Matye 28 - N’KANGULU WUMOONË

Luvulumuku lu Yeesu

¹ Fë m'busë saba, lumiingu fë mëcyecyelu më bwiisi, Maali li Magëdaalë yi Maali limesi bëyeendë mu ke monë libuumbë.

² Kuzimbukulabu, fisë ba lututumuku lu n'toto. Yaanzi yi Fumu yisë kulukë luyilu, kukundubulë limanyi i wusë kalë fë yilu.

³ Naandi wabë buke lusyeemu i n'vwaatwaandi wumanyikë mu mpeembi buke m'buunji.

⁴ Biluungë libuumbë kutekëtë mu boomë i bisë kotë mpaci.

⁵ Yaanzi wusë bulë mbeembu i kukaambë bëcyeetu : « Nubacyaanu boomë ko. Cibilë miinu yizabisi ti lun'toombë Yeesu, wunë bëbaandë fë kuluusu.

⁶ Naandi wusyeeli faafë ko, wavulumukë, buni kulitubilë. Yisaanu i monaanu fanë bën'nungunë.

⁷ Yendaanu lwe lengë kaambë bilaanzi byaandi ti naandi wavulumukë mu nkoongë bëfwa. Talaanu, naandi watwaamë ku Ngalilee. Kwa kunë kunanaani kwa lukum'mweenë. Miinu yalukaambë. »

⁸ Baawu bisë sundilë kwakënë yi libuumbë, aku boomë, aku yi liyaanji linenë i bisë kumbelëlë ntiinu mu kunatë cikuumbu ke bilaanzi bi Yeesu.

⁹ Kuzimbukulabu, Yeesu kubëdyengënë i wusë tubë : « Bwekaanu. » Baawu bisë belëmë mu kusiimbë maalu maandi i kun'kuundë.

¹⁰ Mu lyaawu, Yeesu wusë bëkaambë : « Nubacyaanu boomë ko, yendaanu lwe kaambi baanë yaamë bë nguli beendë ku Ngalilee. Mati kuunë bëkum'mweenë. »

N'zisi mësodaadi

¹¹ Mu nzilë sikwendë, mwa baatu mu nkoongë mësodaadi bëkotë ku livulë i bisë kwalulilë makë mooso më bëmonikinë, ke bëkuluutu bë singangë-Nzaambi.

¹² Bëkuluutu bë singangë-Nzaambi, bëkalë fë cimweekë yi mëkakëtë i bisë tubësënë, baawu bisë vaanë civweetu ci mboongo ke mësodaadi,

¹³ i bisë bëkaambë : « Beeno kutubë bilaanzi bi muutu be woowo bakwiibë vuumbyaandi mu bwiilu, ntaangu yo beeno lube lembikilaangë.

¹⁴ Ningë n'tinu be liyuwu, beeso tun'zaabë buni bukun'vosilë n'timë i beeso tuluyobulë. »

¹⁵ Mësodaadi bisë boongë simboongo i bisë landilë bunë bëbëkambilë. N'zisi be woowo wusë nyambë mu nkoongë Sizwiifë tee cibubwayi.

Yeesu wamonikinë bilaanzi byaandi

¹⁶ Likuumi cilaanzi cimweekë bisë kweendë ku Ngalilee, fë yilu moongo wo Yeesu kubësulikilë.

¹⁷ Bunë bam'moni, baawu bisë n'kuundë. Kasi bën'viipë mu baawu kufindënë simpakë.

¹⁸ Kwa bëbelëmi, wusë bëkaambë : « Lutumu looso lum'peewu ku yilu i fë n'toto.

¹⁹ Lwe yendyaanu ke baatu bë mboongu syakë syooso i lwe bëvaanjyaanu bilaanzi byaami, ke bëbatizyaalaangë mu lizinë li Taatë, li Mwaanë i li Ciluunzi ci Saantu.

²⁰ Bësinyaanu makë mooso yilutuminë. Talaanu, miinu yike yiinu bilumbu byooso tee yi fanë situkulu buloongo. »