Matye 25 - N’KANGULU WUMOONË

Sasafë yikuumi li binkumbë

¹ « Mu bwaawu, Lwaangu lu mëyilu fwiifu yikuumi li binkumbë bëboongë miindaawu i bësikë mu ke dyenginyi n'nuni.

² Mu nkoongaawu bëtaanu babë bila-lawu i bëtaanu bëmesë babë mëlyeelë.

³ Bila-lawu, fanë bëlëbongilë miindaawu, bësye boongë yivaandi zeetë ko.

⁴ Kasi, bangë mëlyeelë bëboongë miindaawu yi mwa mpooko zeetë mu bipoopo.

⁵ Abu n'nuni wabë yibuunu kwiisë, bakë booso kuvolë bitu i bisë lembikilë.

⁶ Fanë katyaasi ku bwiilu, mbeembu kutendukë : “N'nuni naandyaawu, lwe basikaanu lwe n'dyengënyaanu!”

⁷ Mu bwaawu binkumbë byooso bisë kotukë i bisë belikilë miindaawu.

⁸ Bila-lawu bisë kaambë bangë mëlyeelë : “Tuvaanyaanu mwa fwaati fë zeetiinu, cibilë miindiitu yakë n'zimë.”

⁹ Bangë mëlyeelë bëvutulilë : “Moniko, cibilë yaawu kupodi ve kufwaanë mu beeso i mu beeno. Yendaanu mu siloosi lwe sumbyaanu yiinu benuveekë.”

¹⁰ Bunë bëlëkwendë mu kwe suumbi, n'nuni kwiisë kutuukë. Banë babë bëbeliminë bisë kotë yaandi ku n'zo cikaanvu ci mëkweelë i livitu kuzibëmë.

¹¹ Fë mbusë mwa siteepu, binkumbë bimesi kutuukë i bisë tubë : “A fumu, a fumu, tuzibulili.”

¹² Naandi wusë bëvutulilë : “Cyelikë yilukaambë, miinu yisye luzaabë ko.”

¹³ Oboobo, zungululaanu, cibilë lusye zaabë ko cilumbu keti zoolë. »

Sasafë yi biseelu bi tatu

¹⁴ « Lwaangu lu mëyilu fwiifu si aliili : muutu wulëkwendë mu mweendo. Naandi kuvekilë biseelu byaandi i naandi kubëbikilë binë kubakë.

¹⁵ Naandi kuvaanë binkongulu bi taanu bi woolë ke wun'tetë, binkongulu byooli ke wumwaali i cinkongulu cimweekë ke wun'tatu : Kadë muutu mu mëkanë maandi. I ke yendaangë mu mweendo.

¹⁶ Melengë-lengë, ciseelu citambulë binkongulu bi taanu kweendë, ke sasi i wusë bakë binkongulu bi taanu bin'ka.

¹⁷ Mpilë mweekë yivaandi mu wunë wutambulë binkongulu byooli, naandi wusë kubakë byooli bin'ka.

¹⁸ Kasi wunë wubakë cinkongulu cimweekë na ke sikë libulu mu n'toto i wusë sweekë simboongo si fumwaandi. »

¹⁹ « Fë mbusë mpaapë bilumbu, fumu biseelu beenë kuvutukë i wusë bëtelë mu kwiindulë bisalu byaawu.

²⁰ Wunë wutambulë binkongulu bi taanu kwiisë i wusë natë bitaanu bin'ka i wukaambë fumu : “Njeeyi wum'bikilë binkongulu bi taanu, i bin'ka bitaanu yabakë byaawu abi.”

²¹ Fumwaandi kun'kaambë : “Liboti, njeeyi ciseelu ciboti i cilenvukë. Njeeyi wabë wusulëmë mu mwa biimë kwaandi tokë. Mba yikutuunvi fë yilu bimpaapë. We koti mu liyaanji li fumwaaku.”

²² Wunë wutambulë binkongulu byooli kubelëmë yivaandi i wusë kaambë fumu : “Njeeyi wum'paanë binkongulu byooli i byooli bin'ka byaawu abi yabakë.”

²³ Fumwaandi kun'kaambë : “Liboti, njeeyi wuli ciseelu ciboti i cilenvukë. Njeeyi wabë wusulëmë mu mwa biimë bicyeeci. Mba yikutuunvi fë yilu bimpaapë. We koti mu liyaanji li fumwaaku.”

²⁴ Wo wutambulë cinkongulu cimweekë tokë kubelëmë yivaandi i wusë tubë : “Fumu, yizabisi ti njeeyi muutu wutudë. Njeeyi wun'velë fanë wukambusu kukunë i wun'noongë fanë wukambusu kumwamunë.

²⁵ Boomë bun'kotilë i miinu yisë sweekë cinkongulu cyaaku kusi n'toto. Boongë cyo wubakisi.”

²⁶ Fumwaandi wusë n'kaambë : “A ciseelu cibi, moolo. Njeeyi wuzabisi buboti ti miinu yin'velaangë fanë yikambusu kukunë i yin'noongaangë fanë yikambusu kumwamunë.

²⁷ Njeeyi nkanë wutuulë luboongo lwaami ku ciswekulu ci mboongo i fanë luvutukulu lwaami, miinu yilëboongë cinkongulu cyaami yimunë lukulë.

²⁸ M'botulyaanu cinkongulu cike yaandi i civanyaanu ke awu wuke yikuumi li binkongulu.

²⁹ Cibilë bën'vaanë ke awu wuke yi byaawu i naandi wum'ba mu lukulë, kasi, ke wukambusu, bëkum'botulë fwaati fo fëke yaandi.

³⁰ Kasi ciseelu cikaambu-nkaali ocyo, n'lacyaanu ku ngaandë kuke citoombi, kwaawu kum'ba mësweelë yi tukwetukunu tu meeno.” »

Lufundusu lu siitu

³¹ « Bunë Mwaanë muutu kun'kwisilë mu bumpumu bwaandi, yimunë siyaanzi syooso, foofë, naandi wun'kalë fë ntaanji bumpumu bwaandi.

³² Mëloongo mooso mën'kukumë fë ntwaalaandi. Naandi wun'kabulë aba i bëmesë, bo n'luungë-mëmemë wun'kabulilaange mëmemë i sinkoombo.

³³ Naandi wun'tuulë mëmemë ku mëbakëlë maandi i sinkoombo ku mëcyeetu.

³⁴ Mu lyaawu, n'tinu wun'kaambë banë bëm'ba ku mëbakëlë maandi : “Yisaanu, beeno lusakumunu ke Tataami. Yibyalilaanu Lwaangu bëbelikilë mu beeno fanë ntonunu buloongo.

³⁵ Cibilë, yi Taatë nzalë i beeno lum'paanë bilya. Yiba mu mpwiilë i beeno lum'paanë bikunwa. Yabë mweeni i beeno lun'tambulë.

³⁶ Yiba mpenë i beeno lum'pwiikë. Yiba ncyeenzu i beeno luyikunzudi. Yiba mu buloko i beeno luyikum'monë.”

³⁷ Oboobo baatu besulëmë bisë n'vutulilë : “A Fumu, ntaangu mbici beeso tukumweenë kutaatë nzalë i tukuvaanë bikulya? Kaambofo wuba yi mpwiilë i beeso tukuvaanë bikunwa?

³⁸ Ntaangu mbici tukumweenë njeeyi mweeni i beeso tukuyakë, kaambofo mpenë i beeso tukuvwiikë?

³⁹ Ntaangu mbici tumweenë njeeyi ncyeenzu kaambofo mu buloko i beeso tuyisë ke njeeyi?”

⁴⁰ N'tinu wusë bëvutulilë : “Yilukaambë, cibeeni, sivyaasi syakë syooso lun'vaangë mamoomë ke wun'viipë mu nkoongë sin'koombë syaami, mati ke miinu lwavaangë lyaawu.” »

⁴¹ « Kumanoofo, naandi wusë kaambë bo bëba ku mëcyeetu: “Botukaanu fëke miinu, beeno lusifu. Yendaanu ku mbaasu yikalililë yibelëminë mu dyaabu yi siyaanzi syaandi!

⁴² Cyelikë, yi Taatë nzalë i beeno lusye kum'paanë bikulya ko. Yiba mu mpwiilë i beeno lusye kum'paanë bikunwa ko.

⁴³ Yiba mweeni i beeno lusye kun'tambulë ko. Yiba mpenë i beeno lusye ku mpwiikë ko. Yiba ncyeenzu, yi mu buloko i beeno lusye kwiisë kum'monë ko.”

⁴⁴ Mu bwaawu, baawu bisë n'vutulilë : “A Fumu, ntaangu mbici tukumweenë wabë mu nzalë, mu mpwiilë, mweeni, kaambofo mpenë, ncyeenzu kaambofo mu buloko i beeso tukaambu kukuzudilë?”

⁴⁵ Oboobo, n'tinu wusë bëvutulilë : “Cyelikë yilukaambë, vyaasi syakë syooso lukambusu kuvaangë mamoomë ke wun'viipë wuvyokilili bubwabwanë, mati ke miveekë lukaambusu kuvaangë maawu.”

⁴⁶ Baawu bën'tambulë mëncyeenji mëndoongë i bësulëmë, luziingu lu sakë yi sakë. »