Mëvaangë 17 - N’KANGULU WUMOONË

Poolë i Silaasë ku Tesaloniikë

¹ Baawu bëtabilë ku Amfipoliisë i tee ku Apoloni i bisë kutuukë ku Tesaloniikë fanë Sizwiifë babë yi cizutununu.

² Bo bubeelë cifu cyaandi, Poolë wukotë ku cizutununu bilumbu bi tatu biluvundulu bilandëkënë, naandi wulëbulaangë lukuungu mu Bisonë bi Nzaambi yimunë bo babë faanë.

³ Naandi wulëbëzimunaangë i kubësulikilaangë : Kliistu wufwenikini kumonë simpasi i naandi wun'vulumukë mu nkoongë bëfwa. Naandi wulën'tumbaangë : « Yeesu wo yilë mu kuluzabikini, mati naandi Kliistu. »

⁴ Mwa m'pooku baatu mu katyaasi kwaawu bisë ta maanë i bisë ba nkoongë mweekë yimunë Poolë i Silaasë. Bo bumweekë yivaandi, singeleekë i mpaapë mu banë bëlëkuundë Nzaambi bëdukënë yaawu fë cimweekë yimunë mpaapë bëcyeetu bë bënaangë.

⁵ Kasi Sizwiifë babë bëwaalë yi n'soci. Baawu bisë kukucikë mwa mpooko baatu kwaandi vwiili bëmonë mu sinzilë, baawu bisë kosi n'vuusu munë nkoongë i n'tyatyamu mu livulë. Baawu bisë kutuukë ku n'zo Zasoonë mu kutoombë Poolë i Silaasë, bwiinji bëbënatë fë ntwaalë baatu bakë booso.

⁶ Bo baawu bëkaambu kubëmonë, bisë natë Zasoonë i mwa baanë bë nguli bëmesë fë ntwaalë mëkundaalë bë livulë i bisë ba mu kulosukë : « Baatu aba bavaangë n'vuusu mu buloongo n'viipë i bubwayi aci, baawu bakwiisë tee aku!

⁷ Zasoonë wusë bëkwaakë ku n'zwaandi! Baatu bakë booso bëlësiilaangë bo bumweekë, yaaku ti bo bën'kwendilë n'kaakë wu Sezaalë, cibilë naandi wulëbalë ti n'tinu wun'ka wukeeli, bën'telë Yeesu. »

⁸ Mëbuungu ama mëvangisi nkoongë kuba mu lusweenu i bëkuluutu bë livulë.

⁹ Mu lyaawu, Zasoonë i bëmesë bisë tubooso futaanu kwaandi mwa simboongo kuke bëkuluutu, bwiinji bëtubiikë.

Poolë i Silaasë ku Belee

¹⁰ Bwiisi bwayili, baanë bë nguli bë cingangë bëfilë Poolë i Silaasë ku Belee. Bunë batuuci kwaawu, baawu bisë kotë ku cizutununu ci Sizwiifë.

¹¹ Baawu babë bideenzë biboti kuvyokilë Sizwiifë si Tesaloniikë. Baawu bëkwaakë libuungu li Nzaambi yi sinyeenzi syooso. Kadë cilumbu, baawu bëlëtaangaangë Bisonë bi Nzaambi mu kucyengululë buboti mëbuungu më Poolë.

¹² Mpaapë baatu mu katyaasi kwaawu bisë ta maanë i mu kati Singeleekë, mwa mpooko bëcyeetu bëcinzëmë i mpaapë bëbakëlë, bisë ta maanë yivaandi.

¹³ Kasi bunë Sizwiifë si Tesaloniikë bëyuwu ti Poolë wulëloongë libuungu li Nzaambi ku Belee, baawu bëyendë kwaawu i bisë vaangë n'vuusu i baatu bëdasukë.

¹⁴ Melengë-lengë, baanë bë nguli bisë kunatë Poolë ku lweeku lu m'bu. Kasi, Silaasë yimunë Timotee, bësyaalë ku Belee.

¹⁵ Banë bënatë Poolë, bisë ke yendaangë yaandi tee ku Ateenë. Baawu bisë vutukënë ku Belee, Poolë wusë bëtumë mu ke kaambë Silaasë i Timotee mu kulengë kwiisë fanë naandi kwabë.

Poolë ku Ateenë

¹⁶ Ntaangu yo Poolë wulëciingaangë Silaasë i Timotee ku Ateenë, cyuundë cinenë cin'kotilë bunë kwamoni livulë beenë liwaalë bintumbë.

¹⁷ Mu bwaawu, naandi wëlëfindënë simpakë mu cizutununu yimunë Sizwiifë bo bëlëkuundë Nzaambi i fë ciyalëlë kadë cilumbu, yimunë baatu banë naandi kulëdyengënë.

¹⁸ Mwa m'pooku bizaabi bi Epikilyeenë i Sitoyisyeenë bisë mokënë yaandi. Bën'ka bëyufulë : « Mbici muutu wun'sukulë beenë owo wun'toombë kutubë? » — Bën'kooso bëtubë : « Wun'toombë kutendulë sinzaambi si Beeni. » Cibilë naandi wulëbëtendulaangë Yeesu i luvulumuku.

¹⁹ Baawu bëboongë Poolë i bisë ke n'nataangë fë ntwaalë cinguuku cilë dukunaangë fë limoongo bën'teelë Alewopaazë i bisë n'kaambë : « Buni beeso tum'podi kuzaabë mpilë mbi ndongulu yo yimoonë wuke mu kuloongë?

²⁰ Njeeyi wulë mu kutuvangisi kuwu maambu mëtudë i beeso tun'toombë kuzaabë buni maawu mëkelili. »

²¹ – Baatu bakë booso bë Ateenë i beeni bëlëkwisaangë mu kuvyoosi ntaangwaawu kwaawu, mu kutubaangë, kaambofo mu kuwu maambu mëtudë më siitu. –

²² Mu lyaawu, Poolë wusë kutelëmë fë katyaasi ku meeyi yi Alewopaazë i wusë tubë : « Beeno basë Ateenë, miinu yilë mu kumonë ti lulë baatu bën'kuundaangë byosuku.

²³ Mu lyaawu, bunë yilëzungunë mu livulë liinu, yimonë bintumbë binë beeno lulë cinzikaangë, miinu yisë monë civakuli, bësonikë : “Mu nzaambi bëkaambu kuzaabë.” Nzaambi wunë wuvaangë buloongo i byakë byooso bike mwaawu, mati naandi Fumu li yilu i n'toto i naandi kusë n'kalilaangë ko mu n'zo yinë yituungë baatu.

²⁴ Nzaambi wuvaangë buloongo i biimë byakë byooso bike mwaawu. Naandi Fumu liyilu, yi n'toto. Naandi wusë n'kalilaangë ko mu sinzo situungë baatu.

²⁵ Naandi wukeeli ko yi n'ciinzë mo baatu bën'zudi mu kun'vaanë cyosuku ciimë, cibilë wun'vandikaangë luziingu, n'vumuku i byakë byooso.

²⁶ Mu muutu wumweekë, naandi wuvaangë baatu bë mëkaandë mooso i wusë kubëtuunvi mu buloongo n'viipë. Naandi wuzitikë mu baawu sintaangu si kuzingilë i sindilu si sisi sinë baawu bëfwenikini kukalilë.

²⁷ Nzaambi wusë kusiilë katyoobo bwiinji baatu bën'toombë i bëm'bakulë. Cyelikë, Nzaambi wusë cinaanu ko yi beeso,

²⁸ cibilë: “Mati mu naandi mwaawu tulë mu kuzingilë, tulë mu kunyikukë i tukeeli.” Liboti beenë mu baatu bën'ka banë bëyolë i bisë sisiminë ti : “Besuviitu baanë baandi tukeeli.”

²⁹ Abu tukeeli baanë baandi, beeso kupodi ve kubalë ti Nzaambi wufwanëkënë yi cintumbë bëvangilë mu woolë, mu palaatë, kaambofo mu limanyi, bëfikulë mu mëlyeelë mu muutu i mu simbalulu syaandi.

³⁰ Kasi Nzaambi wusye be monooso ko sintaangu sinë muutu wabë mu bunzimbu. Kasi bubwayi aci, naandi wun'loombë baatu bakë booso, fosuku faamë bëkeeli, bëbalulë sindyatulwaawu.

³¹ Naandi wusë zitikë cilumbu cinë wun'fundisi buloongo n'viipë yimunë n'sulumunu yooso, mu muutu wunë naandi kusoolë. Naandi wusë leesi cimaaku ke baatu booso mu kuvulumunë muutu be woowo mu lufwa. »

³² Bunë bayuwu Poolë kutubilë mu luvulumuku lu baatu bëfwa, baatu bëmesë bisë n'dyeengë i bën'ka bisë tubë : « Mu lyalyooli, beeso tun'kuwu maambu omo vyaasi yin'ka. »

³³ Mu bwaawu, Poolë wusë bëbiikë.

³⁴ Kasi mwa m'pooku baatu bëmesë bisë bundënë yaandi i bisë kuta maanë. Mu kati kwaawu, mwabë libakëlë, mu lizinë li Deniisë, wumweekë mu cinguuku ci bënaangë ci Alewopaazë i n'cyeetu mweekë bëlëtelë Damaliisë i bën'kooso yivaandi.