Matye 9 - N’KANGULU WUMOONË

Yeesu wabelusi cikatë

¹ Yeesu wusë kandëmë mu likuumbi li masi, kusabukë i wusë ke yendaangë ku livulë lyaandi.

² Bisë n'natinë cikatë cinonukë fë nkwaalë. Bunë Yeesu kwamoni ciminu cyaawu, naandi wusë kaambë cikatë : « We ba yi viingu mwanaami, mësumu maaku makobukë! »

³ Mwa mpooko miloonji n'kaakë bisë tubësënë baveekë, « Naandyaawu, wasafulë Nzaambi! »

⁴ Yeesu wusë bakulë simbalulu syaawu i wutubë : « Cibilë-mbici luke simbalulu simbye?

⁵ Licyelikë, mbici bileengë mu kutubë : “Mësumu maaku makobukë”, kaambofo mu kutubë : “Telëmë i lyaatë”?

⁶ Bwiinji, luzaabë ti Mwaanë muutu fë moongo butoto wuke yi lutumu lu kukobulilë mësumu. » Oboobo, naandi wusë kaambë cikatë : « Telëmë, nangunë nkwaalaaku i we yendi ku n'zwaaku! »

⁷ Kwatelëmi, naandi wusë kweendë ku n'zwaandi.

⁸ Bunë sinkoongë syamoni lyalyooli, bisë ba mu n'zenzë i ke dumisyaangë Nzaambi awu wavaanë lutumu lu mpilë oyo ke baatu lumoonyi.

Yeesu watelë Matye

⁹ Abu Yeesu kulëvyookë i wusë monë, libakëlë bën'teelë Matye, wabë wukalë fë cifutulu ci mpaku. Naandi wusë n'kaambë : « N'daandi! » Matye kutelëmë i wusë n'laandë.

¹⁰ Bunë kwakoti ku n'zo Matye, wusë sungëmë fë meesë, mpaapë binoongë mpaku i bisumuci bilë kwambulë fë cimweekë yimunë Yeesu i bilaanzi byaandi.

¹¹ Sifalisyaanu bunë bamoni lyalyooli, bisë kaambë bilaanzi byaandi : « Cibilë-mbici n'loonjiinu wulë mu kwambulilë fë cimweekë yimunë binoongë mpaku i bisumuci? »

¹² Yeesu, bunë kwayuwu lyaawu, wusë bëkaambë : « Yaaku ti bo bëkumë ba bën'toombaangë m'buci, vandi kasi bibeedo.

¹³ Zikulaanu kuzaabë suundu yi bisonë abi : “Miinu bwalëkisi yin'toombë, civakuli ko.” Licyelikë, miinu yisye kwisilë ko mu kutelë bo bësulëmë, kasi bisumuci. »

Liloonji li Yeesu lin'talë n'sweelë

¹⁴ Oboobo, bilaanzi bi Za-Batiisë bisë belëmë fëke Yeesu i bisë tubë : « Kwisilë buni ti beeso yimunë Sifalisyaanu tun'kaangaangë n'sweelë, akasi bilaanzi byaaku n'sweelë kukaangaangë ve, mu mbicye? »

¹⁵ Yeesu wusë bëvutulilë : « Bo batelu ku cikaanvu ci mëkweelë kupodi kuba mu cyuundë mooti n'nuni wuke yaawu mu nkoongë? Bilumbu bin'kwiisë, binë n'nuni wubëvokunu. Fa fanë fë naani, baawu bën'kaangë n'sweelë. »

¹⁶ « Muutu ve wum'podi kunamikë citini ci n'lelë cimoonë mu n'lelë wunkulu. Cibilë, n'lelë wumoonë, wun'titikë cyo cinkulu i libulu kulutilë kwangililë.

¹⁷ Bisë n'tulaangë ko mëlafu mëmoonë mu bidoyi binkulu. Ningë boobo, bidoyi binkulu kwanzikë i mëlafu kwitikë. Oboobo, mëlafu i bidoyi kunyambëkënë. Kasi bën'tulaangë mëlafu mëmoonë, mu bidoyi bimoonë i byakë byooso bin'lundëmë deku-dekoo. »

Yeesu wabelusi n'cyeetu wabë yi lukuumbi lu meengë i wavulumunë nduumbë n'cyeetu yabë yifwa

¹⁸ Bunë Yeesu wulëbëkambilaangë mamoomo, n'kuluutu Sizwiifë wusë kubasikë, kufukumë fë ntwaalaandi i wusë tubë : « Buyifanwabu mwanaami wu n'cyeetu wafwa. Kasi, yisë wun'tendikë kooko kwaaku fë n'tu i naandi wun'ziingë. »

¹⁹ Yeesu kutelëmë i wusë n'laandë yimunë bilaanzi byaandi.

²⁰ Foofo n'cyeetu wabë lukuumbi lu meengë fë kuumi mivu wali wusë belëmë Yeesu ku mbusë i wusiimbë sosu cinkutu cyaandi.

²¹ Naandi wulëtubaangë naveekë : « Ningë yibe siimbë keti sosu cinkutu cyaandi, miinu yim'belukë! »

²² Yeesu wusë kubalukë, kwam'moni, naandi wusë kaambë : « Ciimbë moonyi, lufyaatu lwaaku lwakuvuuci! » I fo cimweekë, n'cyeetu owo kusundilë kubelukë.

²³ Yeesu kwatuuci ku n'zo n'kuluutu beenë i kwamoni bisikë mimpyeepi yi nkoongë yibelëminë yilëcitikaangë ncyeembi,

²⁴ naandi wusë bëkaambë : « Yakënaanu, kasi nduumbë n'cyeetu wusye fwa kuve, kasi tolo kwanuukë. » Baawu bisë n'dyeengë.

²⁵ Bunë kwakulë nkoongë ku ngaandë, kwakoti Yeesu wusë siimbë kooko kwaandi i wusë telëmisi nduumbë n'cyeetu.

²⁶ Saangu yisë nyambë bwendi nyalu-n'toto.

Yeesu wabelusi simpofo wali

²⁷ Bunë kwavyooci fa foofo, mpofo wali bisë ke n'laandaangë ke losukaangë : « Yeesu mwaanë Daviidë tufwiili cyaali. »

²⁸ Bunë kwatuuci ku n'zo, simpofo wali kum'belëmë i Yeesu wusë bëkaambë : « Beeno luke ciminu ti miinu yim'podi kulivaangë lyaliili? » Baawu kun'cikuninë : « Mweenë-ngete, Fumu. »

²⁹ Oboobo, naandi wusiimbë meeso maawu i kutubë : « Bwe vangini mu beeno bunë bun'kwendilë ciminu ciinu. »

³⁰ Meeso maawu kuzibukë. Yeesu kubëkandiminë yi nkasu bëleembu kulibulilë lukuungu ke wosuku.

³¹ Bunë basikë, baawu bisë ke leelaangë saangu mu naandi bwendi nyalu-n'toto.

Yeesu wabelusi libabë

³² Bunë babasikë, bisë n'leesi libakëlë li libabë livwaatu ke ciluunzi cibi.

³³ Bunë kwakuli ciluunzi cibi, libabë lisë bulë mbeembu. Sinkoongë sisë bwa libobo i kutubë : « Tee yi zwaalu, tumweeni vyaasi ko lyaliili mu Islayeelë. »

³⁴ Sifalisyaanu bisë ke tubaangë : « Mu mëngolo më n'kuluutu biluunzi bibi mwa kuke kulilaangë biluunzi bibi. »

Yeesu wafwiilë nkoongë baatu cyaali

³⁵ Yeesu wulë ke tabaangë mu mëvulë i mu maalë makë mooso. Naandi wulë ke loongaangë mu bizutununu byaawu i ke tendulaangë Mpolu Mboti yi Lwaangu i wulë ke belusyaangë yosuku mpilë ncyeenzu i yosuku mpilë bibolikinyi.

³⁶ Kwamoni sinkoongë, cyuundë kun'kotilë mu cibilë cyaawu, buke mëmemë mëkaambu n'luungë.

³⁷ Oboobo, naandi wusë kaambë bilaanzi byaandi : « Bisalu bifunë, kasi bisasi bicyo.

³⁸ Mu cibilë ocyo, loombaanu ke fumu solë bwiinji kufilë bisasi mu solaandi. »