Mëvaangë 1 - N’KANGULU WUMOONË

Lukanyu lu Ciluunzi ci Saantu ke mimbunzi

¹ A wayaami Tofiilë, mu libuuku lyaami lin'tetë, yizabikini makë mooso manë Yeesu kuvaangë i manë kulëloongaangë kutoonë fanë ntonunu,

² tee fë cilumbu cinë naandi wuyendilë ku yilu. Ntetë naandi mu kweendë ku yilu, naandi wuvaanë mikaakë mu lutumu lu Ciluunzi ci Saantu ke mimbunzi yo kusoolë.

³ Fë mbusë lufwa lwaandi, naandi wuyimonikë ke baawu mu mpilë ku mpilë yaandi ti naandi wuke moonyi. Fë mëkumë-na (40) më bilumbu, naandi wusë bëmonikinë i wusë bëkaambë mu Lwaangu lu Nzaambi.

⁴ Cilumbu cin'viipë, ntaangu yo kulëkwambulaangë yaawu fë cimweekë, naandi wusë bëvaanë lutumu alu: « Luyakënyaanu ko fë livulë li Yelusaleemë, kasi ciingaanu linë Nzaambi wulukanyi, Likabu linë miinu yilukaambë.

⁵ Za wubatizyaalë baatu mu masi, kasi fë mwa bilumbu beeno bëlubatizyaalë mu Ciluunzi ci Saantu. »

Lweendulu lu Yeesu ku yilu

⁶ Banë bëyidukënë fëke Yeesu, bisë n'yufulë : « A Fumu, sintaangu beenë siisi syaawu njeeyi wun'tulikilë lwaangu lu Islayeelë? »

⁷ Yeesu wusë bëvutulilë : « Liinu beeno ko mu kuzaabë sintaangu, kaambofo siteepu, cibilë naveekë Taatë na wusitikë syaawu mu lutumu lwaandi.

⁸ Kasi beeno lun'tambulë luleendo, ntaangu yo Ciluunzi ci Saantu cin'kulumukë mu beeno. Mu lyaawu beeno lum'ba simbaanji syaami mu Yelusaleemë, mu Zudee yakë yooso i mu Samali, tee yi kunë situkulu n'toto. »

⁹ Abu kwe bëkaambë mamoomë, bunë bakë booso bëlën'talaangë, Yeesu wusë kweendë ku yilu, livweeti lisë n'fukë fë meeso maawu.

¹⁰ Bunë bëlëtalaangë ku yilu kunë Yeesu wunangukë, kuzimbukulabu, bëbakëlë bwaali bëba mu n'vwaatu wu mpeembi bisë kubëmonikinë,

¹¹ i bisë kubëkaambë ti : « A basë Ngalilee, cibilë mbicye beeno luke talilaangë ku yilu? Na Yeesu wunë Nzaambi kunangunë ku yilu fë n'twaliinu, wun'vutukë bo bumweekë lwam'mweenë kwendilë ku yilu. »

Mëtyaasë wavingënë Zuda

¹² Mimbunzi bëvutukënë bunë bwaawu ku livulë li Yelusaleemë kutoninë limoongo li miti bën'teelë Oliivë. Limoongo beenë libelëmë yi livulë, kwaasu fë meeyi zoolë wu mweendo.

¹³ Ntaangu yo baawu bëyitukilë ku livulë li Yelusaleemë, bisë kotë ku n'zo i baawu bisë kwesënë ku civingë ci cibaangë, fanë baawu bëlëkukuminaangë. Munë nkoongaawu mwabë Pyeelë, Za, Zaakë i Andëlee, Filiipë i Toma, Batelëmi i Matye, Zaakë mwaanë Alëfee, Simu awu bëlukë Zelootë i Zuda mwaanë Zaakë.

¹⁴ Bakë booso fë cimweekë bëlëkukumaangë kadë ntaangu mu kusambilë, yimunë bëcyeetu, yimunë Maali mamë Yeesu i sinkoombë si Yeesu.

¹⁵ Mu bilumbu be binë binaani, baanë bë nguli bëlëkukumaangë. – Baawu babë kwaasu ku nkamë mëkumwaali më baatu. – Pyeelë wusë kutelëmë fë meeyaawu i wutubë :

¹⁶ « A baanë bë nguli, bufwenikini ti manë Ciluunzi ci Saantu wuzabikini mu Libuuku li Nzaambi, mëtubulu ntetë mu munu Daviidë manë mën'talë Zuda, awu wabë wuleesi nzilë ke bo bëyibwiilë Yeesu, mëvangënë. »

¹⁷ Zuda wabë wun'viipë mu nkoongiitu, i naandi wutambulë cyaandi cikuuku mu cisalu cinë tusalë.

¹⁸ – Mu simboongo syo kutambulë mu lisumu lyo kuvaangë, naandi wusë kusuumbë solë. Naandi wusë kuyiluumbikë fë n'toto, civumu kuluukë i milyaandi kulufëkë ku ngaandë.

¹⁹ Baatu bakë booso bë Yelusaleemë bayuwu lyaambu be lyooli, bisë kuvaanë kuumbu solë be yooyi : Akëlëdaamë. Dedë ti mu mbeembwaawu: solë yi meengë. –

²⁰ Vandi, bësonikë mu libuuku li Twiimbu: « N'zwaandi be fwaanë kulekulu, i wosuku muutu mu kati kube kalilë ve! Bësonikooso : “Muutu wun'ka wuvingënë fë cisalu cyaandi.”

^21-22 Mu lyaawu olyo, bufwenikini muutu mweekë kukubëmë ke beeso, bwiinji kuba mbaanji mu luvulumuku lu Fumu Yeesu. Bufwenikini kusoolë muutu be woowo mu nkoongë yi bo bëlëkwendaangë yiitu mu ntaangu Yeesu kulëkalilaangë yiitu, kutoninë ntaangu yo Za kulëbatizyalilaangë, tee yi fanë Nzaambi kun'nanguninë mu kweendë ku yilu. »

²³ Lyabeeli katiboobo, bitamaanë bisë kuleesi baatu bwaali : Zozeefë wo bëlukë yivaandi Balësabaasë kaambofo Yusëtuusë i Mëtyaasë.

²⁴ Fë mbusë, baatu bakë booso bisë kuvaangë n'saambu awu : « A Fumu, njeeyi wuzabisi n'timë wu wosuku muutu, tuleesi mu babë bwaali aba nani njeeyi wasoolë,

²⁵ bwiinji na wusalë cisalu ci bumbunzi fë ciikë ci Zuda cinë kwavubikë mu kweendë ku yaandi nkoonzu. »

²⁶ Mu lyaawu, baawu bisë bulë njekë, i foofë bisë kusoolë Mëtyaasë, awu wuyibundënë yaawu mu likuumi wumweekë li mimbunzi.