Mëvaangë 18 - N’KANGULU WUMOONË

Poolë ku Koleentë

¹ Fë mbusë, Poolë wusë botukë ku Ateenë i kweendë ku Koleentë.

² Naandi wuye dyengënë Zwiifë mweekë bën'telaangë Akilaasë, wubutu ku libweeti li Poontë. Naandi wufuminë ku Itali yimunë n'kasyaandi Pilisiilë, cibilë fumu-lwaangu Koloodë wabë wutumisi Sizwiifë syooso bëbotukë ku Loomë. Poolë wusë ke bëzakënë.

³ Naandi wabë cisalu cimweekë yi baawu, bëlëvaangaangë binzwananë, naandi wukalë yaawu mu kusalë.

⁴ Kadë cilumbu ci saba, Poolë wulëbulaangë mbeembu mu cizutununu i wulëtoombaangë yivaandi kukondulë Sizwiifë i singeleekë.

⁵ Bunë Silaasë i Timotee bafuminë ku Masedwaanë, Poolë wusë kuvaanë ntaangwaandi yooso mu kuloongë. Naandi wulësisiminë fë ntwaalë Sizwiifë ti, Yeesu na Kliistu.

⁶ Kasi, Sizwiifë bëmaangë maambu maandi i bisë n'fiingë. Mu lyaawu, wusë kukumunë mu baawu n'kunkuunvu binkutu byaandi i kubëkaambë : « Ningë beeno lube nyambekënë, olyo lim'ba libi liinu benuveekë. Lyaawu lisë kun'talë ko. Buyifanwabu, miinu yin'kwendë kuke bo bëkeeli Sizwiifë ko. »

⁷ Naandi kubotukë faanë i wusë kweendë kuke libakëlë bën'teelë Tituusë li Yusëtuusë wulëkuundaangë Nzaambi i n'zwaandi yibelëmë yi cizutununu.

⁸ Kilispiisë fumu cizutununu yimunë cifuumbë cyaandi cyooso bëta maanë mu Fumu. Mpaapë baatu bë Koleentë bëlëkuwu Poolë, bisë ta yivaandi maanë i bëbatizyaalu.

⁹ Bwiilu bumweekë, Fumu Nzaambi wusë kumonikinë Poolë mu cyeendë-meeso i wusë tubë : « Kebë wulëba yi boomë, kasi tatëminë kutubë, keelë wulëkalë swii,

¹⁰ cibilë yike yaaku. Muutu ve wum'podi kukuvangisi simbi, cibilë mpaapë baatu bëke mu livulë ali, baawu baatu baami bëkeeli. »

¹¹ Poolë wusë vyoosi ku Koleentë n'vu yi ndaambu. Naandi wulëloongë bakë booso libuungu li Nzaambi.

¹² Bunë Ngalyoonë waba fumu yi Loomë ku libweeti li Akaayi, Sizwiifë bisë kuwusënë mu kuvangisi Poolë simpasi. Baawu bisë n'natë ku cinzonzi.

¹³ Bisë tubë : « Muutu awu wun'toombë kukondulë baatu mu kukuundë Nzaambi mu nteku yi vyakënë yi n'kaakë. »

¹⁴ Poolë wufitë bulë mbeembu, Ngalyoonë kuvutulilë Sizwiifë : « Ningë lyaawu lyabë n'samu bëvoondilë muutu kaambofo mu libi linenë kuvaangë, yin'taambë kutu kwaami mu kulukuwu, beeno Sizwiifë.

¹⁵ Abu, buke lwambulu lun'talë bikumë, mëzinë i yi n'kaakiinu, lyaawu lin'talë bo beeno. Miinu yamaangë kuba nzoonzi mu maambu omo. »

¹⁶ Wusë bëvutulë ku cinzonzi.

¹⁷ Mu lyaawu, bakë booso bisë bwiilë Sosteenë, fumu cizutununu i kum'bulë fë ntwaalë cinzonzi. Kasi Ngalyoonë wusye ba mu cyuundë ko.

Poolë wuvutukënë ku Antyoosë

¹⁸ Poolë wusë vyoosi mpaapë bilumbu ku Koleentë. Fë mbusë, naandi wusë biikë baanë bë nguli i wukotë mu likuumbi li masi mu kweendë ku si yi Siili yimunë Pilisiilë i Akilaasë. Ntetë kati ntetë, naandi bën'zakë mileenji yi n'tu ku Senkeelë, cibilë wulefë mpesë mu Nzaambi.

¹⁹ Baawu bëyituukë ku Efeesë, Poolë wusë bike Pilisiilë i Akilaasë. Naandi wuyendë ku cizutununu i wusë mokënë yimunë Sizwiifë.

²⁰ Baawu bisë kun'loombë mu kukalë yaawu mpaapë bilumbu, kasi naandi wusye zolë kuve.

²¹ Naandi wubëbiikë i wutubë : « Ningë ti Nzaambi bëzolë, miinu yin'vutukënë kuke beeno. » Naandi wusë boongë likuumbi mu kweendë ku Efeesë.

²² Ntaangu yo kuyitukilë ku liloondo li Sezalee, wusë kweendë ntetë ku Yelusaleemë mu kebilë cingangë i wusë kweendë ku Antyoosë.

²³ Naandi wusë vyoosi mwa bilumbu kwaawu i wusë be vutukënë. Naandi wuvyokilë ku Ngalati i ku Filizi, mu kucindisi ciminu ci bilaanzi byooso.

Apoloosë ku Efeesë i ku Koleentë

²⁴ Zwiifë wumweekë, mu lizinë li Apoloosë, wubutu ku Alekëzandëlë, wuyituukë ku Efeesë. Naandi wulëtubaangë buboti i wulë zaabaangë buboti Bisonë.

²⁵ Naandi wutambulë liloonji mu linë lin'talë Nzilë yi Fumu. Naandi wabë buvavambë, wulëloongaangë i wulësinaangë mu bunketë booso manë mën'talë Yeesu. Kasi wulëzaabaangë tokë lubatizyaalu lu Za-Batiisë.

²⁶ Naandi wusë tubë yimunë civuufu mu cizutununu. Bunë bamani kun'yuwulu, Pilisiilë i Akilaasë bisë bayaandi fë cimweekë mu kubëzimuninë buboti Nzilë yi Nzaambi.

²⁷ Bunë Apoloosë wulëtoombaangë kweendë ku Akaayi, baanë bë nguli kun'ciinzi bitu i bisë filë n'kaandë ke bilaanzi bi libweeti beenë bwiinji bën'tambulë buboti. Bunë kwatuuci kuunë, naandi wuba muutu wu n'ciinzë mu banë bëta maanë mu muulë wu Nzaambi.

²⁸ Cibeeni, fë ntwaalë baatu bakë booso, naandi wuleesi ti Sizwiifë bëke mu buzimbu i naandi wusë bëzimuninë Bisonë ti Yeesu na Kliistu.