Matye 27 - N’KANGULU WUMOONË

Yeesu wavakulu ke Pilaatë

¹ Mu mbingu menë-ngwaali, bëkuluutu booso bë singangë-Nzaambi i mëkakëtë më mboongu baatu kukotë fuundu mu kutabë Yeesu lufwa.

² Bamani kun'kaangë bikonyi, baawu kun'natë i bisë ke n'vakulë ke Pilaatë.

Lufwa lu Zuda

³ Zuda wunë wun'vakulë, kwayuwu ti batabë Yeesu lufwa. Naandi kunyotëkënë i wusë vutulë mëkumë-tatu më binkongulu bi mboongo, kuke bëkuluutu bë singangë-Nzaambi i mëkakëtë.

⁴ Naandi wusë tubë : « Miinu yasumukë, yavakulë meengë më mwaanë mpeembi yi mpeso. » Baawu bisë tubë : « Mbici mu beeswe? Njeeyi mëkutalë! »

⁵ Kwabumi binkongulu bi mboongo mu civingë cisaantu, naandi wusë volikë i ke yilelikë.

⁶ Bëkuluutu bë singangë-Nzaambi kunoongë binkongulu i bisë tubë : « Beeso tukeeli yi n'swa ko mu kusibuundë yimunë mëkabu më n'zo-Nzaambi, cibilë, oloolo luvunu lu meengë. »

⁷ Bamani kudedikini mitimë, mu simboongo beenë bisë suumbë solë cifikulë sizuungu situmë, mu kuzikilaangë beenyi.

⁸ Mati mu lyaawu, solë beenë bëyitelë « Solë meengë » tee cibubwayi.

⁹ Mu bwaawu busë vangënë lyo litubë Yelemi m'bici : « Baawu bëboongë mëkumë-tatu më mboongo — luvunu lo baanë bë Islayeelë bëzitikë. —

¹⁰ Baawu bisë sivaanë mu kusuumbë solë cifikulë sizuungu situmë, bunë Fumu kun'tuminë. »

Yeesu fë nduunzi Pilaatë

¹¹ Yeesu wakun'tabu fë meeso më n'tinu, wunë wun'yufulë : « Njeeyi wuli n'tinu Sizwiifë? » Yeesu kun'cikuninë : « Njeeyi, walitubë. »

¹² Bunë bëkuluutu bë singangë-Nzaambi i mëkakëtë bëlën'fuundë, naandi sye vutulë cin'velë ko.

¹³ Pilaatë wusë n'kaambë : « Njeeyi wusë n'kuwu ko mamooso bëlë mu ke kufundilaangë? »

¹⁴ Kasi Yeesu mbeembu kuvutulë ve mu lyosuku libuungu i bwaawu, n'tinu wusë tulumukë.

Yeesu ban'tabë lufwa

¹⁵ Mu kadë n'saangu wu Paakë, n'tinu wabë yiciipë ci kubëbasilaangë wumweekë mu buloko, wunë nkoongë wulëzolaangë.

¹⁶ Munë ntaangu beenë, baawu babë yi mungë buloko wabë ndumu, bëlëteelë Yeesu li Balabaasë.

¹⁷ Abu babë lukoongu, Pilaatë wusë bëkaambë : « Nani luzolisi yilubasilë, Yeesu li Balabaasë voo Yeesu bën'teelë Kliistu? »

¹⁸ Licyelikë Pilaatë wulëzaabaangë kwaandi mu n'soci bëyin'vakulilë.

¹⁹ Ntaangu Pilaatë kukalilë ku cinzonzi, n'kamaandi wun'filë ciluumbi mu kun'kaambë : « Keelë wulëkotë mu lyaambu li muutu wu mpeembi yi mpeesu, kasi Cibubwayi, miinu, mu ndoosi, yibe monë mpasi beenë mu cibilë cyaandi. »

²⁰ Bëkuluutu bë singangë-Nzaambi yi mëkakëtë më Sizwiifë bisë lubulë nkoongë baatu mu kuloombë bëbëbasilë Balabaasë i mu kuvangisi kuvoondë Yeesu.

²¹ N'tinu kubulë mbeembu mu kubëyufulë : « Nani mu babë bwaali lun'toombë yilubikilë? » Baawu kucikunë : « Balabaasë! » .

²² Pilaatë kubëkaambë : « Miinu kuvangilë buni mu Yeesu awu bën'teelë Kliistu? » Babooso kucikunë : « Kwe baandu fë kuluusu! »

²³ Pilaatë wusë bëyufulë : « Libi mbici ku vangisye? » Baawu kulutilë kulosukë : « Kwe baandu fë kuluusu! »

²⁴ Pilaatë kwamoni ti wusë m'podi kutubë lin'viipë ko, tiilyoko ncyeembi ke lutilaangë, na kuboongë masi, wusë sukulë myooko fë meeso më nkoongë. Naandi wusë tubë : « Miinu yili mpeembi yi mpeeso mu meengë më n'zitu owo. Lyaawu olyo libe luyekiminë! »

²⁵ Nkoongë yooso yi baatu kulosukë : « Meengë maandi mëtyamukë mu beeso yimunë mu baanë biitu! »

²⁶ Mu bwaawu, Pilaatë kube yobulilë Balabaasë i fë mbusë bisë vivëdë Yeesu siswaali sinzimbulë-mbumë, naandi wusë bëlekulilë Yeesu mu kwe baandu fë kuluusu.

Bavwiikë Yeesu mpu seendë

²⁷ Mësodaadi më Pilaatë bisë natë Yeesu ku luumbu lu n'tinu, i bisë n'zukë ke nkoongë yooso yi mësodaadi.

²⁸ Ban'vuuli n'vwaatu, baawu bisë n'fukë ciyuungë cibeengë.

²⁹ Baawu kuvaangë mpu seendë, kun'vwiikë fë n'tu, i bisë n'tuulë liveeso fë kooko ku mëbakëlë. Baawu ke n'dyeengaangë, ke fukumaangë fë ntwaalaandi i kutubë : « Mëleembë omee, a n'tinu Sizwiifë! »

³⁰ Baawu ke n'taminaangë matë i kuboongë liveeso ke n'kongetaangë mu n'tu.

³¹ Bamani kun'dyeengë, baawu kun'vuulë ciyuungë, kun'vwiikë n'vwaatwaandi i bisë n'natë mu kwe baandu fë kuluusu.

Yeesu wabaandu fë kuluusu

³² Fanë ba basikilë ku livulë, baawu bisë dyengënë musë Sileenë, lizinë Simu i bisë n'kacikë mu kunatë kuluusu yi Yeesu.

³³ Batuuci fë mbiinji bën'telaangë Ngolëgotë, dedë ti « Mbiinji Lidokusu li N'tu ».

³⁴ Baawu bën'vaanë viinyi yi nkakutu mu kunwa. Kasi naandi wusye vitikë ko mu kuyinwa.

³⁵ Bam'baandi fë kuluusu, baawu bëbulë njekë bisë kabësënë n'vwaatwaandi.

³⁶ Bisë kalë foofë mu kun'luungë.

³⁷ Fë mbatë n'twaandi, bëtuulë libayë bësonikë : « Awuuwu Yeesu, N'tinu Sizwiifë. »

³⁸ Bilyaani byooli bibaandu fë tukuluusu, fë nteku Yeesu, wumweekë ku mëbakëlë i wumesë ku mëcyeetu.

³⁹ Banë bëlëvyookë faawu ke n'fiingaangë, ke nyinjyaangë n'tu.

⁴⁰ Baawu bëlëtubaangë : « Njeeyi wuzolë kutyamunë n'zo-Nzaambi i kuyitulikë fë bilumbu bi tatu, we yivuuci njeveekë! Mooti wuli Mwaanë Nzaambi, we kulukë fë kuluusu! »

⁴¹ Bo bumweekë, bëkuluutu bë singangë-Nzaambi, miloonji n'kaakë i mëkakëtë më Sizwiifë bëlë ke n'dyeengaangë yivaawu ke tubaangë :

⁴² « Naandi wuvuuci bën'ka, naveekë kupodi ve kuyivuucye! Mooti na wuli n'tinu Islayeelë, kwe kulukë buyifanwabu fë kuluusu, bwiinji beeso tuta maanë mu naandi.

⁴³ Naandi wufyaatë mu Nzaambi i wutubë : “Miinu yilë Mwaanë Nzaambi!” Ee, ningë Nzaambi wun'zolisi, kwe n'vuuci buyifanwabu! »

⁴⁴ Bilyaani bibaandu yaandi fë kuluusu bëlën'fiingaangë yivaawu bo bumweekë.

Lufwa lu Yeesu

⁴⁵ Fë ntaangu-mbatë, citoombi cisë batë si yakë yooso i cisë ziingë tee fë zoolë kuumi yin'taanu mu m'bukulu-bwiisi.

⁴⁶ Fë byeluku zoolë yivwa, Yeesu wusë losukë mu mbeembu nkamu : « Eli, Eli, lama sabakataani? » — Dedë mweekë : « Nzaambyaami, a Nzaambyaami! Mbici wakum'buminë? » —

⁴⁷ Bën'viipë mu banë babë faanë, bunë bayuwu, bisë tubë : « Naandi watelë Eli! »

⁴⁸ Wumweekë mu nkoongaawu, kukumbelëlë mu ke boongë lidedenvë, kulibwiikë mu viinyi nkakutu i wusë likwiikë mu liveeso, kun'vaanë mu kunwa.

⁴⁹ Kasi bëmesë bëlëtubë : « Biikë! Tumonaanu mooti Eli syawiisë kun'vuuci. »

⁵⁰ Yeesu kube losukë fë vyaasi yin'ka mu mbeembu nkamu i wusë fwa.

⁵¹ Mo më ntaangu beenë, n'lelë wabë kuciviingë wusë benzikë kutoninë ku yilu tee fësi. N'toto kututumukë, mëmanyi më ngooto kwanzikë,

⁵² mëbuumbë misë zibukë i mpaapë baatu babë sisaantu sifwa sivulumukë.

⁵³ Baawu bëbasikë mu mëbuumbë i fë luvulumuku lu Yeesu, bisë kotë ku Yelusaleemë livulë li saantu, mpaapë baatu be bëmonë.

⁵⁴ N'kuluutu-mësodaadi wu Loomë yi bo babë yaandi mu kuluungë Yeesu, bamoni lututumuku lu n'toto i manë mëlëvyookë, boomë bunenë kubëkotilë. Baawu bëtubë : « Muutu owo wabë nguliku Mwaanë Nzaambi! »

⁵⁵ Mpaapë bëcyeetu babë foofë, bëlëtalilaangë cinaanu i bëlëlaandë Yeesu, kutoonë ku Ngalilee mu kun'salilë.

⁵⁶ Munë nkoongaawu, mwabë Maali li Magëdaalë, Maali nguli Zaakë i Zozeefë i mamë baanë bë Zebedee.

Luzyamunu lu Yeesu

⁵⁷ Mësikë matuuci, kubasikë libakëlë li cisinë, li musë Alimaatë, bëlëteelaangë Zozeefë, wabë yivaandi cilaanzi ci Yeesu.

⁵⁸ Naandi wuye monë Pilaatë i wun'loombë nyitu yi Yeesu. Mu bwaawu Pilaatë wusë tumisi bën'vaanë yaawu.

⁵⁹ Zozeefë wusë boongë vuumbi, kuyiziingë fë lilasolë li mpeembi.

⁶⁰ Naandi wusë yituulë mu libuumbë limoonë, kuvangisi kutobulë limanyi li ngooto. Kumanoofo, na wukundubulë limanyi linenë fë nkotulu libuumbë i wusë ke yendaangë.

⁶¹ Maali li Magëdaalë i Maali limesë babë foofë, bëkalë fë ntwaalë libuumbë.

Lulungulu lu libuumbë

⁶² Cilumbu cilandëkënë, cyabë cilumbu ci lubelukulu ci saba, bëkuluutu bë singangë-Nzaambi yimunë Sifalisyaanu bëyeendë babooso fë cimweekë ke Pilaatë

⁶³ i bisë tubë : « A fumu, beeso twatandëkënë ti citombikini ci muutu owo, abu wabë moonyi wutubë : “Fë m'busë bilumbu bi tatu, miinu yin'vulumukë.”

⁶⁴ Mu cibilë ocyo, we tumisi bëluungë libuumbë tee cilumbu cin'tatu, mu kumaangë bilaanzi kukwiibë nyitu i kwiisë kukaambë mboongu baatu : “Na wavulumukë mu nkoongë bëfwa.” Lupuutu be loolo lu siitu lulëvyookë kudiifë yi lun'tetë. »

⁶⁵ Pilaatë wusë bëkaambë : « Beeno luke yi mësodaadi mën'luungaangë. Yendaanu lwe kun'luungaanu bunë lum'balilë. »

⁶⁶ Baawu bisë kweendë mu ke luungë libuumbë : kukandikilë limanyi lilëbatë libuumbë i bisë tuulë biluungë.