Matye 7 - N’KANGULU WUMOONË

Nufundisyaanu ko bëmesë

¹ « Nufundisyaanu ko bëmesë, mu kumaangë bëlufundisi.

² Cibilë Nzaambi wulufundisi bo lun'fundisyaangë bën'ka. Bëluzongilë mu cizongulu cinë lubëzongililaangë.

³ Cibilë-mbici njeeyi wulë mu kumonë lukuunzë mu lyeesu li mwanaaku nguli i kasi wun'kaambu kumonë likuunzi like mu lyeesu lyaakwe?

⁴ Kaambofo, buni wum'podi kukaambë mwanaaku nguli : “Biikë miinu yibotulë lukuunzë luke mu lyeesu lyaaku”, kosuku njeeyi ke yi likuunzi mu lyeesu lyaaku?

⁵ Cimpilë-mpiipi, botuloobo ntetë likuunzi like mu lyeesu lyaaku! Fa foofë, faawu wum'mweenë buboti buni bu kubotulilë lukuunzë luke mu lyeesu li mwanaaku nguli.

⁶ Luvanyaanu ko cinë cike ci saantu ke simbwa, mu kumaangë naandi kulubalukulë i kulubeenzaanu. Nubumyaanu ko misaangiinu ke singulu, mu kumaangë syaawu kusilyatilë. »

Loombaanu, toombaanu i dodumunaanu fë livitu

⁷ « Loombaanu i beeno lun'tambulë. Toombaanu i beeno lum'bakë. Dodumunaanu i bëluzibulilë.

⁸ Cibilë wosuku wun'loombë wum'bakë, wunë wun'toombë wum'monë, i bën'zibulilë wunë wun'dodumunë.

⁹ Muutu mbici mu nkoongiinu wun'vaanë limanyi ke mwanaandi wukun'liindë limpa?

¹⁰ Kaambofo kun'vaanë nyookë ningë bëloombë mbisi?

¹¹ Lembuko beeno ludiifë, luzabisi kuvaanë biimë biboti ke baanë biinu. Kwisilë buni, Tatiinu wuke ku mëyilu wun'kaambu kuvaninë biimë biboti ke banë bëkun'loombë! »

¹² « Cyosuku lun'vwa n'ciinzë ti baatu bëvangilë mu beeno : bo bumweekë vaangaanu mu baawu. Mati bwa boobo bun'tubilë n'kaakë Moyiizë i mibici. »

Livitu libatëkënë

¹³ « Kotilaanu fë livitu libatëkënë, cibilë livitu liyangililë i nzilë yike buungwaa bilunatë ku lufwa. I mpaapë bën'vyokilë mwaawu.

¹⁴ Kasi livitu lin'natë ku luziingu libatëkënë i nzilë yikwendilë kwaawu yitudë. Mwa m'poku kwaandi wum'podi kumëbakulë. »

Mibici lupuutu

¹⁵ « Kebaanu mu mibici lupuutu. Baawu bën'kwisilë ke beeno mu mpwatulu mëmemë, kasi mu kati kwaawu mikoomo.

¹⁶ Beeno lubëzabilë mu mëvaangë maawu. Bë kusë n'velilaangë ko mëkuundi më viinyi mu siseendë, keti mëngengë mu n'ti siseendë.

¹⁷ Wosuku n'ti wumboti, wum'butaangë mëkuundi mëboti, kasi, n'ti wu m'bi wum'butaangë mëkuundi mëbi.

¹⁸ N'ti wumboti kupodi ve kubutë mëkuundi mëbi i n'ti wu m'bi kubutë ve mëkuundi mëboti.

¹⁹ Wosuku n'ti wun'kaambu kubutë mëkuundi mëboti wun'tyelu i wun'laku ku mbaasu.

²⁰ Oboobo, beeno lun'zabilë mibici lupuutu mu mëvaangë maawu. »

Kutubë i kuvaangë

²¹ « Yaaku ti bakë booso bën'tubaangë : “Fumu, Fumu”, bën'kotë ku Lwaangu lu mëyilu, kasi banë bën'vaangë n'vwiilu wu Tataami wuke ku mëyilu.

²² Mu cilumbu ci Lufundusu, mpaapë bëkun'kaambë : “A Fumu, a Fumu! Mati mu lizinë lyaaku mwaawu twabikulilë. Mati mu lizinë lyaaku twakulilë biluunzi bibi. Mati mu lizinë lyaaku mwaawu twavangilë mpaapë bimakë!”

²³ Bwaawu yibëkaambë : “Yisye luzaabë ko. Yakënaanu cinaanu yi miinu, beeno bivadë-mbi!” »

Sinzo siwali

²⁴ « Mu lyaawu, wosuku wun'kuwu mëbuungu maami i wumësalilë, wum'ba dedë mweekë mungë mëlyeelë wutuungë n'zwaandi fë yilu limanyi li ngooto.

²⁵ N'vulë yanokë, miilë yawaalë, mpeemo yabwiilë mu n'zo be yooyo, kasi yaawu yisye bulumukë ko, cibilë simbaandu syabë situngulu fë limanyi li ngooto.

²⁶ Wosuku wun'kuwu mëbuungu maami i wun'kaambu kumësalilë, naandyoowo, cila-lawu citungilë n'zwaandi fë cisenginini.

²⁷ N'vulë yanokë, miilë yawaalë, mpeemo yabwiilë mu n'zo beenë i yaawu yabulumukë : yakë yooso yisë vongumukë. »

Lutumu lu Yeesu

²⁸ Yeesu bunë kwamani kuvaanë mëloonji omo, bakë booso bisë bwa libobo mu ntekwaandi yikulongilë.

²⁹ Cibilë naandi sye ba ko bukë miloonjyaawu n'kaakë, kasi wulëbëloongaangë yimunë lutumu.