Matye 3 - N’KANGULU WUMOONË

Lutendulu lu Mpolu Mboti lu Za-Batiisë

¹ Mu bilumbu be binë binaani, Za-Batiisë wusë basikë mu ke tendulaangë mu ntaandu ciyumi yi Zudee :

² « Balulaanu mëvaangë, cibilë Lwaangu lu mëyilu lwabelëmë. »

³ Licyelikë, na wuuwu na m'bici Ezayi kutubilë ti : « Mbeembu yilë mu kutendukë mu ntaandu ciyumi : Bëlikilaanu nzilë yi Fumu, sulikaanu tobulu twaandye! »

⁴ Za wuvwaatë cinkutu bëtungilë mu miikë cibulu bën'teelë samo i n'siingë lucyeto wu n'kaandë cibulu. Bilya byaandi byabë mëkoonkë i mëfutë më nyosi n'situ.

⁵ Oboobo, basë livulë li Yelusaleemë, li Zudee lyooso i likomu lyooso li mwiilë Yulëdaani, bëlëkwendaangë ke naandi.

⁶ Baawu bëlëfungulaangë mësumu maawu i Za wulëbëbatizyaalaangë mu mwiilë Yulëdaani.

⁷ Abu kulëmonë mpaapë Sifalisyaanu i Sisadusyaanu bëlëkwisaangë ke naandi mu kubatizyaalu. Naandi wusë bëkaambë : « Liloongu li simpili! Nani waluleesi kutiinë likaanzi li Nzaambi lin'kwiisë?

⁸ Leesyaanu mëvaangë ti beeno lwavilukë

⁹ i nubalyaanu ko ti lufwenikini tokë kutubilë mu benuveekë : “Beeso tuke yi tatiitu, Abalaamë!” Cibilë, yilukaambë ti Nzaambi kupodi kusalilë mëmanyi lum'monë omo mu kumëcitulë sindaandu si Abalaamë.

¹⁰ Citali cibeliminë mu kucyeelë singaanzi si miti : wosuku n'ti wun'kaambu kubutë mëkuundi mëboti wun'cyeelu i wun'laku ku mbaasu.

¹¹ Miinu, yilë mu kulubatizyaalë mu masi bwiinji beeno luvilukë, kasi wunë wulë mu n'kwiisë ku mbusaami wulubatizyaalë mu Ciluunzi ci Saantu i mu mbaasu. Naandi mwiinji luleendo yi miinu : yisye fwanëkënë kuve kuvuulë mëpaapë maandi.

¹² Naandi wun'simbililë cicyenzulu fë kooko i wun'cyeenzë i wun'kabulë lungeenzë i citiiti. Naandi wun'kucikë lungeenzë lwaandi mu ntalë, kasi wun'kookë citiiti mu mbaasu yin'kaambu kuzimaangë. »

Lubatizyaalu lu Yeesu

¹³ Oboobo, Yeesu wufuminë lu Ngalilee ku Yulëdaani. Naandi wusë tuukë ku mwiilë Yulëdaani fëke Za mu kubatizyaalu.

¹⁴ Za finu wake m'maangë i wusë tubë : « Miinu, yifwenikini kubatizyaalu ke njeeyi, abu ti njeeyi wan'kwiisë ke miinu! »

¹⁵ Kasi Yeesu wusë n'vutulilë ti : « Afaafë, vitikë lyaawu libeelë boobo. Cibilë boobo bwa bufwenikini kuvangininë n'vwiilu Nzaambi. » Oboobo, Za wusë vitikë.

¹⁶ Bunë Yeesu kwabatizyaalu, wusë tapukë mu masi. Mo mu ntaangu mweekë, li yilu kuzibukë i naandi kumonë Ciluunzi ci Nzaambi cisë kulukë buke libeembi i cisë betëmë mu naandi.

¹⁷ Mbeembu yilëbasikilë lu yilu yilëtendukë : « Awuuwu mwanaami wu mëdilë, mu naandi mwa muke sinyeenzi syaami syooso. »