Mëvaangë 16 - N’KANGULU WUMOONË

Poolë i Silaasë

¹ Poolë wuyituukë ku Delëbë i wusë kweendë ku Lisëtëlë. Kuunë kwabë cita maanë cimweekë bëlëteelë Timotee. Mamaandi wabë Zwiifë i wusë kuba cita maanë. Kasi tataandi wabë musë Ngeleesë.

² Baanë bë nguli bëlëzingilaangë ku Lisëtëlë i ku Ikoonyoomë bëlëtubaangë mpaapë simboti mu naandi.

³ Poolë wulëzolaangë kweendë yaandi mu mweendo. Mu lyaawu, Poolë wusë kum'boongë i wusë m'bukë bubakëlë mu cibilë ci Sizwiifë bëlëkalilaangë mu mëbweeti be moomo. Bakë booso bëlëzaabaangë ti tataandi wabë musë Ngeleesë.

⁴ Mu mëvulë mo baawu bëlëvyokilaangë, Poolë i Silaasë bëlë ke bëkaambaangë mëkomini mo mimbunzi bëzitikë i bëkuluutu bë Yelusaleemë i bisë bëloombë mu kuyicinzikë.

⁵ Mu Bingangë, lufyaatu lu bitamaanë lulë ke ciindaangë i kadë cilumbu lutaangu lu bitamaanë lulë ke funaangë.

Ku Tolëwaasë Poolë wamonë cyeendë-meeso

⁶ Ciluunzi ci Saantu cisë bëfuungë mu kutendulë libuungu li Nzaambi ku libweeti li Aziiya. Mu lyaawu, baawu bisë vyokilë ku Filizi i tee ku si Ngalati.

⁷ Bunë batuuci belë-belë ku libweeti bën'teelë Misi, baawu bisë kuba yi tesu mu kweendë ku Bitiinë, kasi Ciluunzi ci Yeesu wusye bëvaanë ko n'swa.

⁸ Mu lyaawu, baawu bisë vyokililë ku Misi i bisë ke yendaangë ku Tolëwaasë.

⁹ Munë bwiilu, Poolë wusë kumonë cyeendë-meeso : naandi wusë monë musë Masedwaanë wutelëmë, wunë wun'loombë abu : « Tabilë ku Masedwaanë i yisë bwiinji wutuzudi! »

¹⁰ Fë mbusë, kumonë cyeendë-meeso, beeso tulutoombë kweendë ku Masedwaanë, cibilë ti, Nzaambi wututelë mu kwe tenduli Mpolu Mboti ku libweeti olyo.

Ku Filiipë Lidi wata maanë mu Fumu

¹¹ Beeso tusë kandëmë mu likuumbi ku Tolëwaasë fanë tusë tukilë citumbu ci Samotëlaasë, mu cilumbu cilandëkënë, beeso tutuukë ku Neyapoliisë.

¹² Ntaangu yo tubotukë faanë, beeso tuyendë ku Filiipë, livulë lyabë linenë ku si Masedwaanë i lyaawu litungulu ke basë Loomë. Beeso tuvyoosi mpaapë bilumbu kwaawu.

¹³ Mu cilumbu ci saba, tubasikë ku livulë mu kweendë mu ndaambu mwiilë fanë beeso tubalë kubakë faamë mu kusambilë i Sizwiifë. Beeso tukalë i tusë kaambë bëcyeetu babë bëzutununë faawu.

¹⁴ Wun'viipë mu bëcyeetu beenë bëlëteelë Lidi, naandi wabë musë livulë li Tyatiilë. Naandi wulësumbisyaangë milelë yimboti yibeengë i wulëkuundaangë Nzaambi. Naandi wabë wulëtuyuwulwaangë, Fumu wusë n'zibulë n'timë, bwiinji kuzikulë kuwu libuungu linë litendulë Poolë.

¹⁵ Naandi wusë kutambulë lubatizyaalu i likaandë lyaandi. Wusë kututelë ku n'zwaandi mu ntubulu ayi : « Abu beeno lwamonë ti miinu yata maanë mu Fumu, lwe yisaanu ku n'zwaami. » Naandi wusë tukacikë mu kucikunë.

Poolë i Silaasë mu buloko

¹⁶ Cilumbu, tulëkwendë ko tun'sambilaangë, ciseelu ci n'cyeetu wusë kutudyengënë. Mu naandi mwabë ciluunzi cibi cilën'vangisyaangë kubikulë maambu mën'kwisë kun'twaalë i naandi wulënatinaangë sifumu syaandi simboongo simpaapë mu tubiku twaandi.

¹⁷ Naandi wusë ba fë mbusë mu ke tulaandaangë, Poolë i beeso mu ke losukaangë : « Baatu aba bëke biseelu bi Nzaambi salaangë yilu! Baawu bëlëzabisi nzilë yi luvukulu! »

¹⁸ Naandi wusë siilë boobo mpaapë bilumbu. Fë siitu, Poolë wudasukë, wusë balukë i kutundilë ciluunzi beenë : « Miinu nje yin'kaambë, basikë mu nduumbë n'cyeetu oyo mu lizinë li Yeesu Kliistu! » Mo mu ntaangu beenë, ciluunzi cisë lengë basikë mu naandi.

¹⁹ Bunë sifumu syaandi bëmonë ti naandi sye podyooso ko kube bësalilë simboongo, baawu bisë kaangë Poolë yimunë Silaasë i bisë kubënatë fë mëfulë mu nzilë fanë baatu booso bëlëzutunaangë.

²⁰ Baawu bisë bënatë ku cinzonzi ci Loomë i bisë tubë : « Baatu aba bëke mu kuvaangë n'vuusu mu livulë liitu. Baawu Sizwiifë bëkeeli

²¹ i ke loongaangë mikaakë yinë beeso basë Loomë tukeeli ko yi n'swa mu kucikunë, kaambofo mu kuyisalilë. »

²² Nkoongë yisë kubëdasukilë. Sinzoonzi bisë kubotulë Poolë i Silaasë binkutu i bisë tumisi bëbëbulë bikoti.

²³ Bunë bamani kubëbulë bikoti, bisë bëlakë mu buloko i kukaambë n'luungë mu kubëkeelë buboti.

²⁴ Bunë kwatambulilë n'swa be woowo, naandi wusë kubëtuulë ku civingë cike ku kati ku si mu buloko i wusë bëkaangë maalu mu miti yinenë.

²⁵ Fë katyaasi ku bwiilu, Poolë i Silaasë bëlësambilaangë i bëlëyolaangë mu kudumisi Nzaambi. Baatu bën'ka banë babë mu buloko bëlëbëkuwaangë.

²⁶ Kususukulabu, n'toto wusë nyikukë mu mëngolu mooso i libaandu lu n'zo buloko i bibakë bisë tutumukë. Mo mu ntaangu mweekë, mëvitu mooso kuzibukë i simpaangë si biseengo si bo babë mu buloko sisë tabukë.

²⁷ N'luungë buloko wusë kotukë. Kumonë mëvitu më buloko mëzibukë. Mu lyaawu, naandi wusë boongë mbeeli mu kuyivoondë, cibilë wulëbalaangë ti baatu be boobo batiinë.

²⁸ Kasi Poolë wusë losukë : « Biikë kuyivoondë! Beeso aba, afa! »

²⁹ Mu lyaawu, n'luungë buloko wusë loombë mwiindë i wusë kotë mëlengë-lengë mu buloko, i wulëtekë bitu mu boomë i wusë boongëmë fë maalu më Poolë i Silaasë.

³⁰ Fë mbusë, naandi wubëbaasi i wusë bëyufulë : « A beeno sifumu, mbici yifwenikini kuvaangë mu kuvuukë? »

³¹ Baawu kun'vutulilë : « Ta maanë mu Fumu Yeesu i njeeyi wun'vuukë, yimunë cifuumbë cyaaku. »

³² Mu lyaawu, baawu bisë kun'kaambë saangu yi Fumu Yeesu fë cimweekë i bo babë ku n'zwaandi.

³³ Mo mu zoolë beenë yi bwiilu, n'luungë wusë bënatë bwiinji wubësukulë simbumë i baawu bisë kum'batizyaalë cintwaali yi likaandë lyaandi.

³⁴ Naandi bëkosi ku n'zwaandi i wusë bëvaanë bilya. Naandi yimunë likaandë lyaandi lyooso babë mu liyaanji, cibilë ti baawu bëta maanë mu Nzaambi.

³⁵ Yimenë-ngwaali, sinzoonzi si Loomë bisë filë bisasi byaawu mu kukaambë n'luungë buloko: « Baasi baatu obo. »

³⁶ N'luungë buloko wusë tuusi cikuumbu ke Poolë i kutubë : « Sinzoonzi bavaanë n'swa mu kulubaasi. Mu lyaawu, beeno lube fwaanë kubasikë i lwe yendyaanu mu n'sikë. »

³⁷ Kasi Poolë wusë kaambë bisasi bi sinzoonzi: « Baawu batumi bëtubulë bikoti fë ntwaalë baatu bakë booso, kukaambu ntetë kutufundisi, abu tukeeli basë Loomë! Fë mbusë, baawu batutuulë mu buloko i mu ntaangu ayi, baawu bën'toombë kutubaasi ku muswamunu? Lya kupodi ve kuvangininë kati boobo! Baveekë bayisi kutubaasi! »

³⁸ Bisasi bisë ke tuusi simpolu be syoosi kuke sinzoonzi si Loomë. Baawaaba kubakë boomë mu kuzaabë ti Poolë i Silaasë babë basë Loomë.

³⁹ Mu lyaawu, sinzoonzi bëyisë mu kuloombë mënaanë mo bëvitikë bëbëbaasi mu buloko. Bisë kubëbaasi i kubëloombë bëbotukë ku livulë lyaawu.

⁴⁰ Bo babasikë mu buloko, Poolë i Silaasë bisë kweendë ku n'zo yi Lidi. Abu bamoni baanë baawu bë nguli, bisë kucindisi bitu banë babë kuunë i baawooso bisë ke yendaangë.