Mëvaangë 19 - N’KANGULU WUMOONË

Poolë ku Efeesë

¹ Bunë Apoloosë wabë ku Koleentë, Poolë wusë kutabë libweeti li myoongo Aziiya i wusë tuukë ku Efeesë. Naandi wusë ke takënë kwaawu mwa m'pooku bilaanzi,

² i wusë bëyufulë : « Beeno lutambulaanu Ciluunzi ci Saantu bunë beeno luta maanë? » Baawu bisë kun'vutulilë : « Beeso tubuunë vyaasi kuwu muutu kutukaambilë mu Ciluunzi ci Saantu. »

³ Poolë wusë be bëyufulë : « Mpilë mbi lubatizyaalu lutambulaanu beeno? » Baawu bisë n'vutulilë : « Lubatizyaalu lu Za. »

⁴ Poolë wusë bëkaambë : « Za wubatizyaalë banë bëta maanë mu kubalulë mëvaangë maawu i wukaambë nkoongë Islayeelë mu kuta maanë ke wunë wufwenikini kwiisë fë mbusaandi, dedë ti mu Yeesu. »

⁵ Fë mbusë bunë bayuwu maambu be moomo, baawu bisë batizyaalu mu lizinë li Fumu Yeesu.

⁶ Poolë wusë bëtendikë myooko i Ciluunzi ci Saantu cisë kulumukë mu baawu. Baawu bisë toonë kutubë mu simbeembu sikaambu kuzabëkënë i bëlëbikulaangë.

⁷ Baawu babë kwaasu kuumi baatu bwaali.

⁸ Poolë wulëkwendaangë yosuku ntaangu ku cizutununu i fë ngoondi tatu, naandi wulëtubilaangë yi civuufu cyooso. Naandi wulëtubilaangë mu Lwaangu lu Nzaambi i wulëvaangaangë mëngolo mu kukondulë banë bëlën'yuwulwaangë.

⁹ Kasi baatu bëmesë babë mitimë ngolo, bëmaangë kwaawu kuta maanë, tiilyoko baawu bëlëdyeengë liloonji lin'talë Nzilë Fumu fë ntwaalë bakë booso. Mu lyaawu, Poolë wusë bëbiikë i wunatë bilaanzi i wubëloongilaangë kadë cilumbu ku cikoolë ci muutu bën'teelë Tilaniisë.

¹⁰ Lya lyooli lisë ziingë fë mivu wali, mu kumonë ti bakë booso bëlëziingaangë ku libweeti li Aziiya, Sizwiifë i banë bëkeeli ko Sizwiifë, bëyuwu libuungu li Fumu.

Baanë bë Seva

¹¹ Nzaambi wulëvangaangë bimaaku bi kwaatë-yekë mu na Poolë.

¹² Mati bwaawu, bëlëtwaalaangë kuke bibeedo milelë, kaambofo mëleeso, bëlëtulaangë mu nyitu Poolë : baawu bisë kubuku mu sincyeenzu syaawu i biluunzi bibi bilëbasikaangë mu sin'nyitu syaawu.

¹³ Mwa Sizwiifë sin'ka, banë bëlëkwendaangë fosuku faama bwiinji bëkulë biluunzi bibi mu bibeedo, baawu bëlëkwelikaangë kusalilë lizinë li Fumu Yeesu. Baawu bëlëkaambaangë ke biluunzi bibi : « Miinu, beeno yilë mu kulutumë mu kubasikë mu nyitu muutu awu mu lizinë li Yeesu wunë Poolë wulë mu kulongilë! »

¹⁴ Bwa boobo bwaawu bëlësiilaangë lisaambwali li baanë bë n'kuluutu ngangë-Nzaambi Zwiifë bën'telaangë Seva.

¹⁵ Kasi cilumbu cimweekë, ciluunzi cibi cisë bëkaambë : « Miinu yizabisi Yeesu i yibe zaabë nani Poolë kukeeli. Kasi beeno, nani lukeelye? »

¹⁶ Muutu wunë wabë ciluunzi cibi wusë bënwanisi i wuvyokili bakë booso mëngolo. Naandi wusë bëvangisi beenë simpasi. Baawu bëtiinë n'zwaandi mpenë i simbeenzë mu n'nyitu.

¹⁷ Baatu bakë booso bë Efeesë, Sizwiifë i banë bëkeeli ko Sizwiifë, bëyuwu maambu manë mëvangënë, bakë booso bisë ba yi boomë i bisë bakë sisu mu lizinë li Fumu Yeesu.

¹⁸ Mu banë bëta maanë, mpaapë bëlëkwisaangë mu kuvaanë cimbaanji fë ciyalëlë, libi linë baawu bëvaangë.

¹⁹ Lutaangu lunenë lu banë bëlëvaangaangë mëyoombo bisë natë mëbuuku maawu i bisë mëkookë fë ciyalëlë. Bëtaangë luvunu lu mëbuuku beenë i bisë bakë mëkumë-taanu më biveefi më binkongolo bi mboongo.

²⁰ Mu lyalyooli, mu luleendo lu Fumu libuungu li Nzaambi lilutilë kunyambë mu sinkoonzu syakë syooso i mpaapë baatu bisë ta maanë.

N'tyatyamu ku Efeesë

²¹ Fë mbusë maambu makë mooso omo, Poolë wusë boongë lukanyu lu kuvyokilë ku Masedwaanë i ku Akaayi, bwiinji kutuukë ku Yelusaleemë. Naandi wulëtubilë abu : « Bunë yin'tuukë kwaawu, bufwenikini yivaandi kweendë ku Loomë. »

²² Mu lyaawu, naandi wusë filë baatu bwaali bo bëlën'vaanë myooko, Timotee i Elaastë, kasi naveekë wusë be syaalë fë mwa mpooko bilumbu ku libweeti Aziiya.

²³ Mu teepu beenë, n'tyatyamu wusë vangënë ku Efeesë mu cibilë ci liloonji linë lin'talë Nzilë yi Fumu.

²⁴ Cisasi cimweekë, mu lizinë li Demëtiluusë, wulëlulikaangë bilungë mu limanyi li palaatë bintumbë bi n'zo-Nzaambi, bi n'kisisi wunenë bën'teelë Alëtemiisë. Naandi wulëvaanë simboongo simpaapë kuke bisasi.

²⁵ Naandi wusë kucikë bisasi, banë bëlësalaangë cisalu ci mpilë ocyo i wusë bëkaambë : « A bayaami, beeno luzabisi ti businë bwiitu bun'fuminaangë mu cisalu aci.

²⁶ Kasi beeno luke mu kumonë kaambofo lun'kuwu manë mëlë mu kuvyookë : Poolë wulë mu kutubë ti, cyelikë, sinzaambi syo baatu bëfikulë mu myookwaawu, sikeeli ko sinzaambi. Naandi wusë kukondëlë nkoongë baatu yaaku tokë afa, ku Efeesë, kasi mu libweeti lyooso li Aziiya.

²⁷ Lya lyooli kupodi kuvangisi cisalu ciiti kufwa i kuvangisi saangu yi n'zo n'kisisi wunenë Alëtemiisë kudiifë. Mu lyaawu, n'kisisi Alëtemiisë, wunë baatu bakë booso bë libweeti li Aziiya i banë bëke mu buloongo n'viipë bën'kuundaangë, kusë bë bëm'bakooso sisu ko. »

²⁸ Baatu abu bayuwu mamoomo, baawu bisë kuwaalë yi likaanzi i bisë losukë : « Bunenë ke Alëtemiisë yi basë Efeesë! »

²⁹ Mu lyaawu, n'tyatyamu wusë kuba mu livulë lyooso. Baatu bisë kunatë yaawu Ngayuusë i Alisëtaakë, baatu bwaali bë Masedwaanë banë bëlëkwendaangë mu mweendo yimunë Poolë i bisë kweendë mu ntiinu kunë bën'vangilaangë singweelë.

³⁰ Poolë wulëtoombë kumonikë fë ntwaalë nkoongë, kasi bitamaanë bisë n'fuungë.

³¹ Mwa mëkakëtë mën'ka më libweeti li Aziiya, banë babë sindiku si Poolë, bisë filë ciluumbi ke baatu mu kun'kaambë kuleembu kweendë kunë baatu bën'vaangaangë singweelë.

³² Mo mu ntaangu beenë, bakë booso bëzutunë bëlëcitikaangë ncyeembi : Bëmesë bëlëlosukaangë mu yaawu mpilë i bën'ka mu yaawu mpilë yivaandi, mpaapë mu baawu bësye zaabaangë ko cikumë mbici baawu bëdukëninë.

³³ Mwa mpooko baatu mu nkoongë bëzabisi maambu be moomë ke muutu n'viipë bën'telaangë Alekëzandëlë, wunë Sizwiifë bësindikëlë kun'twaalë. Alekëzandëlë wunangunë kooko, bwiinji kutubë mu kuzimunë fë ntwaalë nkoongë baatu.

³⁴ Kasi ntaangu yo baatu bisë bakulë ti naandi Zwiifë kuba, baatu bakë booso bisë losukë mu bikumë byo bimweekë : « Mpumu ke Alëtemiisë yi Efeesë! »

³⁵ Bunë bwaawu, cisonë-n'kaandë ci livulë wusë bakë likanë mu kuvumë nkoongë i naandi wusë tubë : « Basë Efeesë, bëzabisi ti livulë li Efeesë mati naandi n'luungë n'zo n'kisisi Alëtemiisë i cintumbë cyaandi cibwiilë lu yilu.

³⁶ Muutu ve podi kuli maangë. Vandi kasi, lufweeni kulingëmë i kuleembu kuvaangë lyosuku, ku kaamboobo ntetë kubalë.

³⁷ Beeno lwatwaalë baatu afa banë bësye kwiibë cyosuku ciimë ko mu n'zo-Nzaambi i bësye n'dyeengë ko n'kisisi wiitu Alëtemiisë.

³⁸ Demëtiluusë i bayaandi bësalë yaandi bëkeeli yi lyaambu li kutubë ke wosuku, binzonzi bikeeli, yimunë sinzoonzi: tala fanë baawu bëfwenikini kukesë!

³⁹ Mooti beeno luke lyaambu lin'ka li kutubë, liteetyaanu ku cizutununu ci n'tinu livulë.

⁴⁰ Licyelikë, baatu bë Loomë kupodi kutufuundë mu n'vuusu wo wavangënë bubwayi i beeso kupodi ve, kutubë lyosuku lyaambu linë lyatuvangisi mu kuzutunë afa. » Bunë kwamani kutubë mamoomo, naandi wusë vutulë bakë booso mu sinzo syaawu.