Mëvaangë 14 - N’KANGULU WUMOONË

Poolë i Balënabaasë ku livulë li Ikoonyoomë

¹ Ku Ikoonyoomë, Poolë i Balënabaasë bëkotë ku cizutununu ci Sizwiifë i bunë bëlëtubaangë mpaapë Sizwiifë i banë bëkeeli ko Sizwiifë, bisë kuta maanë.

² Kasi Sizwiifë banë bëmaangë kuta maanë, bëkosi n'vuusu mu kati ku bo bëkeeli ko Sizwiifë i baawu bisë vaanë simbalulu syaawu simbi ke baanë yaawu bë nguli.

³ Kosuku, Poolë i Balënabaasë bëvyoosi mpaapë bilumbu ku Ikoonyoomë. Baawu bëlëtubilaangë yi lufyaatu looso i civuufu cyooso mu Fumu. Fumu wusë bëvaanë lutumu mu kuvaangë bimaaku i biliimbu i wulësisiminë bucyelikë booso mu manë bëloongaangë mu muulaandi.

⁴ Basë livulë be liinë bisë kabukë mu bikuuku byooli : bëmesë bëba yimunë Sizwiifë i bën'ka bëba yi mimbunzi.

⁵ Sizwiifë i banë bëkaambu Sizwiifë bisë dukënë fë cimweekë i sifumu syaawu bwiinji bëvangisi Poolë i Balënabaasë simpasi i kubëvoondë mu mëmanyi.

⁶ Bunë baatu bë bwaali bisë kubakulë, baawu bisë kutiinë ku lweeku lu Liistë i Delëbë, mëvulë më Likayoonë i maalë mo mëbelëmë.

⁷ Kunë yivaandi, baawu bisë ba mu kuloongë Mpolu Mboti.

Poolë wabelusi cikatë ku livulë li Liistë

⁸ Ku Liistë, kwabë libakëlë li cikatë. Kutoonë fë lubutulu lwaandi, wabë cikatë i wusye podyaangë kuve kulyaatë.

⁹ Naandi wulëkuwaangë maambu manë Poolë wulëtubë. Poolë wusë kun'sitikë meeso i monë ti naandi wuke yi ciminu mu kubelukë.

¹⁰ Mu lyaawu, Poolë wusë n'kaambë mu mbeembu n'kamu : « Telëmë, silili mu maalu maaku! » Fo fë cimweekë, muutu be woowo wusë kutelëmë i kulyaatë.

¹¹ Bunë nkoongë yisë monë manë mëvaangë Poolë, yaawu yisë kulosukë mu mbeembu yi basë Likayoonë : « Sinzaambi bacitukë baatu lu moonyi i baawu bakulumukë fëke beeso! »

¹² Baawu bëlëteelaangë Balënabaasë mu lizinë li « Zeesë » i Poolë « Elëmeesë » , cibilë Poolë wabë cipayi cilë natë libuungu.

¹³ ngangë-Nzaambi Zeesë, wunë cizutununu cyabë fë nkotulu livulë, wusë natë singoombi simbakëlë sinë bëvwiikë sindedembë si biteekë fë ntwaalë cizutununu: naandi wulëtoombaangë ti nkoongë baatu yiyindulë civakuli mu cibilë ci Balënabaasë i Poolë.

¹⁴ Kasi bunë mimbunzi yi wali yisë kubakulë lyaawu, baawu bisë beenzë binkutu byaawu i bisë lengë kotë mu nkoongë i ke losukaangë :

¹⁵ « A bayaami, cibilë-mbici beeno lulë mu kuvangilë katyoobo? Beeso baatu buke beeno, twalutwalilë Mpolu Mboti, mu kulutelë lubiikë bintumbë kwaandi vwiili i lubalulë ntalwiinu ke Nzaambi moonyi wunë wavaangë liyilu, n'toto, m'bu i byakë byooso bike mwaawu.

¹⁶ Mu civi-cikulu, naandi wubiikë mëloongo mooso kulaandë sinzilë syaawu.

¹⁷ Mu kumonë, naandi wusye leembo ko kuvaangë liboti: ku yilu, wun'nokisi n'vulë i wuluvaanë bilya i siteepu, naandi wuluvaanë bilya i wun'waasi n'timiinu mu liyaanji. »

¹⁸ Keti kulutubilë obo, mimbunzi bësye podi ko kufuungë nkoongë baatu mu kuleembu kubëyindulilë civakuli.

¹⁹ Sizwiifë sifuminë ku Antyoosë li Pisidi i ku Ikoonyoomë i bisë dedulë nkoongë mu simbalulu syaawu simbi. Mu lyaawu, baawu bisë lakë Poolë mëmanyi mu kun'voondë i bisë kun'natë ku ngaandë livulë, cibilë ti baawu bëbalë ti naandi wafwa.

²⁰ Kasi bunë bitamaanë bisë kudukënë fëke naandi, naandi wutelëmë i wukotë ku livulë. Mu cilumbu cilandëkënë, wuyendë yimunë Balënabaasë ku Delëbë.

Poolë i Balënabaasë bavutukënë ku Antyoosë li Sili

²¹ Poolë i Balënabaasë bëtendulë Mpolu Mboti ku livulë li Delëbë kunë baawu bisë bakë mpaapë bilaanzi. Baawu bisë vutukënë ku Liistë, li Ikoonyoomë i ku Antyoosë li Pisidi.

²² Baawu bisë ciinzi bitamaanë bitu, kubëvaanë mëngolo mu kukalilë mu ciminu i ke bëkaambaangë : « Beeso tube fwaanë kumonë beenë simpasi mu kukotë ku lwaangu lu Nzaambi. »

²³ Mu cyosuku Cingangë, baawu bësoolë bëkuluutu i bunë bamani kukaangë n'sweelë i kusambilë, baawu bisë kubëtuunvi ke Fumu wunë bëlëteelë maanë.

²⁴ Fë mbusë, baawu bisë sabukë Pisidi i bisë kutuukë ku Pamfili.

²⁵ Baawu bisë kuloongë libuungu li Nzaambi ku Pelëgë i bisë kweendë ku Atali.

²⁶ Kuunë, bëkandëmë mu likuumbi mu kweendë ku Antyoosë li Sili, livulë kunë bëbëtuunvi mu muulë Nzaambi mu cisalu cinë baawu bëfwenikini kusalë.

²⁷ Bunë batuuci ku Antyoosë, baawu bëkucikë bayaawu bë Cingangë i bisë bëkaambë maambu makë mooso manë Nzaambi wuvaangë mu baawu i bunë naandi wuzibulë yivaandi livitu lu ciminu mu banë bëkeeli ko Sizwiifë.

²⁸ Poolë i Balënabaasë bëvyoosi mpaapë bilumbu kwaawu yimunë bitamaanë ku Antyoosë.