Matye 8 - N’KANGULU WUMOONË

Yeesu wabelusi mungë bwaasi

¹ Yeesu wusë kulumukë limoongo i mpaapë baatu bisë n'laandë.

² Mungë bwaasi kum'belëmë i wusë kufukumë fë ntwaalaandi i wutubë : « A Fumu, mooti wulizolisi, njeeyi wum'podi kun'lyomisi. »

³ Wusë n'taambë kooko, kun'siimbë i kutubë : « Miinu yilizolisi, we lyoomi! » Wusë sundilë kulyoomë mu bwaasi bwaandi.

⁴ Yeesu wusë n'kaambë : « Bilii, wulë bulilë lukuungu yi muutu ko. Kasi, yeendë we yileesi ke ngangë-Nzaambi, we vaani mpaku bunë bën'lombilë n'kaakë Moyiizë, bwiinji baatu booso bëzaabë ti njeeyi wabelukë.»

Yeesu wabelusi ciseelu ci n'kuluutu-mësodaadi

⁵ Bunë Yeesu kwe koti ku Kapelënawuumë, n'kuluutu-mësodaadi wu Loomë wusë m'belëmë i wusë n'loombë mu kun'zudi.

⁶ Wutubë : « A Fumu, ciseelu cyaami cinuukë ku n'zo, binamë byavolë i wuke beenë mu mpasi. »

⁷ Yeesu wusë n'kaambë : « Miinu yin'kwisë mu kum'belusi. »

⁸ Kasi n'kuluutu-mësodaadi wusë n'vutulilë : « A Fumu, busye fwanëkënë ko njeeyi mu kukotë ku n'zwaami. Kasi vumukë vwiili cikumë cimweekë i ciseelu cyaami cim'belukë.

⁹ Licyelikë, miinu yin'tumu ke bëkuluutu i yike yivaamë mësodaadi mu lutumu lwaami. Ningë yibe kaambë wun'viipë : “Yeendë!” Naandi kweendë. Ningë yibe kaambë wumesë : “Yiisë!” Naandi kwiisë. Ningë yibe kaambë n'dongwaami : “Vaangë ali!” Naandi kulivaangë. »

¹⁰ Bunë kwayuwu bikumë obyo, Yeesu wusë ba mu liyaanji i wusë kaambë banë bëyen'laandaangë : « Licyelikë yilukaambë : miinu yimweeni vyaasi ko muutu yi ciminu ci mpilë oyo, ku Islayeelë.

¹¹ Miinu yilusisimini, mpaapë bën'fuminë ku mëselukulu më ntaangu i ku mësindulu maandi, i bën'kalë fë meesë fë cimweekë yimunë Abalaamë, Isaakë i Zakoobë ku Lwaangu lu mëyilu.

¹² Baanë bë Lwaangu bëm'bumu ku ngaandë ku citoombi, kunë bën'lililë i bën'kweetë meeno. »

¹³ Yeesu wusë kaambë n'kuluutu-mësodaadi : « Yeendë, abu watuulë ciminu! » Ciseelu cyaandi cisë bëlukë mu zoolë beenë.

Yeesu wabelusi mpaapë bibeedo

¹⁴ Yeesu wusë kweendë ku n'zo Pyeelë. Na ke takënë n'kwekisi Pyeelë wulambëmë fë ciikë. Libaawu lyabë yaandi.

¹⁵ Kwan'siimbi mu kooko, libaawu lisë m'botukë i naandi wusë telëmë i wusë kun'salilë.

¹⁶ Mësikë matuuci, bënatë ke Yeesu mpaapë baatu bëvwaatu ke biluunzi bibi. Mu libuungu lyaandi na wukulë biluunzi bibi i wubelusi sincyeenzu syakë syooso.

¹⁷ Naandi wusë livaangë bwiinji buvangënë libuungu be lyoolyo li m'bici Ezayi : « Naandi wuboongë simpasi siitu, i wusë botulë sincyeenzu siitu. »

Banë bën'vwa n'ciinzë kulaandë Yeesu

¹⁸ Yeesu bunë kwamoni nkoongë baatu yinenë yin'zukë, naandi kuvaanë lutumu ke bilesi mu kusabukë yaandi ku samu-simu li liyaangë.

¹⁹ N'loonji n'kaakë kum'belëmë i wusë n'kaambë : « A Fumu, miinu yikulaandë fosuku fanë wun'kwendë. »

²⁰ Yeesu wusë n'cikuninë : « Mibaku yike yi mëbulu, i sinuni si yilu sike yi maanzë maawu, kasi Mwaanë Muutu wukeeli ko fo fë kunukinë i fë kuvundilë. »

²¹ Wun'ka mu nkoongë bilaanzi kutubë ti : « A Fumu, mbiici ye ziicyoobo tataami. »

²² Yeesu kun'cikuninë : « N'daandi, biikë sinvuumbi beziikë sinvuumbi syaawu! »

Yeesu wabutikë mpeemo-ngudi

²³ Yeesu wukandëmë mu bwaatu i bilaanzi byaandi kun'laandë.

²⁴ Kususukulabu, mpeemo-ngudi yipukë mu m'bu, masi nkanë makun'waalë mu bwaatu, kasi naandi tolo kulë nuukë.

²⁵ Bilaanzi byam'belëmi, bisë n'kotulë i bisë tubë : « A Fumu, tuvuuci! Twakun'fwa! »

²⁶ Naandi wusë bëkaambë : « Beeno boomë bu mbici? A bangë ciminu ciciici! » Oboobo, naandi wusë manë n'telë, kutundilë mpeemo i m'bu i n'sikë wunenë wusë ba.

²⁷ Baatu bakë booso bisë bwa libobo i bisë tubë : « Mpilë mbici muutu owo, mpeemo i m'bu bëkun'yuwulu? »

Yeesu wabelusi baatu bwaali bëvwaatu ke biluunzi bibi

²⁸ Bunë kwatuuci ku samu-simu, ku lweeku lu libweeti li Ngadala, baatu bwaali bëvwaatu ke biluunzi bibi bëbasikë fë meeyi bizyaami. Baawu babë bubaalu, muutu ve wulëpodi kuvyokilë mu nzilë be yooyi.

²⁹ Baawu bisë losukë : « Njeeyi mbi wun'toombë ke beeso, a Mwaanë Nzaambi? Njeeyi wakwiisë mu kutunyokulë ntaangu kufwaanë mpe? »

³⁰ Fisë ba mwa n'takë, n'kaangu singulu wulë ke toombaangë ndiiwu.

³¹ Biluunzi bibi bisë bondililë Yeesu : « Ningë njeeyi wun'toombë kutukulë, tufili mu n'kaangu singulu osyo. » —

³² Naandi wusë bëkaambë : « Yendaanu! » Baawu bisë basikë i ke kotë mu singulu. Mëlengë-lengë, n'kaangu wooso wusë nengëmukë libiindu kusuundilë ke yifwaangë mu m'bu i baawu bisë fwa mu masi.

³³ Banë bëlëlikilaangë singulu kutiinë i bisë kweendë ku livulë, ke lëlë saangu mu makë mooso i mo mëmonikinë bo bëvwaatu ke biluunzi bibi.

³⁴ Livulë lyooso lisë kubasikë mu kudyengënë Yeesu. Abu bam'moni, baawu kum'bondililë, bwiinji kutabilë cinaanu yi mitotwaawu.