Mëvaangë 12 - N’KANGULU WUMOONË

Zaakë ban'voondë i Pyeelë ban'tuulë mu buloko

¹ Ntaangu be yinina n'tinu Eloodë wusë vangisi baatu bëmesë bë cingangë simpasi.

² Naandi wutumë mu kuvoondë Zaakë nkoombë Za, mu cisabë.

³ Bunë kwamoni ti lyaawu lilë toonzi Sizwiifë, baawu bisë bwiilë Pyeelë, mu cilumbu ci n'saangu mëmpa mëkaambu m'bweeli.

⁴ Eloodë wusë kukaangë Pyeelë i kun'lakë mu buloko i naandi wutumë likomo li nkoongë na li mësodaadi mu kun'luundë. Naandi wulëtoombaangë kufundisi Pyeelë fë ciyalëlë fë mbusë Paakë.

⁵ Pyeelë wuba wuluundë mu buloko, kasi bangë Cingangë bëlësambilë Nzaambi mu cibilë cyaandi.

Yaanzi wabaasi Pyeelë mu buloko

⁶ Ku bwiisi-buyilë, Eloodë wulë fwiikaangë kun'fudisi fë ciyalëlë, Pyeelë wulë nuukë fë meeyi mësodaadi mwaali. Naandi wabë wukangëmë mu simpaangë wali i miluundë babë fë munë livitu li buloko.

⁷ Kuzimbukulabu, Yaanzi yimweekë yi Fumu yisë kumonikë i civingë cyooso cisë ba mu cyeseesë. Yaanzi wusë kusiimbë Pyeelë ku lweeku, kun'kotulë i wusë n'kaambë : « Lengë telëmë! » Simpaangë kusundilooso kum'botukë mu myooko.

⁸ Yaanzi yisë n'kaambë : « Tuulë likaanji i vwaatë mëpaapë maaku. » Pyeelë wusë n'cikunë i yaanzi wusë bëtubë: « Vwaatë ciyuungë cyaaku i n'daandi. »

⁹ Pyeelë wusë basikë mu buloko i ke laandaangë yaanzi fë mbusë. Naandi wusye zaabaangë ko ti manë yaanzi wulëvaangë mabë mëcyelikë: naandi wulëbalaangë ti wamonë cyeendë-meeso.

¹⁰ Naandi wusë kuvyookë cikaku cin'tetë ci mësodaadi i cyo cimwaali i wusë kutuukë fë livitu li biseengo li kubasikilaangë ku ngaandë buloko. Livitu beenë lisë zibukë lyaveekë fë ntwaalaawu i bisë basikë. Bisë kwesënë mu luwu i Kususukulabu yaanzi wusë biikë Pyeelë.

¹¹ Mu lyaawu, Pyeelë wusë bakulë maambu bunë mëlëvangëninë i wusë tubë : « Buyifanwabu, yasiinji ti licyelikë Fumu wafilë yaanzyaandi. Naandi wakum'puuci mu lutumu lu Eloodë i mu mëbi mooso manë likaandë li Sizwiifë bëlëkanë kum'paangë. »

¹² Bunë kwabakuli buboti lyaambu, naandi wusë ke yendaangë ku n'zo Maali, mamë Za bëlukë Malëkë. Mpaapë baatu bëdukënë kuunë mu kusambilë.

¹³ Pyeelë wusë kokumunë fë munu-n'zo, ciseelu cimweekë ci n'cyeetu mu lizinë li Loodë, wusë belëmë mu kuzibulë.

¹⁴ Naandi wusë zaabë mbeembu Pyeelë i kuba mu liyaanji, kuzimbëkënë mu kuzibulë livitu, Mëlengë-lengë, naandi wusë kudumë ntiinu ku kati mu kuzabikini ti Pyeelë ke ku ngaandë.

¹⁵ Baawu bisë kun'kaambë : « Njeeyi walawukë! » Kasi naandi wubweelë kubë sisiminë ti lyaawu licyelikë. Baawu bisë tubooso: « Mati yaanzyaandi. »

¹⁶ Kasi Pyeelë wubweelooso kukokumunë. Bunë bazibulë livitu, bisë m'monë i kubwa libobo.

¹⁷ Mu kooko, Pyeelë wusë bëkaambë mu kulingëmë i kubëkwalulilë buni Fumu wum'basilë mu buloko. Naandi wutubooso: « Lwe kaambyaanu ke Zaakë i kuke baanë bë nguli bën'ka. » Naandi wusë basikë i ke yendaangë nkoonzu yin'ka.

¹⁸ Bunë bwiisi bwacya, n'vuusu wunenë wusë ba mu nkoongë mësodaadi. Baawu bëlëkufësënaangë, na Pyeelë buni kwekilë.

¹⁹ Eloodë wufilë baatu mu kun'toombë, kasi bësye m'monë ko. Mu lyaawu, naandi wuyufulë miluungë i kuvaanë n'swa mu kun'voondë. Fë mbusë, Pyeelë wutukë ku Zudee mu kweendë ku Sezalee ko kuyekalilë mwa bilumbu.

Lufwa lu Eloodë

²⁰ Eloodë wusë ba yi likaanzi linenë mu basë Tiilë i banë bë Sidoonë. Baawu bisë kuwusënë mu kwe m'moni. Baawu bisë kukondulë Balasëtuusë, wunë wabë n'luungë civingë ci n'tinu, bisë ke loombë Eloodë mu kuvaangë n'sikë, cibilë ti si yaawu yilëbakilaangë bikulya ku si n'tinu beenë.

²¹ Mu cilumbu bëzitikë, Eloodë wuvwaatë n'vwaatwaandi wu lwaangu, i wuvwaandë fë ntaanzyaandi i wubëkaambë bunzonzi bu n'zisi fë ciyalëlë.

²² Nkoongë yisë kulookë: « Mati Nzaambi wulë mu kutubë, yaaku ti muutu kwaandi! »

²³ Kasi mo mu ntaangu mweekë, yaanzi yi Fumu kubulë Eloodë, cibilë naandi wusye vaanë ko bumpumu ke Nzaambi : singaambu sisë kun'keetë i wusë kufwa.

²⁴ Kosuku, libuungu li Nzaambi lilë ke nyabaangë i bitamaanë bisë funooso.

²⁵ Mu linë lin'talë Balënabaasë i Sawuulë, bunë bamani cisalu cyaawu ku Yelusaleemë, baawu bisë vutukënë i bënatë yaawu Za wunë bulukë Malëkë.