.

⁷ Beeso tumanë mweendwiitu mu likuumbi kubotukë fë livulë li Tiila tee yi kunë livulë li Pëtelëmayiisë. Kuunë, tubilë baanë bë nguli i tusë vyoosi cilumbu cimweekë yimunë baawu.

⁸ Cilumbu cilandëkënë, beeso tuyendë i tuyetuukë ku livulë li Sezalee. Kwaawu, beeso tusë kotë ku n'zo n'loonji Filiipë i tukalë ke naandi. Naandi wabë wumweekë mu lisaambwali li baatu banë bësoolu ku Yelusaleemë.

⁹ Naandi wuba yi nduumbë na si binkumbë, silëbikulaangë.

¹⁰ Bunë bavyoosi mwa bilumbu kwaawu, m'bici mweekë, mu lizinë li Agabuusë, wufuminë ku Zudee i wuyisë kuunë.

¹¹ Naandi wuyisë mu kutumonë i wusë boongë likaanji lyo Poolë kuvwaatë mu lucyeto. Naandi wusë yikaangë maalu i myooko i wusë tubë : « Ciluunzi ci Saantu cilë mu kutubilë abu: Sizwiifë si livulë li Yelusaleemë bën'kaangë bo bumweekë muutu wo wubakisi likaanji be lyooli mu lucyeto i baawu bëkun'lekulë ke beeni. »

¹² Bunë twayuwu maambu be moomo, beeso i bayiitu bë livulë li Sezalee, tusë bondililë Poolë mu kuleembu kweendë ku Yelusaleemë.

¹³ Kasi Poolë wusë bëvutulilë : « Cibilë-mbici beeno luke mu kulilë i lun'toombë kum'pangisi n'timë simpasi? Miinu yisye beliminë ko mu kukangëmë tokë mu misiingë, kasi yivaandi mu kucikunë kufwa ku Yelusaleemë mu lizinë li Fumu Yeesu. »

¹⁴ Bunë beeso tusye m'podi ko kuviinji simbalulu syaandi, tusye sisiminë ko i tusë tubë : « Biikë maambu manë Fumu kun'zolë mëvangënë. »

¹⁵ Bunë twavyoosi mwa bilumbu kwaawu, beeso tubëliminë mu kweendë ku Yelusaleemë.

¹⁶ Bilaanzi bë livulë li Sezalee bisë ke tuvekisi. Baawu bisë tunatë ke libakë limweekë, mu lizinë li Mënasoonë, musë Sipëlë, wabë cita maanë ci ntamë.

Poolë ke Zaakë

¹⁷ Bunë twatuuci ku Yelusaleemë, baanë bë nguli bë Cingangë bisë tutambulë mu liyaanji.

¹⁸ Mu cilumbu cilandëkënë, Poolë wusë kweendë yiitu ku n'zo Zaakë fanë bëkuluutu bakë booso bë Cingangë bëdukëninë.

¹⁹ Poolë wusë bëbilë i wusë bëkaambë maambu makë mooso manë naandi wabë kuvaangë mu lutumu lu Nzaambi fë meeyi yi banë bëkeeli ko Sizwiifë.

²⁰ Bunë ban'yuwu, bisë dumisi Nzaambi i bisë kaambë Poolë: « Wamonee mwaanë nguli, buni lutaangu lunenë lu Sizwiifë beekë sikleentë i bëlë mu kulaandë yi bungelë booso n'kaakë.

²¹ Kosuku, tala mo bëbëkaambë: njeeyi wun'loongë ke Sizwiifë syakë syooso bën'zingilë fë meeyi mëkaandë mën'ka, mu kuvubikë n'kaakë Moyiizë, mu kuleembu kubukë bubakëlë bu baanë baawu i mu kuleembu kulaandë bifu bi Sizwiifë.

²² Buni bu kusiilee? Cyelikë baawu syabëzaabë ti, nje wakutuukë.

²³ Oboobo, we vaanji manë twakukaambë. Beeso tukeeli afa bëbakëlë bë na balefë mpesë.

²⁴ Bënati, takësënë yaawu mu cyaangë ci bulyoomisi i futë mikanwaawu bwiinji bëbëbotulë mileenji yi n'tu. Mu lyaawu, baatu bakë booso bën'zaabë ti maambu mo bëtubë mu nyitwaaku mëkeeli ko mëcyelikë. Yaawu yileesi ti njeeyi yivaaku, njeeyi wun'cizikaangë mu n'kaakë Moyiizë.

²⁵ Mu banë bëkeeli ko Sizwiifë beekë sikleentë, beeso tubësonikinë mu kubëvaanë manë tuzitikë : baawu bësye fwaanë ko kulya cibulu cinë bakwindulë buka likabu kuke bintumbë, ketë meengë, kaambofo n'sunyi cibulu bëfisë cikongulu. Baawu bësye fwaanë ko kuvaangë cinduumbë. »

²⁶ Mu cilumbu cilandëkënë, Poolë wusë kweendë yi baatu beenë bë na i naandi wusë kutoonë yi baawu cyaangë ci bulyoomisi. Fë mbusë, naandi wusë kotë ku n'zo-Nzaambi mu kubëkaambë ntaangu mbici bilumbu bi kulyomisi bim'maninë, dedë mweekë bën'tubë, ntaangu mbici bufwenikini kukwindulë likabu mu kadë muutu mu baawu.

Poolë bam'bwiilë mu n'zo-Nzaambi

²⁷ Ntaangu yo lisaambwali li bilumbu litalë mu kumanë, mwa mpooko Sizwiifë si libweeti li Aziiya bisë monë Poolë ku n'zo-Nzaambi. Baawu bisë sindikilë nkoongë i bisë m'bwiilë Poolë.

²⁸ Baawu bëlëlosukaangë : « A basë Islayeelë, yisaanu lutuvaanë myooko. Talaanu muutu awu, wun'kwendaangë mwakë mooso, bwiinji kuloongë baatu bakë booso mu kumaangë kucinzikë basë Islayeelë i n'kaakë Moyiizë i n'zo-Nzaambi. Ntaangu ayi, naandi wakosi banë bëkeeli ko Sizwiifë munë kati ku n'zo-Nzaambi i naandi wasumunë faamë afa fë saantu! »

²⁹ Baawu bisë tubilë obo, cibilë bamoni Tolëfiimë musë Efeesë yimunë Poolë mu livulë i baawu bëbalë ti Poolë wabë wubë nkosi mu n'zo-Nzaambi.

³⁰ N'tyatyamu wusë vangënë ku livulë lyooso i baatu bëlë tiinë sinkoonzu syakë syooso. Baawu bisë bwiilë Poolë i bisë m'baasi mëlengë-lengë ku ngaandë i bisë kaangë mëvitu më n'zo-Nzaambi.

³¹ Baawu bëlëtoombaangë kuvoondë Poolë, bunë bayisë mu kutendulë saangu ke kumandë ku mësodaadi më Loomë ti Yelusaleemë yooso yeekë mu n'tyatyamu.

³² Mëlengë-lengë naandi, bëkuluutu bë mësodaadi i mësodaadi më Loomë bisë kumbelëlë kunë kuba nkoongë. Ntaangu yo baatu bëm'monë fë cimweekë yimunë mësodaadi, baawu bisë biikë mu kubulë Poolë.

³³ Mu lyaawu, kumandë wusë belëmë Poolë, wusë kaangë Poolë i wuvaanë n'swa mo bën'kaangilë mu mpaangë wali, naandi wusë kufëlë na kukeeli i manë kuvaangë.

³⁴ Kasi munë nkoongë, wosuku muutu wulëlosukaangë mu yaandi mpilë. Bunë ncyeembi yalutili beenë munë nkoongë, kumandë wusye podi ko kuwu maambu mo mëlëvangënë. Mu lyaawu, naandi wusë vaanë n'swa wukunatë Poolë kunë kun'kalilaangë mësodaadi.

³⁵ Ntaangu yo naandi wuyitukilë fë ntonunu cikaadë, mësodaadi bisë n'nangunë, cibilë baatu bëlëtoombaangë kun'vaangë simbi.

³⁶ Licyelikë, bakë booso bëlën'laandaangë, ke losukaangë : « Fwa! »

Poolë wakuyinwaninë cikaangë

³⁷ Ntaangu yo bëlëtoombë kun'kosi ko kuba mësodaadi, naandi wusë kaambë n'kuluutu-mësodaadi : « Miinu yim'podi kukaambë mwa lyaambwe? » N'kuluutu-mësodaadi wusë kun'yufulë : « Njeeyi bëzaabë kutubë cingeleekë? »

³⁸ « Njeeyi wukeeli ko musë Zipiitë wo, buyifanu wavaangë n'tyatyamu i wanatë ku ntaandu ciyumi biveefi bi na bi bivoondë baatwe? »

³⁹ Poolë wuvutulë : « Miinu Zwiifë yikeeli, yibutu ku Talësiisë ku libweeti li Siliisi, likakëtë li livulë like beenë bunenë. Mpaani n'swa, më naanë ama, mo yikaambë baatu. »

⁴⁰ Kumandë wusë vaanë Poolë n'swa mu kubëkaambë. Poolë wusë telëmë fë cikaadë, wunangunë kooko bwiinji baatu bëlingëmë. Baatu bakë booso bisë lingëmë swii i Poolë wusë bëkaambilë mu mbeembu yi Ameleyeenë :