Mëvaangë 20 - N’KANGULU WUMOONË

Mweendo wu Poolë ku si Masedwaanë i ku Ngeleesë

¹ Bunë n'tyatyamu wumanë, Poolë wukucikë bitamaanë, kubëcindisi bitu, kubëkaninë i wusë ke yendaangë ku Masedwaanë.

² Naandi wutabë libweeti beenë i wuciinzi banë bëfyaatë mu mpaapë sinkuungu. Naandi wusë bëkwendë ku Ngeleesë,

³ kunë kuvyosililë ngoondë tatu. Fanë kulëbongilë likuumbi mu kweendë ku Siili, bunë kwayuwu ti, Sizwiifë bëlëkotë fuundu mu naandi. Naandyooso wusë boongë lukanyu mu kutabilë ku Masedwaanë.

⁴ Sopateelë, mwaanë Piluusë wu livulë li Belee, wusë n'vekësi, yimunë Alisëtaakë i Sekuundiisë, yi Tesaloniikë, Ngayuusë yi Delëbë, i Timotee, i Tisiikë, Tolëfiimë li libweeti li Aziiya.

⁵ Baawu bëtwaamë i bëye tuviingë ku Tolëwaasë.

⁶ Kasi beeso tusë kandëmë mu kweendë ku Filiipë fë mbusë n'saangu mëmpa mëkaambu m'bweeli i fë bilumbu bi taanu fë mbusë, tusë ke bëzakënë ku Tolëwaasë. Tuvyoosi kwaawu saambwali li bilumbu.

Mweendo siitu wu Poolë ku Tolëwaasë

⁷ Mësikë më cilumbu ci saba, beeso tusë dukënë mu kulya limpa li cintwaali i Poolë wulëkaambaangë nkoongë. Bunë kukanë kweendë cilumbu cilandëkënë, naandi wusë vaangë cinzonzi tee mu katyaasi ku bwiilu.

⁸ Miindë yi mpaapë yabë yitatëmë mu civingë twabë ku cibaangë kunë tudukuninë.

⁹ N'teendë cilesi ci bakëlë cimweekë, mu lizinë, li Etikuusë wabë wukalë fë yilu n'kukulë libayi li neelë n'zo i wulëyidofaangë tolo ntaangu yo Poolë kulëlandëkënë kuloongë. Bunë tolo twalutilë, wusë cidëmë kunë yilu cibaangë cin'tatu tee fësi. Bunë bëtoombë kun'nangunë, naandi wabë wafwa.

¹⁰ Poolë kukulukë i kunonukë fë yilwaandi, kum'boongë mu myooko i wusë tubë : « Nubacyaanu boomë ko i naandi wuke moonyi! »

¹¹ Fë mbusë, wumakooso ku civingë, kumukënë limpa i kulya. Bunë kwatubyooso, tee fanë bwiisi bucyeelë, fë mbusë, wusë kweendë.

¹² Baawu bënatë cilesi bakëlë ci moonyi i lyaawu lisë ciinzi bakë booso.

Mweendo ku Tolëwaasë tee ku Milee

¹³ Beeso tusë deelë kweendë mu likuumbi lyo litunatë ku Asoosë, kunë tukanë mu kuboongë Poolë. Mati lyalyooli lyaawu tukanë, cibilë ti naandi wukanë kwendilë lu nzilë.

¹⁴ Bunë naandi wuyituzakënë ku Asoosë, beeso tusë m'boongë mu kweendë yaandi ku Mitileenë.

¹⁵ Faawu ofo, tuvutukënë i tutuukë lëlemënë ku Syoo. Mu cilumbu cilandëkënë, tubelëmë ku Samoosë i mu cilumbu cin'ka, beeso tubelëmë ku Milee.

¹⁶ Licyelikë Poolë wuboongë lukanyu mu kutabilë ku Efeesë i wusye sikëmë faawu ko, bwiinji kuleembu kuvyoosi ntaangu ku libweeti li Aziiya. Naandi wulëtoombaangë kulengë tuukë ku Yelusaleemë ningë lyaawu lim'podi kuvangënë mu cilumbu ci n'saangu wu Pantëkootë.

Cinzonzi ci Poolë ke bëkuluutu bë Efeesë

¹⁷ Poolë wufilë cipayi ci Milee ku Efeesë, mu kutelë bëkuluutu bë Cingangë.

¹⁸ Ntaangu yo bëyetuukë fanë fabë naandi, wusë bëkaambë : « Beeno luzabisi buni yilëzingilaangë fë meeyiinu beeno booso, kutatikilë cilumbu cin'tetë cinë yiyitukilë ku libweeti li Aziiya.

¹⁹ Miinu yisalilë Fumu Yeesu mu bubonzulu booso, yimunë mësweelë fë meeyi simpasi sinë fumu Sizwiifë wulëkum'pangaangë.

²⁰ Beeno luzabisi ti, miinu yisye sweekë lyaambu ko mu linë lifitë ba linjiinji mu beeno. Miinu yilukaambë i yiluloongë maambu makë mooso fë ciyalëlë i mu sinzo siinu.

²¹ Miinu yitelë Sizwiifë i banë bëkeeli ko Sizwiifë mu kuvilukë i mu kuta maanë mu Fumwiitu Yeesu.

²² Ntaangu be yiiyi, yilë mu kweendë ku Yelusaleemë kunë Ciluunzi ci Saantu cilë mu kun'tumë i yisye zaabë ko maambu manë më kun'yisilë.

²³ Miinu yibe zaabë mu lyosuku livulë, Ciluunzi ci Saantu cyakun'zabikini ti, buloko i simpasi sike mu kun'ciingë.

²⁴ Kasi mu miinu, luziingu lwaami lukeeli lu njiinji ko. Maambu mo mënjiinji, yituukë fë siitu cisalu cinë Fumu Yeesu wukum'paanë: kutendulë Mpolu Mboti yin'leesi baatu buboti bu Nzaambi. »

²⁵ « Miinu yitabilë ke beeno mu kululeesi Lwaangu lu Nzaambi. Kasi ntaangu ayi, yibe zaabë ti beeno lusë be kum'monooso ko.

²⁶ Mati mu bwaawu, yilë mu kulusisiminë bubwayi aci : ningë wumweekë mu beeno wum'maangë Nzaambi, lyaawu lisë kun'talë ko.

²⁷ Cibilë, yilutendulilë maambu mo Nzaambi kukanë i yisye lusweekë lin'viipë ko.

²⁸ Zungululaanu mu mboongu yooso yinë Ciluunzi ci Saantu civangisi beeno kuba miluungë, lwe kebaanu buboti Cingangë ci Nzaambi cinë naandi kuvuuci mu lufwa lu mwanaandi, Yeesu Kliistu.

²⁹ Miinu yizabisi ti, fë mbusaami, baatu dedë mweekë bikoomo bën'kotë fë meeyiinu i bën'toombë kutyamunë bitamaanë.

³⁰ Bën'ka fë meeyiinu bën'tubë maambu mu lupuutu, bwiinji bënatë bitamaanë mu nkoongaawu.

³¹ Mu lyaawu, kebaanu i tebukaanu moonyi fë mivu tatu, bwiilu ku bwiilu, muunyi ku muunyi, miinu yisye volë bitu ko yimunë mësweelë, mu kuciinzi wumweekë-wumweekë mu nkoongiinu. »

³² « Ntaangu be yiiyi, yilë mu kulubiikë mu myooko Nzaambi i mu lutumu lu maambu maandi mëboti. Naandi wuke yi mëkanë më kuluciinzi mu ciminu i mu kuluvaanë maambu mo naandi kukanyi ke baatu bakë booso banë bën'ta maanë mu naandi.

³³ Miinu yisye tuulë ko cideenzë cyaami mu mboongo, mu woolë, kaambofo, mu mivwaatu yi baatu.

³⁴ Beeno luzabisi benuveekë ti, yilësalilaangë mu myookwaami, bwiinji minuveekë yibakë yi bayaami binë baawu bëm'podi kuba yi n'ciinzë.

³⁵ Miinu yiluleesi mu makë mooso, lufwenikini kusalilë boobo, mu kuzudi biyeembi, mu kutebukë moonyi mu maambu mo naveekë Fumu Yeesu kutubë : “Nyeenzi beenë mu kuvaanë ke yikutambulë!” »

³⁶ Ma moomo mëtubu, Poolë wusë kukumë yimunë baawu i wusë sambilë.

³⁷ Bakë booso bëlëlilaangë i bisë kubuumbë Poolë mu kun'vaanë lufifu lu siitu.

³⁸ Baawu bisë ba mu cyuundë cinenë, cibilë naandi wubëkaambë ti, baawu kusë bëkum'monooso ko. Fë mbusë, baawu bisë ke n'vekisi tee fë likuumbi.