Mëvaangë 15 - N’KANGULU WUMOONË

Luzutukunu ku Yelusaleemë

¹ Mwa lukoongu lu baatu lufuminë ku Zudee mu kweendë ku Antyoosë. Bisë ba mu kuloongë baanë yaawu bë nguli : « Beeno kupodi ve kuvuukë mooti lusye buke ko bubakëlë bwiinu bo bun'lombilë n'kaakë Moyiizë. »

² Poolë i Balënabaasë bëmaangë lyaambu be lyooli i bisë findënë beenë simpakë yi baatu be boobo. Mu lyaawu, bëboongë lukanyu mu kufilë Poolë, Balënabaasë i mwa mpooko baatu bën'ka bë livulë li Antyoosë mu kweendë ku Yelusaleemë mu kuteetë lyaambu be lyooli yimunë mimbunzi i bëkuluutu.

³ Cingangë cisë bëzudi mu manë mën'talë mweendwaawu. Baawu bisë vyookë mëbweeti më Finiisi i mëbweeti më Samali, ke bulaangë lukuungu buni banë bëkeeli ko Sizwiifë bateelë maanë mu Fumu: saangu be yooyo yisë vangisi baanë bë nguli booso kuba mu nyeenzi.

⁴ Bunë batuuci ku Yelusaleemë, bisë kubëtaambulë ke Cingangë, mimbunzi i bëkuluutu i kubëzabikini makë mooso manë Nzaambi wusë vaangë mu baawu.

⁵ Kasi mwa mpooko baatu mu cinguuku ci Sifalisyaanu banë bëta maanë bisë telëmë i kutubë : « Bufwenikini kubukë bubakëlë mu bo bata maanë banë bukeeli ko Sizwiifë, i butumi bëcinzikë n'kaakë wu Moyiizë. »

⁶ Mimbunzi i bëkuluutu bë cingangë bëdukënë mu kucyengululë lyaambu beenë.

⁷ Bunë bafindënë beenë simpakë mu lyaambu be lyooli, Pyeelë wusë telëmë i wusë bëkaambë : « A baanë bë nguli, beeno lube zaabë ti fanë yi fanë, Nzaambi wukun'soolë fë meeyiinu bwiinji yitendulë Mpolu Mboti mu banë bëkeeli ko Sizwiifë, bwiinji baawu bëyuwu i bëta lyaanë.

⁸ Nzaambi wunë wuzabisi mitimë yi baatu, wusë kusisiminë ti naandi wubëkwaakë mu kubëvaanë Ciluunzi ci Saantu bo bumweekë yivaandi wutuvandikë.

⁹ Naandi wusye taandë muutu kuve mu baawu i mu beeso : wulyomisi mitimaawu mu cibilë bëta maanë.

¹⁰ Buyifanwabu, cibilë-mbici beeno lulë mu kuseengë Nzaambi mu kukacikë bitamaanë mifunë yinë sinkaakë siitu, kaambofo besuveekë tusye podi ko kunatë?

¹¹ Licyelikë, beeso twata lyaanë ti twavuukë mu muulë Fumu Yeesu, bo bumweekë yi baawu. »

¹² Mu lyaawu, baatu bakë booso bisë kukalë swii i bëlëkuwaangë Poolë yimunë Balënabaasë banë babë mu kubëkwalilë biliimbu i bimaaku byakë byooso binë Nzaambi kuvaangë mu baawu ke banë bëkeeli ko Sizwiifë.

¹³ Bunë bamani kutubë, Zaakë wusë bulë mbeembu i kutubë : « A baanë bë nguli, n'yuwulwaano!

¹⁴ Simeyoonë wusë bëkwalilë buni kuzudilë banë bëkeeli ko Sizwiifë fanë ntonunu, mu kusoolë mu kati kwaawu likaandë linë lim'ba lyaandi.

¹⁵ Mëbuungu mëtubë mibici, mën'dedëkënë yimunë maambu ama, cibilë Bisonë bi Nzaambi bin'tubë :

¹⁶ “Fë mbusë mamoomë, yin'vutukë, bëtubë Fumu, mu kube tuungooso n'zo yi Daviidë yinë yivongumukë, yin'telikooso bibakë bivongumukë. Miinu yin'tulikooso byaawu.

¹⁷ Mu lyaawu, baatu lu moonyi booso bëmesë bën'toombë Fumu, cibeeni, mëloongo makë mooso banë miinu yatelë mu kuba mboongwaami. Tala, linë Fumu kwatubë,

¹⁸ linë wuzabikini ntamë, manë kukanë kuvaangë.”

¹⁹ Mu lyaawu, Zaakë wusë bëtubë, bunë yim'balë lisye fwaanë ko mu kutulë bikaku mu banë bëkeeli ko Sizwiifë, banë babalukë kuke Nzaambi.

²⁰ Kasi beeso tubësonikinë bwiinji baawu bëleembu kulya bibulu bavakulë ke sinzaambi si bintumbë, mu kuleembu kuvaangë buduumbë i kuleembu kulya mbisi meengë bafisë cikongulo ketë meengë maandi.

²¹ Cibilë, kutatikilë civi-cikulu, baatu bëlë mu kuloongë n'kaakë wu Moyiizë mu lyosuku livulë i bëlë mu kutaangë waawu mu tuzutununu mu cyosuku cilumbu ci saba. »

N'kaandë bëfilë ke bitamaanë banë bëkeeli ko Sizwiifë

²² Mu lyaawu mimbunzi i bëkuluutu yimunë Cingangë cyooso, bisë boongë lukanyu yikusoolë mu katyaasi kwaawu mwa baatu, bëfilë ku Antyoosë yimunë Poolë i Balënabaasë. Baawu bisë soolë Zuudë wunë bëlukë Balësabaasë i Silaasë i baatu bë bwaali banë babë yi lutumu fëke baanë yaawu bë nguli.

²³ Baawu bisë kubëvaanë bënatë n'kaandë bësonikë : « Mimbunzi, bëkuluutu i baanë yiinu bë nguli bafilë sibweekë kuke banë bë nguli bëkaambu kubutukë Sizwiifë, banë bën'kalilaangë ku Antyoosë, ku Siili i ku Siliisi.

²⁴ Beeso tuyuwu ti baatu bëfuminë lweeku lwiitu bëyikosi n'vuusu i bëlëvangisi kuba mu cyuundë mu mëbuungu maawu. Beeso tusye bëvandikë ko lutumu mu lyaambu be lyooli.

²⁵ Mu lyaawu, beeso twakuwusunë mu kusoolë baatu i mu kubëfilë. Baawu bisë kuvekisi sindiku siitu, Balënabaasë i Poolë

²⁶ banë bavaanë luziingu lwaawu, mu cisalu ci Fumwiitu, Yeesu Kliistu.

²⁷ Mu lyaawu, beeso twalufilë Zuudë i Silaasë banë bëlukaambaanu manë tulë mu kusonikë afa.

²⁸ Licyelikë, Ciluunzi ci Saantu i besuveekë twaboongë lukanyu mu kuleembu kulukacikë mifunë yin'ka mu manë mën'talë bisalu biinu binë bike n'ciinzë:

²⁹ keelë lulë lya n'sunyi bibulu bëvakulë ke bintumbë. Keelë lulë nwa meengë, keti n'sunyi cibulu bëfisë cikongulo. Keelë kuvaangë buduumbë. Beeno lun'vaangë buboti mu kumaangë makë mooso omo. Lwe zingilaanu buboti! »

³⁰ Baawu bisë volikë i bisë kweendë ku Antyoosë. Kwa kunë kunaani, baawu bisë kukucikë bitamaanë i kubëvaanë n'kaandë.

³¹ Baawu bisë taangë waawu i bakë booso bisë ba mu liyaanji bunë waawu wubëciinzilë bitu.

³² Zuudë i Silaasë, banë babë baveekë mibici, bisë tubë beenë mu kuciinzi baanë yaawu bë nguli i kubëvaanë mëngolo mu ciminu.

³³ Baawu bëvyoosi mwa bilumbu kwaawu i baanë bë nguli bisë bëkaninë mu kuvaangë mweendo wumboti kuke banë bëbëfilë.

³⁴ Kasi, Silaasë wuboongë lukanyu lukusyaalë.

³⁵ Kosuku, Poolë i Balënabaasë bësyaalë ku Antyoosë. Fë cimweekë yimunë bitamaanë bin'ka, baawu bëlësinaangë i kuloongaangë Mpolu Mboti yi Fumu.

Poolë i Balënabaasë bakabukë

³⁶ Fë mbusë mwa mpooko bilumbu, Poolë wusë kaambë Balënabaasë : « Twe vutukënë mu kwe moni baanë bë nguli mu mëvulë mooso kunë kwabëtutendulë Mpolu Mboti yi Fumu, bwiinji tumonë buni baawu bëkelili. »

³⁷ Balënabaasë wulëtoombaangë kunatë Za wunë bën'telaangë yivaandi Malëkë.

³⁸ Kasi Poolë wulëtisyaangë ti boobo ko bëfwenikini kusiilë, cibilë naandi wubëbiikë ku Pamfili i wusye kweendooso yaawu ko mu mweendo wu cisalu.

³⁹ Baawu bëyambilë beenë i bëkabukë sinzilë. Balënabaasë wusë boongë yaandi Malëkë yimunë naandi i bisë kandëmë mu kweendë ku Sipëlë.

⁴⁰ Poolë wusoolë Silaasë i baanë bë nguli bisë sambilë Fumu Nzaambi mu cibilë cyaawu, bisë ke yendaangë.

⁴¹ Naandi wusabukë Sili i Siliisi, mu kuciinzi ciminu ci Bingangë.