Matye 24 - N’KANGULU WUMOONË

Yeesu wake n'zabikini lutyamukunu lu n'zo-Nzaambi

¹ Bunë Yeesu kwabasikë ku n'zo-Nzaambi, bilaanzi byaandi kum'belëmë mu kun'leesi sintungulu si N'zo-Nzaambi.

² Naandi wusë bëvutulilë : « Lulë mu kumonë byakë byooso obyo? Cyelikë, yilukaambë fë kusë n'syaalë ko limanyi limweekë lin'tetëmë fë yilu lin'ka. Makë mooso mëm'bulumukë. »

Mënyonyi i simpekaadu

³ Bunë kwakali fë yilu moongo miti Oliivë. Bilaanzi bisë m'belëmë ku mpeengë i kun'yufulë : « Tukaambi ntaangu mbici mamoomë mën'kwisilë i ciliimbu mbici cin'leesi lwisulu lwaaku i situkulu buloongo? »

⁴ Yeesu wusë bëvutulilë : « Kebaanu wun'viipë kulupuutë.

⁵ Cibilë mpaapë bën'kwisilë mu lizinë lyaami i bën'tubë : “Miinu, Kliistu!” Bëm'puutë mpaapë baatu.

⁶ Lun'kuwu cyeembi yi bincindu i mëleelë lu mëvitë. Lubacyaanu boomë ko, cibilë mamoomë mëfwenikini kutuukë. Kasi situkulu buloongo yisë m'ba yooyi ko.

⁷ Mboongu baatu yin'nwanisi mboongu yin'ka i lwaangu lun'nwanisi lun'ka. Bum'ba yivaandi, mu mpaapë mëkomo cibuyi i tututumuku tu n'toto.

⁸ Makë mooso omo mëm'ba misoongu yin'tetë yikubutilë.

⁹ Mu baawu, mba bëluvakulë mu mënyonyi i mba bëluvoondë. Mëloongo mooso mëluleendë mu cibilë ci lizinë lyaami.

¹⁰ Bwaawu, yivaandi mpaapë bën'fuukë, bën'fundësënë, bën'lendësënë baveekë i baveekë.

¹¹ Mpaapë mibici lupuutu bëm'monikë i bëm'puutë mpaapë baatu.

¹² Cibilë libi lin'vyokililë, luzolo lu mpaapë baatu lun'volë.

¹³ Kasi wunë wun'ciimbë moonyi tee fanë siitu, naandyoowo wun'vuukë.

¹⁴ Mpilë Mpolu Mboti oyo yi Lwaangu yin'tendukë mu buloongo n'viipë, mu kuleesi bumbaanji ke mëloongo mooso. Faawu vandi, fën'kwisilë situkulu buloongo. »

Civadë-mbi

¹⁵ « Mu lyaawu, ntaangu lumweenë wo bën'teelë “Civadë-mbi” wunë Danyeelë m'bici kubikulë, naandi wun'tuulu mu civingë cisemu. — Wunë wun'taangë kwe zikuli kuwu maawu! —

¹⁶ Mu bwaawu, banë bëm'ba ku Zudee bën'tiinë mu myoongo.

¹⁷ Wunë wum'ba fë yilu mwaanzë n'zwaandi, kupodi ve kutuukë mu kuboongë byosuku bike mu n'zo.

¹⁸ Wunë wum'ba mu sisolë kwe leembu kuvutukë ku bwaalë bwaandi mu ke boongë ciyuungë cyaandi.

¹⁹ Mënyonyee, mu bilumbu be binë binanaani, mu bëcyeetu bëm'ba mu bweembë i bo bëm'ba mu kwemikë! »

²⁰ Sambilaanu Nzaambi bwiinji lutinunu lwiinu luleembu kuba mu ntaangu simbi kaambofo keti mu cilumbu ci saba.

²¹ Cibilë, mu ntaangu beenë, mënyonyi mëm'ba miinji kuvyokilë mo baatu bëmonë fë ntonunu buloongo n'viipë tee yi bunë fanwaabu, tee yi sakë yi sakë busë m'beelë bo bumweekë ko.

²² Ningë ti bilumbu be byoobi bësye ba bikufi ko, nkanë muutu ve wulëpodi kuziingë. Akasi, naandi wubivaangë bikufi mu cibilë ci bo bësoolu.

²³ Mu bwaawu, ningë wun'viipë bëlukaambë : « Kliistu naandyaawu! Kaambofo, “Na ke kunaani!” Nun'telyaanu lyaanë ko. »

²⁴ Cibilë, bitamaanë bi lupuutu i mibici yi lupuutu bëm'monikë. Baawu bën'vaangë biliimbu binenë i bimaaku, mu kupuutë banë Nzaambi kwasoolë.

²⁵ Yuwaano, miinu yalukambililë.

²⁶ « Ningë bëbe lukaambë : “Talaanu, naandi wuke mu ntaandu ciyumi!” Luyendyaanu ko. Kaambofo : “Talaanu, naandi wuke mu biswamunu!” Lun'telyaanu maanë ko.

²⁷ Dedë mweekë lusyeemu lun'lesikë ku yilu ku mëselukulu yi kumësindulu më ntaangu, bwaawu bum'beelë lwisulu lu Mwaanë muutu.

²⁸ Fosuku faamë fëm'ba vuumbi, faawu fën'kukuminë tusuci. »

Lwisulu lu Mwaanë muutu

²⁹ « Fë mbusë bilumbu bye binë binaani bi minyonyi, muunyi wum'ba citoombi i ngoondi yisë n'vaanë cyeseesë cyaandi ko. Simbotë sim'bwa luyilu i tuleendo tu mëyilu tum'bwa mbwengëlëkësë.

³⁰ Foofë, ciliimbu ci Mwaanë muutu cim'monikë kunë mëyilu i foofë, mëloongo mooso më n'toto mën'kwaayi i maawu mëm'monë Mwaanë muutu wun'kwisilë luyilu fë meeyi mëvweeti, mu luleendo i mu bumpumu bu kwaatë-yekë.

³¹ Naandi wun'filë siyaanzi syaandi i mbudi yinenë yin'tendukë mu sinkumë si na sin'toto : baawu bën'kucikë banë naandi kusoolë, fanë buloongo butoninë yi busitikilë. »

Ndoonji yivewulu mu n'ti n'ngengë

³² « Lwe bakulyaanu suundu sasafë yivewulu mu n'ti n'ngengë : bunë citafi cyaandi cin'lebilë mëkayi mabasikë, beeno lun'zaabaangë ti ntaangu sinvulë yabelëmë.

³³ Bo bumweekë, bunë lum'mweenë byakë byooso obyo kuvangënë, zaabaanu ti lwisulu lu Mwaanë muutu lwabelëmë, naandi ke fë livitu.

³⁴ Cyelikë yilukaambë : baatu bëlë mu kuziingë sintaangu be siisi bë kusë yifwiilë ko yin'tetë mamoomë kuvangënë.

³⁵ Li yilu i n'toto bin'vyookë, kasi mëbuungu maami mësë n'vyookë ko. »

Nzaambi vwiili wuzabisi cilumbu ci siitu

³⁶ « Mu cilumbu i zoolë, muutu ve wulizabisi, keti siyaanzi si mëyilu, keti Mwaanë, kanuku wo Taatë vwiili.

³⁷ Manë mëyisë mu ntaangu Nowee, mba mën'kwisë bo bumweekë fanë fën'kwisilë Mwaanë muutu.

³⁸ Licyelikë, mu teepu be yiinë, ntetë n'vulë ngami kwiisë, baatu bëlëlyangaangë i bëlënwangaangë, bëlëkwelësënaangë kaambofo bëlëkwesyaangë baanë baawu, tee cilumbu cyo Nowee wukotë mu bwaatu.

³⁹ Baawu bësye zaabë lin'viipë ko tee yi fanë n'vulë ngami yiyisilë i yikukumunë bakë booso. Bwa bum'beelë fë lwisulu lu Mwaanë muutu.

⁴⁰ Mu bwaawu bwaali bëm'ba mu solë, wumweekë bëm'boongë i wumesë bëm'biikë.

⁴¹ Bëcyeetu bwaali bëm'ba mu kunikë singeenzë mu liyambë, wumweekë bën'natë, wumweekë bëm'biikë.

⁴² Oboobo, zungululaanu, kasi lusye zaabë ko cilumbu mbici Fumwiinu kun'kwisilë.

⁴³ Zaabaanu buboti, fumu n'zo ti wuzaabë zoolë mbici yi bwiilu mwiifi kun'kwisilë, nkanë naandi wulëzungululë i wulëbiikë ko n'zwaandi kuluusu.

⁴⁴ Mu lyaawu, benuviinu belëminaanu, Mwaanë muutu wun'kwisilë mu zoolë mëzimbukulu. »

Ciseelu cisulëmë i ciseelu cikaambu kusulëmë

⁴⁵ « Nani wuke ciseelu cisulëmë i cizungelëlë? Tala, fumu wabyaasi wun'viipë mu kusalilë biseelu bimesi mu kubëvaanë bilya byaawu mu ntaangu yifwenikini.

⁴⁶ Nyeenzyaandi oyo ciseelu, fanë fumu kun'kwisilë, wukun'zakini ke vaangaangë cisalu be cyooci!

⁴⁷ Cyelikë yilukaambë, fumu wukun'tuunvi mu byaandi byooso kubakisi.

⁴⁸ Kasi, ningë ciseelu cikaambu kusulëmë, wulitubilë naveekë : “Fumwaami wusë lengë kwiisë ko”,

⁴⁹ i kutoonë ke bulaangë bo bën'salaangë yaandi, kulya, kunwa i kukolu mëlafu.

⁵⁰ Fumu ciseelu be cyoocyo wun'kwisë cilumbu kun'kaambu kuviingë i mu zoolë yo kukaambusu kuzaabë.

⁵¹ Naandi mba wukun'kulë i wukun'vangisi kukabënë ndobu yi bimpilë-mpiipi. Fa foofë fa fëm'basikilë mësweelë i tukwetukunu tu meeno. »