Mëvaangë 10 - N’KANGULU WUMOONË

Pyeelë watelu ke Kolëneeyë

¹ Ku livulë li Sezalee kwaba libakëlë lin'viipë, lizinë Kolëneeyë. Naandi waba n'kuluutu-mësodaadi wu Loomë wunë baawu bëlëtelaangë, « nkoongë yi Itali ».

² Naandi waba muutu wusulëmë fë meeso më Nzaambi i cintwaali yimunë likaandë lyaandi, baawu bëlëcinzikaangë Nzaambi mu n'timë wumweekë. Naandi wulë zudyaangë biyeembi bi Sizwiifë, i wulësambilaangë Nzaambi ntaangu yooso.

³ Cilumbu cin'viipë, fë zoolë tatu mu m'bukulu-bwiisi, naandi wusë kumonë mu cyeendë-meeso, yaanzi mweekë yi Nzaambi yinë yikotë ku n'zwaandi i wusë n'kaambë : « Kolëneeyë! »

⁴ Kolëneeyë wusitikë meeso maandi ke yaanzi, yi boomë booso, wusë n'yufulë : « Maambu mbici a Fumu? » Yaanzi wusë n'vutulilë : « Nzaambi wacikunë misaambwaaku i lusalusu lunë njeeyi wulë mu kuzudi biyeembi. Mu lyaawu, naandi kusë wukuzimbëkënë ko.

⁵ Ntaangu be yiiyi, filë baatu ku livulë li Zafee, bwiinji baawu beendë bëteli muutu wumweekë mu lizinë li Simu, wunë bëlukë Pyeelë.

⁶ Naandi wuke ke Simu wunë wun'lulikaangë mikaandë bibulu. N'zwaandi yike belë-belë yi m'bu. »

⁷ Ntaangu yaanzi yo yilëtubënaangë yaandi yisë kweendë, Kolëneeyë wusë telë bisasi byaandi byooli, i wumweekë mu kati ku mësodaadi maandi wunë wuke muutu wusulëmë.

⁸ Fë mbusë kubëzabisi maambu, manë yaanzi kubëkaambë, naandi wusë bëfilë ku Zafee.

⁹ Cilumbu cilandëkënë, ntaangu bëbeelë mu nzilë sikwendë, i batuuci belë-belë ku Zafee, fë ntaangu-mbatë, Pyeelë wusë makë fë beedi yi n'zo mu kusambilë.

¹⁰ Naandi wabë yin'zalë i wusë toombë ci kulya. Kasi ntaangu yo bëlë n'laambilaangë bilya, naandi wusë monë mu cyeendë-meeso.

¹¹ Pyeelë wusë monë li yilu kuzibukë, i ciimë cimweekë cikulumukë, cifwanëkënë bukë n'lelë bësiimbë mu sinkumë si na, cizelumukë fë n'toto.

¹² Fë yilu n'lelë beenë, fabë bibulu bi mpilë yi mpilë yaandi: bibulu bi maalu më na, sinyokë i sinuni si yosuku mpilë.

¹³ Mbeembu yisë n'kaambë : « A Pyeelë telëmë! Voondë i lya. »

¹⁴ Kasi Pyeelë wusë vutulë : « O a Fumu moniko! Miinu yibuunu kulya vyaasi cyosuku cifuungu kaambofo cikaambu kulyoomë. »

¹⁵ Mbeembu yisë bën'kaambooso : « Keelë njeeyi wulëmonë bisumukë binë Nzaambi kutubë ti bilyoomë. »

¹⁶ Lyaawu livangënë fë vyaasi tatu, i fë mbusë, n'lelë beenë wusë vutukë ku yilu.

¹⁷ Pyeelë wulëtoombë mu kuzaabë bunë bukelili suundu yi cyeendë-meeso cinë naandi kumonë. Kasi mu ntaangu yimweekë, baatu Kolëneeyë kufilë bisë kufulë mu kuzaabë fanë fabë n'zo yi Simu. Baawu bisë tuukë buyifanwabu fë nkotulu.

¹⁸ Baawu bisë telë i bisë kufulë : « N'zo beenë faafë fë n'kalilaangë Simu wunë bëlukë Pyeelë? »

¹⁹ Ntaangu yo Pyeelë kulë dunguminë mu kuzaabë manë kumonë mu cyeendë-meeso, Ciluunzi cisë n'kaambë : « Baatu bëtatu bëlë mu kukutoombë.

²⁰ Telëmë! Nengëmukë buyifanwabu i weendë ke baawu. Keelë wulëkekëmë, kasi miinu yibëfilisi. »

²¹ Fë mbusë, Pyeelë wusë kulumukë i wusë kaambë baatu beenë: « Miinwaawu beeno lulë mu kutoombë. Cibilë-mbici beeno lwakwisilë? »

²² Baawu bisë vutulë : « Kolëneeyë, n'kuluutu-mësodaadi na watufilë ke njeeyi. Naandi muutu wusulëmë, wun'cinzikaangë Nzaambi. Sizwiifë syakë syooso bën'tubaangë mëboti mu naandi. Yaanzi yi Nzaambi yisë kun'tumisi mo njeeyi weendë ke naandi, bwiinji kuyuwu manë wuzolisi kun'kaambë. »

²³ Pyeelë wusë bëkosi ku n'zo i kubëvaanë faama fë kunukinë. Cilumbu cilandëkënë, Pyeelë wutelëmë i wusë ke yendaangë yimunë baawu. Baanë bë nguli bëmesë bë livulë li Zafee bisë kweendë yaandi.

²⁴ Cilumbu cilandëkënë, naandi wuye tuukë ku livulë li Sezalee. Kolëneeyë wulëbëvin'ngaangë yimunë likaandë lyaandi i sindiku syaandi si n'timë sinë naandi kuvekilë.

²⁵ Ntaangu yo Pyeelë kulëkotilë ku n'zo, Kolëneeyë kwiisë kun'dyengënë i wusë fukumë fë ntwaalaandi yi luciinzu looso.

²⁶ Kasi Pyeelë wun'telikë i wusë tubë : « Telëmë cibilë ti miinu yivaamë, yilë muutu vwiili bo buke njeeyi. »

²⁷ Ntaangu yo naandi wulëtubënaangë yi Kolëneeyë, naandi wusë kotë ku n'zo i ke zakënë mpaapë baatu bëdukënë kuunë.

²⁸ Naandi wusë bëzabikini: « Beeno luzabisi ti, Zwiifë wukeeli yi n'swa ko mu kukalë fë cimweekë i mweeni, kaambofo mu kukotë ku n'zwaandi. Kasi Nzaambi wabë wukun'deesi ti, miinu sye fwanëkënë kuve kumonë wosuku muutu wukaambu kulyoomë.

²⁹ Mu boobo, Ntaangu yo beeno lwakun'telilë, miinu yisye maangë kuve mu kwiisë. Mu lyaawu, yatoombë kuzaabë mu mbici beeno lwakun'telilë afa. »

³⁰ Kolëneeyë wusë n'vutulilë : « Bilumbu bi tatu byavyookë i kanuku mu zoolë be yiiyi yin'tatu yi m'bukulu-bwiisi, miinu yilësambilaangë ku n'zwaami. Kususukulabu, muutu mweekë wunë wuvwaatë n'lelë wun'lesikë wusë kum'monikinë

³¹ i wusë tubë : “Kolëneeyë, Nzaambi wacikunë misaambwaaku i lusalusu lunë wun'vaangaangë mu biyeembi.

³² Mu lya lyoolyo filë baatu ku livulë li Zafee bwiinji bateli Simu wunë bën'telaangë yivaandi Pyeelë. Naandi wun'kalilaangë ku n'zo Simu wunë wun'lulikaangë mikaandë bibulu. N'zwaandi yibelëmë yi m'bu.”

³³ Mëlengë-lengë miinu yisë filooso baatu mu kukutelë. Njeeyi liboti wavaangë cibilë wakwiisë. Ntaangu ayi, beeso booso tweekë fë ntwaalë Nzaambi, bwiinji mo tuyuwu makë mooso manë Fumu wakutumë mu kutuzabikini. »

Bunzonzi bu Pyeelë ku n'zo Kolëneeyë

³⁴ Pyeelë wusë tubë : « Buyifanwabu, miinu yabakulë cyelikë, Nzaambi wum'monaangë baatu bakë booso mpilë mweekë:

³⁵ bwaawu, mu yosuku si, wosuku muutu wun'cinzikaangë Nzaambi i wun'salilaangë maambu mësulëmë, naandi wuvangisyaangë Nzaambi sinyeenzi.

³⁶ Naandi wufilë cikuumbu cyaandi ke mboongu Islayeelë, Mpolu Mboti yi n'sikë wu Yeesu Kliistu, wukeeli Fumu baatu booso.

³⁷ Beeno luzabisi manë mëvyookë ntetë ku Ngalilee i ku Zudee yakë yooso, fë mbusë Za kulongilë i kubatizyaalë.

³⁸ Beeno luzabisi buni Nzaambi wutuulë cimpukë Ciluunzi ci Saantu mu Yeesu li Nazaleetë. Naandi wulyaatë mu si syooso mu kusalilë mëboti i mu kubelusi bibeedo byakë byooso banë babë mu civikë ci dyaabu. Licyelikë Nzaambi wabë yaandi.

³⁹ Beeso tukeeli simbaanji mu maambu makë mooso kuvaangë ku livulë li Yelusaleemë i mu sisi sin'ka si Sizwiifë. Baawu bën'voondë fanë bëm'baandë fë kuluusu.

⁴⁰ Kasi Nzaambi wun'vulumunë mu lufwa mu cilumbu cin'tatu i wusë n'vaanë likanë li kube monikooso.

⁴¹ Yaaku ti ke baatu bakë booso ko, vandi ke beeso banë Nzaambi kusoolë ntetë, bwiinji tuba simbaanji syaandi. Beeso tulya yaandi fë cimweekë fë mbusë luvulumuku lwaandi.

⁴² Yeesu wututumë mu kuloongë baatu i mu kuzabikini ti naandi Nzaambi kusoolë, mu kufundisi baatu bë moonyi i bo bëfwa.

⁴³ Mibici yooso bëtubilë mu cibilë cyaandi: wosuku muutu wun'tuulë lufyaatu lwaandi mu Yeesu, wum'bakë lobukulu lu mësumu maandi mu lizinë li Yeesu. »

Banë bëkeeli ko Sizwiifë batambulë Ciluunzi ci Saantu

⁴⁴ Bo Pyeelë wulëtubë, Ciluunzi ci Saantu cisë kulumukë mu bakë booso bëlë kuwu bunzonzi bwaandi.

⁴⁵ Bitamaanë bi Sizwiifë bëyisë yimunë Pyeelë, bisë tulumukë mu kumonë ti Nzaambi wusë kululë yivaandi likabu lyaandi li Ciluunzi ci Saantu mu banë bëkeeli ko Sizwiifë.

⁴⁶ Licyelikë, baawu bëlëkuwaangë banë bëkeeli ko Sizwiifë, kutubilë mu simbeembu sin'ka, i ke dumisyaangë Nzaambi. Mu lyaawu, Pyeelë wusë tubë :

⁴⁷ « Baatu aba, batambulë Ciluunzi ci Saantu bo buke beeso, buni, beeso kupodi kubëfuungë kubatizyaalu? »

⁴⁸ Naandi wusë tumë mo bë bëbatizyaalë mu lizinë li Yeesu Kliistu. Mu lyaawu, baawu bisë loombë Pyeelë mu kukalë yaawu mwa bilumbu.