Mëvaangë 13 - N’KANGULU WUMOONË

Ciluunzi ci Saantu cisë soolë Balënabaasë i Sawuulë

¹ Mu Cingangë ci Antyoosë, mwabë mibici i miloonji : Balënabaasë, Simeyoonë wunë bulukë N'fyooti, Lukiisë li Sileenë, Manayeenë wunë wuyonzukulë fë cimweekë yimunë Eloodë, wunë wulëtumi ku Ngalilee, i Sawuulë.

² Cilumbu cin'viipë, bunë baawu bëlësambililaangë Fumu i bëlëkaangaangë n'sweelë, Ciluunzi ci Saantu cisë bëkaambë : « Tulaanu nkoonzu Balënabaasë i Sawuulë mu cisalu yibëtelilë. »

³ Bunë bamani kukaangë n'sweelë i kusambilë, bisë kutendikë myooko mu baawu i bisë bëbiikë beendë.

Balënabaasë i Sawuulë ku Sipëlë

⁴ Ciluunzi ci Saantu cisë kufilë Balënabaasë i Sawuulë mu mweendo, bëyendë ku Seleesi, kunë bëbongilë likuumbi li masi li bënatë ku citumbu ci Sipëlë.

⁵ Bunë batuuci ku Salamiinë, baawu bisë kuloongë Libuungu li Nzaambi mu bizutununu bi Sizwiifë. Za-Malëkë wabë yaawu mu kubëvaanë myooko.

⁶ Baawu bisë sabukë citumbu cyooso tee ku Pafoosë. Faawu, bisë kudyengënë muutu wumweekë wulëvaangë mëyoombo bën'telaangë Baalë-Yeesu, Zwiifë wunë wulëpuutë baatu ti naandi m'bici.

⁷ Naandi wulëkalilaangë fëke n'tinu lwaangu lu citumbu, Selësuusë Poluusë, wunë wabë muutu mëlyeelë. Naandyaawu wusë kutelë Balënabaasë i Sawuulë, cibilë naandi wabë yi tesu mu kuwu Libuungu li Nzaambi.

⁸ Kasi civaangë mëyoombo Elimaasë, lizinë lyaandi mu singeleekë, wulëbëkakini i wulëtoombaangë kukwakini n'tinu Selëziisë Poliisë mu ciminu.

⁹ Mu lyaawu, Sawuulë bën'telooso Poolë, wabë wuwaalë mu Ciluunzi ci Saantu, wusë sitikë ntalwaandi ke naandi

¹⁰ i wutubë : « Njeeyi muutu wuwaalë lupuutu i bubaalu, mwaanë dyaabu, mbeeni mu byakë byooso biboti! Njeeyi wusë n'leembuko mu kutolikini sinzilë sisulëmë si Fumu?

¹¹ Buyifanwabu, Yuwo: Fumu wakanë kukuseembë, wum'ba mpofo. Njeeyi kusë bëmonë ko cyeseesë ci muunyi mu mwa ntaangu. » Kususukulabu, meeso më Elimaasë misë ba pipitii, i wusë ba mu citoombi: naandi wulë ke balukaangë sinkoonzu syakë syooso, mu ke toombaangë muutu wunë kun'natë mu kooko.

¹² Bunë n'tinu wusë monë manë mëlëvangënë, naandi kuta lyaanë. Naandi wubwa libobo mu liloonji li Fumu.

Poolë i Balënabaasë bëyendë ku Antyoosë li Pisidi

¹³ Poolë i sindiku syaandi bisë kandëmë mu bwaatu mu kweendë ku livulë li Pafoosë, kuunë baawu bisë ke tuukë ku Pelëgë li Pamfili. Za wusë bëyakënë i wusë vutukënë ku Yelusaleemë.

¹⁴ Baawu bisë landilë mweendwaawu kubotukë Pelëgë i kutuukë ku livulë Antyoosë li Pisidi. Mu cilumbu ci saba, baawu bëkotë mu cizutununu i bisë kalë.

¹⁵ Bunë bamani kutaangë libuuku li N'kaakë i li Mibici, sifumu si cizutununu bisë bëkaambë : « A baanë yaami bë nguli, mooti beeno luke mwa bikumë bi kutubë ke libuundu mu kubëciinzi, buyifanwabu, bitubyaanu. »

¹⁶ Poolë wutelëmë, wunangunë kooko i wusë tubë : « Basë Islayeelë i beeno lun'sambilaangë Nzaambi mu bucyelikë, n'yuwulwaano! »

¹⁷ Nzaambi li mboongu Islayeelë wusoolë sinkaakë siitu. Naandi wusë kukusi likaandë ali bunë babë ku si bweeni, ku Zipiitë, i wusë kubëbaasi ku si be yooyo mu luleendo lwaandi.

¹⁸ Naandi wubëlikilë kwaasu ku mëkumë-na më n'vu mu ntaandu ciyumi.

¹⁹ Fë mbusë, naandi wuvoondë saambwali li bifuumbë ku si Kaanë i kuvandikë libweeti lyaawu kuke mboongwaandi dedë mweekë cibyalilë cyaawu.

²⁰ Mu kwaasu ku nkamë-na mëkumë-taanu li mivu. « Kumanoofo, naandi wusë vaanë mëkundaalë kuke sinkaakë siitu tee mu ntaangu Samweelë m'bici.

²¹ Oboobo, baawu bëloombë n'tinu i Nzaambi wusë bëvaanë Sawuulë, mwaanë Kiisë, wu likaandë li Bezamë, wunë wubyaalë n'tinu mu mëkumë-na më n'vu.

²² Abu kwamaangë Sawuulë, Nzaambi wusë kubëvaanë Daviidë mwaanë mu kuba n'tinu. Naandi wutubilë mu cibilë cyaandi: “Miinu yabakulë Daviidë mwaanë Yesee: muutu wufwanëkënë mu n'timaami, naandi mba wuvaangë makë mooso yin'zolë.” »

²³ Wumweekë mu sindaandu si Daviidë wabë Yeesu wunë Nzaambi wubyaasi mu kuvuuci mboongu baatu bë Islayeelë, bunë naandi wukanyi.

²⁴ Ntetë Yeesu kwiisë, Za wuloongë mboongu yi Islayeelë bwiinji bëbalulë mëvaangë maawu i kubatizyaalë.

²⁵ Bunë Za kwatuuci fë siitu cisalu cyaandi, naandi wulëtubaangë: « Nani beeno lulë mu kubalë yikeeli? Miinu yikeeli ko muutu wunë beeno luke mu kuciingë. Kasi yuwaano: wunë wun'kwisë fë mbusaami i miinu yisye fwaanë ko mu kukutulë misiingë mëpaapë maandi. »

²⁶ Baanë yaamë bë nguli, beeno sindaandu si Abalaamë i beeno lukeeli afa mu kukuundë Nzaambi: mati mu beeso kwaandi vwiili bëfililë saangu ayi yi luvukulu.

²⁷ Licyelikë, basë livulë li Yelusaleemë i sifumu syaawu bësye bakulë ko nani wabë Yeesu. Bilumbu byooso bi saba, baawu bëlëtaangaangë mëbuungu më mibici akasi baawu bësye bakulë ko. Kasi baawu bëvaangë maambu beenë mu kutabulilë Yeesu lufwa.

²⁸ Bunë bamoni cyosuku ve cikun'vangisi lutabu mu lufwa, bisë kuloombë Pilaatë mu kun'voondë.

²⁹ Bunë kwavaangë makë mooso bunë mësonëmë mu Bisonë bi Nzaambi mu cibilë ci Yeesu, baawu bisë kun'kululë fë kuluusu, i bisë n'tuulë mu buumbë.

³⁰ Kasi Nzaambi wusë n'vulumunë fë meeyi bëfwa.

³¹ Naandi wuyimonikë fë mbusë mpaapë bilumbu ke banë bëlëkwendaangë yaandi ku Ngalilee tee ku Yelusaleemë. Mu ntaangu ayi, baawu simbaanji fë ntwaalë nkoongë Islayeelë.

³² Besuveekë, twalutwalilaanu Mpolu Mboti: yinë Nzaambi wutukanyi ke sinkaakë siitu,

³³ Naandi wuvaangë maawu mu beeso, sindaandu syaandi, bunë kwavulumunë Yeesu mu lufwa. Mësonëmë mu luumbu lumwaali : « Mati, njeeyi Mwanaami, kutoonë bubwayi, miinu Tataaku yikeeli.

³⁴ Nzaambi wutubë ti naandi wun'vulumunë Yeesu mu lufwa, bwiinji kuleembu kubolë. Licyelikë, naandi wutubilë obo : “Miinu yiluvaanë tusakumunu tu saantu i tucyelikë tunë yikani Daviidë.”

³⁵ Mu lyaawu naandi wusë sisiminooso mu twiimbu tun'ka : “Njeeyi wusë m'biikë ko vuumbi ciseelu cyaaku cisulëmë kubolë mu buumbë.”

³⁶ Daviidë wusalilë Nzaambi mu ntaangwaandi i wusë fwa, bën'ziikë fo fëke sinkaakë syaandi i vuumbyaandi yibolë.

³⁷ Kasi wunë Nzaambi kuvulumunë mu lufwa i vuumbyaandi sye bolë ko.

^38-39 A baanë yaami bë nguli, beeno lufwenikini kulizaabë, mati mu Yeesu mwaawu mu ke lobukulu lu mësumu bëlutendulilë. Mati mu naandi wosuku muutu wun'ta maanë wum'bakë lobukulu lu mësumu maandi makë mooso manë n'kaakë Moyiizë wusye podi ko kuluvuuci.

⁴⁰ Mu lyaawu, zungululaanu, mu kumaangë manë mibici bësonikë kuluyisilë:

⁴¹ “Talaanu, beeno baatu bëwaalë lubaayu, Lwe bwaanu libobo i lwe zimbilaanu! Cibilë yin'toombë kuvaangë bo lucilë moonyi, lyaambu linë lun'kaambu kuta maanë, ningë wun'viipë wulukwalulilë lyaawu!” »

⁴² Bunë Poolë i Balënabaasë bubasikë mu cizutununu, bëbëloombë mu kuvutukënë mu cilumbu ci saba cinë cilë landëkënë bwiinji bë tubilooso mu maambu bë maama.

⁴³ Fë mbusë luzutununu, mpaapë Sizwiifë i baatu bën'ka banë bëkotë mu libuundu li Sizwiifë bisë kulaandë Poolë i Balënabaasë. Baawu bisë bëkaambë i bëlëbëciindisyaangë mu kutatëminë mu muulë Nzaambi.

⁴⁴ Mu cilumbu ci saba cinë cilandëkënë, mu kumonë kwaandi baatu bakë booso bë livulë bëzutukënë bwiinji bëyuwu maambu mën'talilë Fumu.

⁴⁵ Bunë Sizwiifë bamonë baatu bakë booso, baawu bisë waalë mu n'soci, bëtubaangë ti Poolë wulë mu kupuutë i baawu bisë n'fiingë.

⁴⁶ Mu lyaawu, Poolë i Balënabaasë bisë kubëzabikini yi civuufu cyooso: « Bufwenikini, bëlutendulilë ntetë libuungu li Nzaambi. Bo beeno lulë mu kumaangë lyaawu i bunë lulë mu kuyituunvi ti lwabakë luziingu lu sakë yi sakë, boobo, beeso tun'kwendë ko kukaambu banë bëkeeli ko Sizwiifë.

⁴⁷ Tala linë Fumu wutulombisi : “Miinu yikusoolë dedë mweekë cyeseesë mu buloongo n'viipë, bwiinji wunatë baatu kuluvukulu tee kunë kusitikilë buloongo!” »

⁴⁸ Bunë banë bëkeeli ko Sizwiifë bayuwu bikumë obyo, baawu bisë sangilë i bisë dumisi libuungu li Fumu. Bakë booso banë Nzaambi kusoolë mu kubakë luziingu lu sakë yi sakë, bisë ba bitamaanë.

⁴⁹ Libuungu li Fumu li lutilooso kutendukë mu mëbweeti beenë.

⁵⁰ Kasi Sizwiifë bëlëvaangë n'vuusu fanë fabë bëcyeetu bë bënaangë babë sisu mu Nzaambi, i banë bëke mëkakëtë bë livulë. Baawu bisë kusakë Poolë i Balënabaasë byaamu i bisë bëkulë mu si yaawu.

⁵¹ Baatu bë bwaali bisë kukumunë n'kunkuunvu yi maalu maawu i bisë kweendë ku livulë li Ikoonyoomë.

⁵² Bilaanzi byabë ku Antyoosë, baawu babë bëwaalë mu liyaanji i mu Ciluunzi ci Saantu.