Matye 5 - N’KANGULU WUMOONË

Ndoonji fë yilu moongo (mitu-buungu 5-7)

¹ Bunë Yeesu kwamoni sinkoongë, naandi wusë makë fë yilu moongo i wusë kalë. Bilaanzi byaandi bisë m'belëmë

² i wusë bëloongë :

Sinyeenzi si cibeeni

³ « Nyeenzi ke biyeembi mu ciluunzi, cibilë Lwaangu lu mëyilu lwaawu.

⁴ Nyeenzi ke banë bën'lilë, cibilë bëbëboondu.

⁵ Nyeenzi ke bibonzulu, cibilë bëm'byaalilë n'toto.

⁶ Nyeenzi ke bifwa-nzalë i bëke mu mpwilë n'sulumunu, cibilë bën'kukutu.

⁷ Nyeenzi ke banë bëke yi bwalëkisi, cibilë bën'tambulë bwalëkisi bu Nzaambi.

⁸ Nyeenzi ke banë bëke yi n'timë wulyoomë, cibilë bëm'monë Nzaambi.

⁹ Nyeenzi ke banë bën'tuulë n'sikë, cibilë Nzaambi wubëteelë baanë baandi.

¹⁰ Nyeenzi ke banë bën'kwamusu mu cibilë ci n'sulumunu, cibilë Lwaangu lu mëyilu lwaawu.

¹¹ Nyeenzi ntaangu bëlufingilë, bëlukwamisi, bëlutumbilë simbi simpilë ku mpilë, cibilë lwata maanë mu miinu.

¹² Lwe saangilaanu, baanu mu nyeenzi, cibilë n'seendu wunenë wulë mu kuluviingë ku mëyilu. Mati bwaawu, licyelikë, bënyokililë mibici banë bëziingë ntetë yi beeno. »

Saalu i cyeseesë

¹³ « Mati beeno saalu yi n'toto. Kasi ningë lutwiingu lwavufukë, buni bum'podi kube vutulilë lutwiingu lwaandi? Saalu oyo yisyeeli n'ciinzë ko. Bëyibumë ku ngaandë i baatu bëyilyatilë. »

¹⁴ « Mati beeno cyeseesë ci buloongo, mooti livulë litungulu fë yilu moongo, lyaawu mëswamunu mpa.

¹⁵ Mpilë mweekë yivaandi, mooti batatikë mwiindë, yaaku mu kuwubatë kusi cipaanë ko, va mu kuwunanjikë fë yilu cicyetukulu ci mwiindë, bwiinji wuvaanë cyeseesë ke bakë booso bëke mu n'zo.

¹⁶ Mati bwaawu bufwenikini cyeseesë ciinu cin'lesikë fë meeso më bakë booso, bwiinji bakë booso bëmonë bisalu biinu i bëdumisi Tatiinu wuke ku mëyilu. »

Liloonji lin'talë n'kaakë

¹⁷ « Lwe balyaanu ko ti miinu yiyisilë mu kubotulë n'kaakë Moyiizë i mëloonji më mibici. Miinu yisye kwisilë ko mu kubibotulë kasi mu kuvaanë nguliku suundwaandi.

¹⁸ Cyelikë yilukaambë : tee yi fanë li yilu i n'toto bën'vyookë, cikumë ve ci n'kaakë cim'botukë, i citodi ve ci cisonë cin'kubukë, tee yi fanë makë mooso mën'vangeninë.

¹⁹ Mu cibilë ocyo, wunë wun'kaambu kucinzikë lin'viipë mu tutumu oto, keti mwa lutumu lucyeeci kwaandi i wun'loongë baatu mu kusiilë katiboobo, naandyoowo mba wun'teelu wuvyokilili bucyeeci kunë Lwaangu lu mëyilu. Kasi, wunë wun'cinzikë tutumu be tooto i wutuleesi ke bën'ka, naandyoowo wun'teelu n'nenë kunë Lwaangu lu mëyilu.

²⁰ Licyelikë yilukaambë, ningë beeno lusye mba bësulëmë ko, kuvyookë miloonji n'kaakë i Sifalisyaanu, beeno lusë n'kotë ko ku Lwaangu lu mëyilu. »

Liloonji mu linë lin'talë fiti

²¹ « Beeno luyuwu bëkaambë sinkaakë siinu : “Keelë kuvoondë muutu. Wunë wun'voondë mutuyaandi, liboti bën'natë ku cinzonzi.”

²² Miinu yilukaambë : wosuku wun'dasukilë mbaasyaandi, wube fwanëkënë kunatu ku cinzonzi. Wunë wun'kaambë mbaasyaandi : “Civulu”, naandyoowo wufwenikini kunatu ku cinzonzi. Mooti wun'viipë wun'fiingë mwanaandi nguli “cila-lawu,” naandyoowo wun'fuukë, wun'lakëtë.

²³ Ningë wun'kwindulë likabu lyaaku fë civakululu, i watebukë moonyi ti mwanaaku nguli wuke yi linyoonji mu njeeyi,

²⁴ biikë foofë likabu lyaaku fë civakululu, vutukënë mu ke kuwusënë yimunë mwanaaku nguli, fë siitu, we yisi mu kwindulë likabu lyaaku ke Nzaambi. »

²⁵ « Ningë wuke yi lyaambu yi wun'viipë, lengë kuwusënë yaandi mu nzilë yikwendilë ku cinzonzi, yimunë mbenyaaku, lengë tubësënaanu, luyuwusënaanu, mu kumaangë naandi kukulekulë mu myooko nzoonzi, i nzoonzi kukuvakulë ke lisodaadi i mu kukulakë mu buloko.

²⁶ Licyelikë yikukaambë : wusë yibasikilë ko mwaawu, kukaambu kumanisi kufutë n'kanwaaku tee fë likutë li siitu. »

Liloonji mu lyaambu li kuvaalë

²⁷ « Beeno luyuwu : “Keelë wulëvaalë.”

²⁸ I miinu yilukaambë : wunë wun'talë n'cyeetu yi cideenzë, naandyoowo wavaalë yimunë naandi.

²⁹ Ningë lyeesu lyaaku li mëbakëlë likukosi mu lisumu, tumunë lyaawu i wulilakë cinaanu yi njeeyi: mëyoolë, kukaambu cinamë cimweekë, yi nyitwaaku yooso kulaku ku buluunji bu mbaasu.

³⁰ Ningë likaandë lyaaku li kooko ku mëbakëlë likuvangisi kubwa mu lisumu, cyelë lyaawu i lilaci cinaanu yi njeeyi: mëyoolë njeeyi kukaambu cinamë cimweekë ci nyitwaaku yi kweendë wun'viipë ku buluunji bu mbaasu. »

Liloonji mu lyaambu lin'fwilulu likweelë

³¹ « Bëtubë yivaandi ti : “Wunë wum'botulë n'kasyaandi fë likweelë, wufwenikini kun'tambikë n'kaandë mu kuvondilë likweelë.”

³² Miinu yilukaambë : lyosuku libakëlë lim'botulë n'kasyaandi wukambusu kuvaalë, wukun'vangisi kuvaalë ningë wube bëkweelë. Wunë wun'kweelë n'cyeetu bëbotulë fë likweelë, wun'vaalë. »

Liloonji lin'talë kulefë-mpesë

³³ « Beeno luyuwu yivaandi bëkaambë sinkaakë siitu : “Wulekuli mpesë ko, kasi vaangë linë wulefilë mpesë fë nduunzi Fumu.”

³⁴ Miinu yilukaambë : lulefyaanu yosuku mpesë ko, keti mu li yilu, cibilë li yilu ntaanji Fumu.

³⁵ Keti mu n'toto, cibilë waawu cilyatilë cyaandi ci maalu. Keti mu Yelusaleemë, cibilë lyaawu livulë li n'tinu wunenë.

³⁶ Wulefë mpesë mu n'twaaku ko, cibilë njeeyi wusë m'podi ko kucitulë n'leenjyaaku wumweekë kufyootë kaambofo mpeembi.

³⁷ Tubaanu tokë “ngete” mooti ngete, “moniko” mooti moniko. Mooti lin'ka litetëmë ofo ke Civadë-mbi lyafuminë. »

Liloonji lin'talë mputululu fuutë

³⁸ « Beeno luyuwu bëtubilë abu : “Lyeesu munë lyeesu, lyeeno munë lyeeno.”

³⁹ Miinu yilukaambë : keelë wulëwutulë fuutë ke wunë wukuvaangë simbi. Ningë wun'viipë wubëkuyukë mbatë fë litoolo li mëbakëlë, m'biici wukuyukë yivaandi fë litoolo li mëcyeetu.

⁴⁰ Ningë wun'viipë be kunatë ku mikaakë mu kukuvokënë cinkutu cyaaku, m'bikilë yivaandi ciyuungë cyaaku.

⁴¹ Ningë wun'viipë be kuvangisi kulyaatë fë n'takë mweekë, lyaatë yaandi mitakë wali.

⁴² Vaanë ke wunë wulë mu kuloombë cin'viipë. Keelë wulëmaangë kudefisi ke wunë wun'toombë wun'defisi. »

Luzolo mu simbeenyi

⁴³ « Beeno luyuwu bëtubë : “Zolë mbaasyaaku i leendë mbeenyaaku.”

⁴⁴ Miinu, yilukaambë : zolaanu simbeenyi siinu, sambililaanu mu bo bëlukwamisi.

⁴⁵ Oboobo, beeno, cyelikë, lum'ba baanë bë Tatiinu wuke ku mëyilu. Cibilë naandi wun'selulaangë ntaangwaandi mu bangë bubaalu i bo bëkaambu bubaalu, naandi wun'nocyaangë n'vulë mu bëzitu i bo bëkaambu kuzitëmë.

⁴⁶ Ningë beeno lun'zolë vwiili bo bëluzolisi, ndobu mbici Nzaambi wum'podi kuluvaanë? Binoongë mpaku, yivaawu bisë n'siilaangë bo bumweekë kwe!

⁴⁷ Ningë lube bilë tokë baanë yiinu bë nguli, lyaambu mbici liboti beeno lun'vaangë? N'lembuko sipayi bën'vangilaangë bo bumweekë!

⁴⁸ Lwe baanu lusulëmë, bo buke Tatiinu wuke ku mëyilu wuke wusulëmë. »