Mëvaangë 2 - N’KANGULU WUMOONË

Lwisulu lu Ciluunzi ci Saantu

¹ Bunë cilumbu ci n'saangu wu Pantekootë cyatuuci, bitamaanë byooso bëyidukënë fë cimweekë.

² Kuzimbukulabu, ncyeembi yifuminë ku yilu, dedë mweekë mpeemu-ngudi yilëpukumukë i kuwaasi n'zo yakë yooso fanë baawu bëyabë bëkalë.

³ Mu lyaawu, baawu bisë monë sindakë sifwanëkënë yi milaku-mbaasu. Maawu misë ke kabukaangë i ke tetëmaangë fë yilu n'tu wu kadë muutu mu banë bëyabë faawu.

⁴ Babooso bisë kuwaalë Ciluunzi ci Saantu i bisë toonë kutubë simbeembu sin'ka mu kumonë bunë Ciluunzi cilë mu kubëvangisi kutubë.

⁵ Ku Yelusaleemë kulëkalilaangë Sizwiifë babë sisu mu Nzaambi, bëfuminë mu sisi syooso si buloongo.

⁶ Ntaangu yo ncyeembi beenë yisë kuwukunu, bakë booso bisë kudukënë faawu mu lukoongu. Baawu bisë siminë kubookë, cibilë kadë muutu mu baawu wulëbëyuwulwaangë mu mbeembwaandi bwaalë.

⁷ Baawu bisë ke siminaangë i ke bookaangë i bisë kutubë : « Baatu obo bëlë mu kutubë, bëkeeli ko bakë booso basë libweeti li Ngalilee?

⁸ Bwa kwisilë buni ti, wosuku muutu mu beeso kubëyuwulwaangë mu mbeembyaandi bwaalë?

⁹ Fë meeyiitu beeso ke bën'viipë bafuminë ku Paleetë, Medi i Elaamë. Ke yivaandi bo bafuminë ku Mezopotami, ku Zudee, ku Kapadoosë, ku Poontë, ku libweeti li Aziiya,

¹⁰ ku Filizi, ku Panfili, ku Zipiitë i libweeti li Sileenë ku Libi. Yivaandi bo bafuminë ku Loomë,

¹¹ ku Keleetë i ku Alabi. Bëmesë Sizwiifë i bën'ka bakotë mu libuundu li Sizwiifë. Yivaandi beeso tulë mu kubëkuwu kutubë mu simbeembu siitu si bwaalë mëvaangë mënjiinji më Nzaambi! »

¹² Bakë booso bëtulumukë, mpaapë yivaandi bësye zaabë kuve linë li kutubë. Baawu yivaandi bisë tubënaangë baveekë i baveekë : « Maambu be maamë, mbici mën'tubë? »

¹³ Kasi baatu bën'ka ke bëdyeengaangë i bisë tubë : « Baawu bakolu mëlafu. »

Bunzonzi bu Pyeelë

¹⁴ Pyeelë kwatelëmi yimunë likuumi wumweekë li mimbunzi, wusë tubë mu mbeembu nkamu kuke nkoongë baatu : « Beeno Sizwiifë i beeno booso lun'kalaangë ku Yelusaleemë, lwe yuwaano buboti mëbuungu maami i lwe bakulaanu manë mëlë mu kuvangënë.

¹⁵ Baatu oboobo bësye kolu mëlafu ko bunë beeno lulë mu kubalilë, cibilë yicini tokë vwa li zoolë yimenë.

¹⁶ Akasi ntaangu be yiiyi, maambu mo mëtubë Zoweelë m'bici mavangënë :

¹⁷ Nzaambi wutubë : Mu bilumbu bi siitu, miinu yin'vaanë Ciluunzi cyaami mu baatu bakë booso. Baanë biinu bëbakëlë i bëcyeetu bëm'bikulë. Miinu yin'tubilë mu byeendë-meeso ke bilesi biinu, i ke binunu biinu mu sindoosi.

¹⁸ Licyelikë, mu bilumbu be binë biina, miinu yin'vaanë Ciluunzi cyaami mu bëbakëlë i mu bëcyeetu banë bëkeeli biseelu byaami, i baawu bëm'bikulë.

¹⁹ Miinu yin'vaangë bimaaku ku yilu. Biliimbu bi kwaatë-yekë fë moongu butoto: “fëm'ba meengë, mbaasu i mëduungë më mwiisi.

²⁰ Muunyi wun'citukë citoombi, i ngoondi kubeengë buke meengë. Maambu makë mooso omo mën'vangënë ntetë cilumbu ci Fumu kutuukë, cilumbu be cyooci cinenë i ci bumpumu

²¹ Mu lyaawu, wosuku muutu wun'sambilë mu lizinë li Fumu, naandi wun'vuukë.” »

²² « Baatu bë Islayeelë, lwe yuwaano maambu yakulukaambë: Yeesu li Nazaleetë wabë muutu wunë Nzaambi kuluzabikini lutumu lwaandi i ke vaangaangë mu naandi mpaapë mpilë bimaaku i biliimbu bi kwaatë-yekë fë meeyiinu beeno, buni benuveekë lulizabili.

²³ Beeno lukulë Yeesu be woowo i beeno lun'voondë i lum'baandë fë kuluusu yimunë bo bëkaambu kuzaabë Nzaambi, bunë Nzaambi kufwikilë ntamë.

²⁴ Kasi Nzaambi wun'vulumunë, cibilë lufwa sye ba yi likanë ko mu kun'simbililë mu lutumu lwaandi.

²⁵ Licyelikë, Daviidë wutubilë mu cibilë cyaandi : “Ntaangu syooso yilëmonaangë Fumu fë ntwaalaami. Naandi ke ku lweeku lwaami lu mëbakëlë, mu kumaangë miinu kutekë bitu mu boomë.

²⁶ Mu lyaawu, n'timaami weekë mu liyaanji, ndakaami yilë mu kuyolë yi sinyeenzi syooso. Nyitwaami yin'kalilë mu civuufu,

²⁷ cibilë ti, njeeyi wusë kum'biikë ko ku buloongo bu baatu bëfwa, njeeyi wusë m'biikë ko, cisasi cyaaku cike yi lufyaatu mu njeeyi, kubolilë mu buumbë.

²⁸ Njeeyi wakun'leesi sinzilë sin'nataangë ku luziingu, wakun'waasi liyaanji fë ntwaalaaku.” »

²⁹ « A baanë yaami bë nguli, miinu yikeeli yi n'swa ko wukulukaambilë fë ciyalëlë n'zisi wu nkaakiitu Daviidë: naandi wufwa, bën'ziikë i tee bubwayi libuumbë lyaandi licini fanë tukeeli.

³⁰ Kasi naandi wabë m'bici, tee naandi wuzaabë ti Nzaambi wun'kanyi mu kulefë-mpesë naandi wum'byaasi wum'mweekë fë meeyi bëtekulu baandi fë ntaanzyaandi.

³¹ Daviidë wumonë ntetë maambu mën'talë luvulumuku lu Kliistu mu lufwa ntaangu yo kutubilë : “Nzaambi wusye m'biikë ko ku buloongo bë baatu bëfwa i wusye biikë ko nyitwaandi kubolë mu buumbë.”

³² Licyelikë, Nzaambi wuvulumunë Yeesu mu bëfwa, wo miinu yike mu kulukaambë i beeso booso simbaanji tukeeli.

³³ Nzaambi wun'zanjikë i wun'vwandisi ku lweeku lwaandi lu mëbakëlë i kun'vaanë Ciluunzi cyaandi Cisemi cyo kukanyi. Naandi wanyambë cyaawu mu beeso buni luke mu kumweenë i buni luke mu kuwu tee mu bubwayi aci.

³⁴ Licyelikë, Daviidë wusye makë naveekë ko ku yilu, kasi naandi wutubë : “Fumu Nzaambi wukaambë Fumwaami: yisë vwaandë ku mëbakëlë maami,

³⁵ tee yi fanë yin'tulilë simbeenyi syaaku kusi maalu maaku.”

³⁶ Mu lyaawu, baatu bakë booso bë bwaalë bu Islayeelë bëfwenikini kuzaabë ti licyelikë, Yeesu wunë beeno lubaandë fë kuluusu, naandi na Nzaambi kwatuunvi Fumu i Kliistu. »

³⁷ Banë bëyabë kuunë, bisë kubwa libobo mu mitimaawu bunë bayuwu maambu bë moomo. Baawu bisë kufulë Pyeelë i mimbunzi yin'ka : « A baanë baami bë nguli, buni beeso tufwenikini kusiile? »

³⁸ Pyeelë wusë bëvutulilë : « Lwe balulyaanu mëvaangë miinu i wosuku muutu we batizyaalu mu lizinë li Yeesu Kliistu bwiinji bën'lenvukilë mësumu maandi i beeno lun'taambulë likabu li Ciluunzi ci Saantu.

³⁹ Licyelikë, Nzaambi wuvaanë lukanyu alu mu beeno i mu baanë biinu, yivaandi mu bo bën'zingilë cinaanu: mu bakë booso banë Fumu Nzaambiitu kun'telë. »

⁴⁰ Pyeelë wusë be bëkaambooso mpaapë mëbuungu mën'ka mu kubëvangisi kucikunë i kubëvaanë n'viingu. Naandi wulëtubaangë : « Lwe vuucyaanu mu kumaangë beeno kubakë kastikë yinë yim'bakë liloongu li baatu bën'vangaangë mëbi. »

⁴¹ Banë bëvitike mëbuungu mo Pyeelë kutubë, bëbatizyaalu. Munë cilumbu beenë, kwaasu ku biveefi bi tatu bi baatu bisë bundënë mu nkoongë bitamaanë.

Luziingu lu bitamaanë

⁴² Bakë booso, bisë tuulë n'timë mu kuwu ntaangu syakë syooso ndongulu yilëvaanaangë mimbunzi i kuzingilë mu lubundunu lu baanë bë nguli mu kwambulë i kusambilë fë cimweekë.

⁴³ Baatu bakë booso bëlëmonaangë boomë mu cibilë ci bimaaku i biliimbu bimpaapë bi kwaatë-yekë, bilëvaangaangë mimbunzi.

⁴⁴ Bitamaanë byooso, babë bëdukënë mu cindiku i bëlëbundaangë fë cimweekë biimë byaawu.

⁴⁵ Baawu bëlësumbisyaangë tupaangu i biimë byaawu. Baawu bëlëkabësënaangë simboongo bunë bwabilë n'ciinzë wu kadë muutu.

⁴⁶ Bilumbu byakë byooso, baawu bëlë dukunaangë mu n'zo-Nzaambi. Baawu bëlëkabësënaangë i bëlëkwambulaangë ndiiwu mu sinzo syaawu mu liyaanji lyooso i mu n'timë wutukukë.

⁴⁷ Baawu bisë ke dumisyaangë Nzaambi i baatu bakë booso bëlë ke bëzolaangë. Kadë cilumbu, naveekë Fumu wulë ke bweelaangë mu nkoongë bitamaanë, banë naandi kuluvuuci.