Mëvaangë 11 - N’KANGULU WUMOONË

N'zisi Pyeelë fë ntwaalë Cingangë ci Yelusaleemë

¹ Mimbunzi i baanë bë nguli bë livulë li Zudee bisë kuwu ti, banë bëkeeli ko Sizwiifë bacikunë libuungu li Nzaambi.

² Buni Pyeelë kwavutukë ku livulë li Yelusaleemë, bitamaanë bi Sizwiifë bisë n'seembë.

³ Bisë tubë : « Njeeyi wabuundë n'kangulu yimunë bo bëkeeli ko Sizwiifë i njeeyi wakwambulë yaawu. »

⁴ Mu lya lyoolyo, Pyeelë wusë bëzabikini bunë maambu makë mooso mësë vyokilë.

⁵ Bunë miinu yisë ba ku livulë li Zafee, miinu yi bakë cyeendë-meeso ntaangu yo yilësambilë. Yimonë ciimë cimweekë cifuminë lu yilu i cikulumukë fanë fabë miinu. Cyaawu ciba dedë mweekë n'lelë wun'nenë wunë bësiimbë mu sisosu si na.

⁶ Miinu yilëmonaangë buboti mu kati i kumonë bibulu bike maalu më na, bibulu bi n'situ, sinyokë i sinuni.

⁷ Miinu yisë kuwu mbeembu yisë kun'zabikini: « A Pyeelë, telëmë! Voondë i wulya! »

⁸ Kasi miinu yisë vutulë : « Monikoo, Fumu! Miinu yibuunu vyaasi kutuulë mu munwaami cinë be bufuungë i kaambofo cikaambu kulyoomë. »

⁹ Mbeembu yisë kutendukooso ku yilu : « Njeeyi sye fwaanë ko kumonë biimë bisumukë binë Nzaambi kutubë ti, byaawu bilyoomë. »

¹⁰ Cyeendë-meeso be cyoocyo cisë vangënë fë vyaasi tatu i fë mbusë, byaawu bivutukënë ku yilu.

¹¹ Kosuku, mu ntaangu yimweekë, bëbakëlë bë tatu bisë fuminë ku Sezalee bisë kutuukë ku n'zo kunë twabë: mu kun'telë.

¹² Ciluunzi ci Saantu cisë kun'kaambë mu kweendë yaawu nkakini ve. Baanë yaami bë nguli bë samunu yinatë kwaawu bëye kum'pekisi ku Sezalee i beeso tusë kotë ku n'zo Kolëneeyë.

¹³ Naandyaawu wusë tukaambë buni naandi wumweenë yaanzi yiyikotë ku n'zwaandi i yisë n'kaambë : « Filë baatu ku Zafee bwiinji bëtelë Simu bëlukë yivaandi Pyeelë.

¹⁴ Naandi wusë kun'kaambë maambu më kutwalilë luvukulu, ke njeeyi i cifuumbë cyaaku cyooso.

¹⁵ Miinu yitoonë kutubë, bunë Ciluunzi ci Saantu cisë kulumukë mu baawu, bo bumweekë cikulumukë mu beeso yiviitu fë ntonunu.

¹⁶ Mu lya lyoolyo, miinu yitebukë moonyi mu maambu manë Fumu kutubë : “Za wubatizyaalë baatu mu masi kasi, beeno, lun'taambulë lubatizyaalu lu Ciluunzi ci Saantu.”

¹⁷ Ningë Nzaambi wubëvaanë likabu li mpilë mweekë, linë naandi kuvaanë ke beeso tuta maanë mu Fumu Yeesu Kliistu : miinu, nani yikeeli mu kukakini yi Nzaambi? »

¹⁸ Bunë kwayuwu bikumë obyo, bakë booso bisë kulingëmë i ke dumisyaangë Nzaambi : « Mati licyelikë, Nzaambi wavaanë yivaandi ke bo bëkeeli ko Sizwiifë likanë li kubalulë ndyatulwaawu mu kutambulë luziingu lucyelikë. »

Cingangë ku Antyoosë

¹⁹ Binkuungë bilandëkënë mu lufwa lu Tyeenë, bisë vangisi bitamaanë mu kunyambëkënë mosuku. Bëmesë mu baawu bëyendë tee ku Finiisi, ku Sipëlë, i ku Antyoosë, kasi baawu bëlëloongaangë Libuungu li Nzaambi tokë kuke Sizwiifë.

²⁰ Kasi mwa bitamaanë bëmesë bëba basë Sipëlë i bë Sileenë, baawu bëyendë ku Antyoosë i bisë kukaambë yivaandi ke banë bëkeeli ko Sizwiifë Mpolu Mboti yi Fumu Yeesu.

²¹ Mikaanzë yi Fumu yisë bayaawu. Mpaapë baatu bisë ta maanë i bëbalulë sin'kalulu syaawu mu kulaandë Fumu Yeesu.

²² Basë Cingangë ci Yelusaleemë bëyuwu saangu beenë. Baawu bëfilë Balënabaasë ku Antyoosë.

²³ Ntaangu naandi kutukilë i wumonë mëboti manë Nzaambi wusiilë bitamaanë, wusë ba mu liyaanji i kubëcindisi bakë booso mu kuba lufyaatu mu Fumu.

²⁴ Balënabaasë wabë muutu wumboti wuwaalë mu cimpukë ci Ciluunzi ci Saantu i wabë yi lufyaatu. Mpaapë baatu bëta maanë mu Fumu.

²⁵ Fë mbusë, Balënabaasë wuyendë ku Talaasë mu kwe toombi Sawuulë.

²⁶ Ntaangu Balënabaasë kwamoni Sawuulë, naandi kun'natë ku Antyoosë. Baawu bëvyoosi kwaawu n'vu n'viipë mu kusalë mu cingangë i bëloongë mpaapë baatu. Kunë Antyoosë kwaawu bëteelë mu vyaasi yin'tetë bilaanzi, sikleentë.

²⁷ Mu bilumbu be binë binaani, mibici bëfuminë ku Yelusaleemë i bëyendë ku Antyoosë.

²⁸ Wumweekë mu nkoongaawu, mu lizinë li Agabuusë wunë wabë wuwaalë Ciluunzi ci Saantu, wusë tubë ti cibuyi cinenë cim'ba bwendi nyalu-n'toto. – Licyelikë, lyaawu livangënë ntaangu yo Koloodë wabë Fumu. –

²⁹ Mu lyaawu, bilaanzi bisë kutubë ti wosuku muutu wuke mu nkoongaawu be fwaanë kuvaanë cyosuku ciimë cinë cim'podi kuzudi baanë bë nguli banë buke ku Zudee.

³⁰ Baawu bisë vangilë boobo i baawu bisë filë byaawu mu myooko Balënabaasë i Sawuulë bwiinji bëvaanë ke bëkuluutu bë Zudee.